Ng'olyoondetap Naomi
Yookto Naomi Ruth kwo rwanyut eng' kemoi, kosoome Boaz kotuch ngoryeennyi eng' ineendet. Kowagat ineendet, yeityo koboiboi: kuurei ineendet ne nyolu, koberuur eng' Kwandanyo, ak koyosyo kotyach ineendet ngot koma tyach chiitap ooreet ne neegit kosiir.
3 1Yeityo koleenji korgennyi Naomi, “Tiibiinnyu, tos manyalu acheeng'in ole imenye, si komyee eng' inyee? 2Tos ma Boaz, ne ki imi kobooto chebyosekyik, ko tilyennyo? Kemouni ko iboorsei baale eng' rwanyut. 3Iun, iroong'jigei mwaita, ilaach ngoryeeng'ung', ak ichoortegei iwe rwanyut. Amat ing'aang'jigei chiichooto agoi kooges amisyet ak eiset. 4Ye karu ineendet, ing'en ole karu; iwe iwal ngoryeet eng' keelyekyik ak iru, ak koleenjin ne myee iyai.”
5Koleenji Ruth ineendet, “Ayae tugul che imwachi.” 6Ki choortagei ineendet kwo rwanyut, ak koyai tugul che kiga koleenji korgennyi. 7Ki amis Boaz, koe, ak koboiboi muguleldanyi, yeityo koru eng' ng'eetap karurugutyetap baale. Ki nyo ineendet eng' ng'aalseet, kowal ngoryeet eng' keelyekyik, ak koru. 8Eng' kemoi kween kowagat chiichooto, ak koweektagei, ak keero, mi kwonyooto ne karu eng' keelyekyik! 9Koteebee, “Ng'oo inyee?” Koleenji, “Anee Ruth, otwogindeng'ung' ne chepto. Tuch otwogindeng'ung' eng' tabandap ngoryeeng'ung', amu inyee ko chiitap ooreet ne ityaachi.” a a v9 Tuchetap chii eng' tabandap ngoryeet ko ki soomet ne po tunisyet ak riribet.
10Koleenji, “Iberuurot inyee eng' Kwandanyo, tiibiinnyu. Kindeng'ung' ne po let ko karaaran kosiir ne po tai, amu ma ioone murenik, che pooryeet anan che mogoreek. 11Nguno, tiibiinnyu, amat iywei. Ayae tugul che isoom, amu ingen piik tugul che po nganasennyu kole inyee ko kwondo ne karaaran. 12Nguno, po iman kole anee ko chiitap ooreet ne ityaachi, ago mi chiitap ooreet age ne neegit kosiir anee. 13Tebi kemouni. Eng' mornet, ngo ityaachin, komyee, ingotyaach. Ago ngo mastyach, ko uu ye sabei Kwandanyo, atyachin anee. Iru agoi mornet.”
14Ki ru ineendet eng' keelyekyik agoi mornet, ak kong'eet kotomo konaigei chii ak chii, amu kole, “Amat konai chii age tugul kole konyo kwondo rwanyut.” 15Koleenji, “Iib ngoryeet ne ilaachi, ak itony.” Ki tony ineendet. Ki ikwa Boaz kebeberwek lo che po baale, ak koindochi ineendet, ak koba nganaseet.
16Ye kanyo Ruth ole mi korgennyi, koteebee Naomi, “Ano ng'olyoot, tiibiinnyu?” Komwachi ineendet tugul che kiga koyachi chiichooto. 17Koleenji, “Ki igoono anee kebeberwek lo chu che po baale, koleenji, ‘Amat iweekyigei ole mi korgeng'ung' puch.’”
18Koleenji Naomi, “Igen, tiibiinnyu, agoi inai ole wolu ng'olyoot, amu ma menye chiichooto eng' kaalyeet agoi kooges ng'olyoot rani.”