路得記 3

3 ¹跟住,佢嘅家婆拿俄米對佢講:「我個女呀,我係咪應該為你揾個歸宿,等你可以過得好啲呢? ²波阿斯係咪我哋嘅親戚呀?你之前咪同佢嘅女僕一齊做嘢囉。今晚佢喺禾場度簸大麥。 ³你去沖個涼,搽啲香膏,着好件外袍,落去禾場啦。不過喺佢食完飲完之前,唔好俾佢知道你喺度。 ⁴等佢瞓低嗰陣,你要記住佢瞓喺邊度;跟住行埋去,揭開佢腳嗰度,瞓喺度——佢就會話你知點做。」

⁵路得對佢講:「你講嘅嘢,我全部都會照做。」 ⁶於是佢就落去禾場,一切都照佢家婆吩咐佢嘅去做。 ⁷波阿斯食完飲完,心情好舒暢,就喺穀堆嘅盡頭瞓低。路得靜靜咁行埋去,揭開佢腳嗰度,瞓喺度。 ⁸到咗半夜,佢突然驚醒,轉個身,竟然發覺有個女人瞓喺佢腳邊! ⁹ 佢問:「你係邊個呀?」佢答:「我係你嘅婢女路得。求你用你嘅外袍衫角遮住你嘅婢女,因為你係一個可以贖我哋嘅至親。」 ^a a v9 用衫角遮住一個人,係一種求婚同求庇護嘅表示。

¹⁰佢就話:「我個女呀,願我哋嘅父賜福俾你。你呢次嘅恩情,比起之前嗰次仲要好,因為你冇去追求後生仔,無論係窮定係富。 ¹¹我個女呀,而家你唔使驚。你所要求嘅,我全部都會為你做,因為成城嘅人都知道你係一個賢德嘅女人。 ¹²而家,我的確係一個可以贖你嘅至親,不過仲有一個至親比我更加近。 ¹³今晚你留喺度。到朝早,如果佢肯贖你——咁好啦,就等佢贖。若果佢唔肯,我哋嘅父係永活嘅,我一定會贖你。你瞓到天光啦。」

¹⁴路得就瞓喺佢腳邊,直到天光,喺仲未認得出人樣之前就起身,因為波阿斯講過:「唔好俾人知道有個女人嚟過禾場。」 ¹⁵佢又話:「攞你身上着住嗰塊披肩嚟,揸實佢。」路得就揸實佢。波阿斯量咗六份大麥,放喺佢身上,然後入城去。

¹⁶路得返到家婆度,拿俄米問:「我個女呀,點呀?」路得就將個男人為佢所做嘅一切話晒俾佢聽。 ¹⁷佢又話:「佢仲俾咗六份大麥我,講:『唔好空手返去見你家婆。』」

¹⁸拿俄米就話:「我個女呀,你等住先,睇下件事點收科,因為嗰個男人今日唔搞掂件事係唔會安歇嘅。」