ሩት 3 FHB Father's Heart Bible™

3 ¹ኑሓሚን ሓማታ ድማ ከምዙይ በለታ፦ “ጓለይ፥ ፅቡቕ ምእንቲ ኽኾነልኪ፥ መዕረፊ ኣይደልየልክን? ²እቲ ምስ ኣገልገልቱ ዝነበርኪ ቦኤዝ ዘመድና ኣይኮነን? እንሆ ሎሚ ለይቲ ኣብ ዓውዲ ስገም ይኸዪ ኣሎ። ³ተሓፀቢ፥ ተቐቢኢ፥ ክዳንኪ ተኸዲንኪ ድማ ናብ ዓውዲ ውረዲ። እቲ ሰብኣይ በሊዑን ሰትዩን ክሳዕ ዝውድእ ግና ነቲ ሰብኣይ ርእስኺ ኣይተፍልጥዮ። ⁴ክድቅስ እንተሎ ኸዓ፥ እታ ዝድቅሰላ ስፍራ ኣስተብህሊ፤ ከይድኪ ድማ ኣእጋሩ ቐሊዕኪ ደቅሲ፤ ንሱ እንታይ ክትገብሪ ኸም ዘለኪ ኽነግረኪ እዩ።”

⁵ሩት ድማ “ኵሉ እቲ እትብልኒ ኽገብር እየ” በለታ። ⁶ናብ ዓውዲ ድማ ወረደት፤ ከምቲ ሓማታ ዝኣዘዘታ ዅሉ ከዓ ገበረት። ⁷ቦኤዝ በሊዑን ሰትዩን ልቡ ተሓጐሰ፤ ሽዑ ኣብ ወሰን እቲ ዅምራ እኽሊ ደቀሰ። ንሳ ኸዓ ብሕቡእ መፂኣ፥ ኣእጋሩ ቐሊዓ ደቀሰት። ⁸ፍርቂ ለይቲ ምስ ኮነ፥ እቲ ሰብኣይ ሰምበደ፤ ተገልቢጡ ኸዓ እንሆ ኣብ እግሩ ሰበይቲ ደቂሳ ፀንሐት! ⁹“ንስኺ መን ኢኺ?” በላ። ንሳ ኸዓ “ኣነ ሩት ገረድካ እየ፤ ንስኻ ናይ ቀረባ ዘመድ ኢኻ እሞ፥ ጫፍ ክዳንካ ኣብ ልዕሊ ገረድካ ዘርግሕ” በለቶ። ^a a v9 ጫፍ ክዳን ኣብ ልዕሊ ሓደ ሰብ ምዝርጋሕ፥ ንሓዳርን ንዕቚባን ምልማን ማለት ነበረ።

¹⁰ንሱ ኸዓ “ጓለይ፥ ብኣቦና ብፅእቲ ኢኺ። ድኻ ኾነ ሃብታም መንእሰያት ኣይሰዓብክን ኢኺ እሞ፥ እዝ ዳሕረዋይ ሕያዋይነትኪ ኻብቲ ቐዳማይ ይበልፅ። ¹¹ሕዚ ኸዓ፥ ጓለይ፥ ኣይትፍርሒ። ኵሉ እቲ እትብልኒ ኽገብረልኪ እየ፤ ኵሉ ህዝቢ ዓደይ ክብርቲ ሰበይቲ ምዃንኪ ይፈልጥ እዩ እሞ። ¹²ሕዚ ኸዓ ኣነ ናይ ቀረባ ዘመድኪ ምዃነይ ሓቂ እዩ፤ ግና ኻባይ ዝቐርብ ካልእ ዘመድ ኣሎ። ¹³ሎሚ ለይቲ ሕደሪ። ንግሆ ድማ፥ ንሱ ክቤዝወኪ እንተ ደለየ፥ ፅቡቕ፥ ይቤዝወኪ። እንተ ዘይደለየ ግና፥ ኣቦና ህያው ከም ዝኾነ፥ ኣነ ኽቤዝወኪ እየ። ክሳዕ ንግሆ ደቅሲ።”

¹⁴ክሳዕ ንግሆ ድማ ኣብ እግሩ ደቀሰት፤ ሰብ ከይላለ ኸሎ ድማ ተሲኣ። ንሱ ኸዓ “ሰበይቲ ናብ ዓውዲ ኸም ዝመፀት ሰብ ኣይፍለጥ” ኢሉ ነበረ እሞ። ¹⁵ንሱ ድማ “እዝ ተኸዲንክዮ ዘለኺ ነፀላ ኣምፅኢ እሞ ዘርግሕዮ” በለ። ንሳ ኸዓ ዘርግሐቶ። ሽዱሽተ መስፈሪ ስገም ሰፈረ፤ ኣብ ልዕሊኣ ፀዒኑ ድማ ናብ ከተማ ኣተወ።

¹⁶ሩት ናብ ሓማታ ምስ መፀት፥ ኑሓሚን “ጓለይ፥ ከመይ ኮንኪ?” በለታ። ንሳ ኸዓ እቲ ሰብኣይ ዝገበረላ ዅሉ ነገረታ። ¹⁷ንሳ ድማ “‘ጥራሕ ኢድኪ ናብ ሓማትኪ ኣይትምለሲ’ ኢሉ፥ እዝ ሽዱሽተ መስፈሪ ስገም እዙይ ሃበኒ” በለት።

¹⁸ኑሓሚን ድማ “ጓለይ፥ እቲ ነገር ከመይ ከም ዝኸውን ክሳዕ እትፈልጢ ፅንሒ፤ እቲ ሰብኣይ እዝ ነገር ሎሚ ከይወድአ ኣይዓርፍን እዩ እሞ” በለት።