Naomiwui khangarān
Naomina Ruthli zingkhangaya chinkhayang lāmli tami, Boazli awuitungli kachon fasangmi da khuikhavai. Ana ngacheeda khangai, chiwui thili ringphā: ana ali kaphā sha̱nao da hoi, ithumwui Avāwui mingli sochikatmi, kala kanaisaa shimlui kāki chiwuina mazamakha ana ali kanmishapra da ngashit.
3 1Chieina aniva̱ Naomina hānga, "Irihāva̱, nawui vang phālakhaira khavai, ina nali ngasām apam phākhavai maleimala? 2Nana awui ot kasā ngalānaobingli ngasopama kaji Boaz chi ithumwui theisā maningmala? Aja ngayā ana lanpumli nāpai hamshoka. 3Nakhalatta ngasa̱lu, nganamkaphā thao neolu, nawui kachon ngavailu, kala lanpumli tunglu. Ana phāshak phazā pheomiranglakha eina tangda mipā chili nakhalatta machitheialu. 4Ana ungpi tharan, apam chi theilu; vālaga awui phei khamahong sāda ungpilu; nana khi sārakhala kaji ana nali hāngmira."
5Chieina Ruthna ali hānga, "Nana kahahāng saikora chi ina sāra." 6Chieina ana lanpumli tunglaga, aniva̱na ali hāngkahai saikora chi sai. 7Boazna phāshak phazālaga aning phālakhaowa, chieina mā shunkahaiwui naolak ungpihaowa. Ruthna ngathumda vālaga, awui phei khamahong sāda ungpihaowa. 8Ngayā sailung atamli mipā chi shuirakhaida ngareiungda, kala yanglu, awui pheili sha̱nao akha ungpisai! 9"Na khipākhala?" da ana ngahāna. "I nawui rao Ruthna," da ana hānga. "Nawui kachonwui achikun nawui raotungli hamlu, kaja na ngatangkhamena." a a v9 Kachonwui achikun mi akhatungli hamki kaji, khuilui kala ngayin khavai seihā kahaina.
10Ana hānga, "Inao ngalāva̱, ithumwui Avāna nali soranu. Hi khanaowa lukhamashan chi khare chi lia phāmei, kaja nana kachāmala kashāngala yaronnaobing makharomvāmana. 11Ara, inao ngalāva̱, mangacheealu. Nana kapopo saikora chi ina sāra, kaja iwui keinung katongana na khayākashe sha̱naona kaji thei. 12Ara, I ngatangkhamena kaji khamashung serra, chithālala, ili lia nganaimei kahai ngatangkhame akha lei. 13Aja ngayā hili pisangluilu. Ngathor, ana nali ngatangmiakha, phālakhaira; ana ngatangmiranu. Kha chi mathaakha, ithumwui Avā ringdalei singda kahāngna, ina nali ngatangmira. Ngathor eina tangda ungpilu."
14Ana ngathor eina tangda awui pheili ungpama, kala mi akhana akhali matheirarranglakha atamli shokthui, kaja Boazna hānga, "Lanpumli sha̱nao akha vai kaji mi akhana matheiranu." 15Ana hānga, "Nana ngavaikahai kachon chi khuirālu; chi khuiyanglu." Chieina ana chi khuiyanga. Ana nāpai yar tharuk tamkhuilaga, chi awui tungli parlaga, keinungli unga.
16Ruthna aniva̱li samphang tharan, Naomina ngahāna, "Irihāva̱, khi shokkahaikhala?" Chieina ana mipā awui vang sāmihai saikora chi ali unghānga. 17Ana hānga, "Ana ili nāpai yar tharuk hi mihaira, 'Nashānili khamasai eina malatungalu' da hānga."
18Naomina hānga, "Irihāva̱, ot chi kathada shoknikhala kaji na matheiranglakha eina tangda ngarailu; kaja mipa chi aja ot hi makupranglakha eina tangda mangasāmmara."
