روت 3

3 ¹پھر اُس کی ساس نعومی نے اُس سے کہا، ”اے میری بیٹی، کیا مجھے تیرے لیے ایسا ٹھکانا نہ ڈھونڈنا چاہیے جہاں تیرا بھلا ہو؟ ²کیا بوعز، جس کی جوان عورتوں کے ساتھ تُو رہی، ہمارا رشتہ دار نہیں؟ دیکھ، آج رات وہ کھلیان میں جَو پھٹکے گا۔ ³پس تُو نہا، خوشبو لگا، اپنی چادر اوڑھ کر کھلیان کو جا، لیکن جب تک وہ کھا پی نہ چکے اُس مرد پر اپنے آپ کو ظاہر نہ کرنا۔ ⁴اور جب وہ لیٹ جائے تو اُس جگہ کو یاد رکھنا جہاں وہ لیٹا ہو؛ پھر جا کر اُس کے پاؤں کھول دینا اور لیٹ جانا، اور وہ تجھے بتا دے گا کہ تجھے کیا کرنا ہے۔“

⁵روت نے اُس سے کہا، ”جو کچھ تُو کہتی ہے میں سب کروں گی۔“ ⁶چنانچہ وہ کھلیان کو گئی اور جو کچھ اُس کی ساس نے اُسے بتایا تھا سب کیا۔ ⁷جب بوعز کھا پی چکا اور اُس کا دل خوش ہوا تو وہ اناج کے ڈھیر کے کنارے لیٹ گیا۔ تب وہ چپکے سے آئی اور اُس کے پاؤں کھول کر لیٹ گئی۔ ⁸آدھی رات کو وہ مرد چونک اُٹھا اور کروٹ بدلی تو دیکھا کہ ایک عورت اُس کے پاؤں کے پاس لیٹی ہے! ⁹اُس نے پوچھا، ”تُو کون ہے؟“ اُس نے کہا، ”میں تیری خادمہ روت ہوں۔ اپنی چادر کا دامن اپنی خادمہ پر پھیلا دے، کیونکہ تُو ولی ہے۔“ ^a a v9 کسی پر اپنے کپڑے کا دامن پھیلانا شادی اور پناہ کی درخواست تھی۔

¹⁰اُس نے کہا، ”اے میری بیٹی، تُو ہمارے باپ کی طرف سے مبارک ہو۔ تُو نے یہ آخری مہربانی پہلی سے بھی بڑھ کر دکھائی، کیونکہ تُو غریب یا امیر جوانوں کے پیچھے نہ گئی۔ ¹¹اور اب، اے میری بیٹی، مت ڈر۔ جو کچھ تُو کہے گی میں تیرے لیے کروں گا، کیونکہ میرا سارا شہر جانتا ہے کہ تُو نیک عورت ہے۔ ¹²اب یہ سچ ہے کہ میں ولی ہوں، تو بھی مجھ سے قریب تر ایک اَور ولی موجود ہے۔ ¹³آج رات یہیں رہ۔ صبح کو اگر وہ تیرا ولی بننا چاہے تو اچھا، وہ ولی بنے؛ لیکن اگر وہ تجھے چھڑانا نہ چاہے تو ہمارے باپ کی حیات کی قسم، میں تجھے چھڑاؤں گا۔ صبح تک لیٹی رہ۔“

¹⁴پس وہ صبح تک اُس کے پاؤں کے پاس لیٹی رہی، اور اِس سے پہلے کہ کوئی کسی کو پہچان سکے وہ اُٹھ گئی، کیونکہ اُس نے کہا تھا، ”کسی کو معلوم نہ ہو کہ کوئی عورت کھلیان میں آئی تھی۔“ ¹⁵پھر اُس نے کہا، ”جو چادر تُو نے اوڑھ رکھی ہے وہ لا اور اُسے تھام لے۔“ اُس نے اُسے تھام لیا، اور اُس نے جَو کے چھ پیمانے ناپ کر اُس پر رکھ دیے اور شہر میں چلا گیا۔

¹⁶جب روت اپنی ساس کے پاس آئی تو نعومی نے پوچھا، ”اے میری بیٹی، کیا ہوا؟“ تب اُس نے سب کچھ بتا دیا جو اُس مرد نے اُس کے لیے کیا تھا۔ ¹⁷اور اُس نے کہا، ”اُس نے مجھے جَو کے یہ چھ پیمانے دیے اور کہا، ’اپنی ساس کے پاس خالی ہاتھ نہ لوٹنا۔‘“

¹⁸نعومی نے کہا، ”اے میری بیٹی، ٹھہری رہ جب تک تُو نہ جان لے کہ اِس کا کیا انجام ہوتا ہے، کیونکہ وہ مرد چین سے نہ بیٹھے گا جب تک آج ہی اِس بات کو طے نہ کر لے۔“