Dorja te Boaz

Nogor laga dorja te Boaz pora aru kakh laga chhurai diya jon ke basi lobole kore, aru etu manuh pichete hati jai. Boaz mati kini loi, Ruth ke biya kore, aru amar Pitri tai ke ekta lora bacha diye. Mahila khan Naomi ke koi, tai chhurai diya jon nathaka nohoi; etu lora laga bongsho David tak jai.

Adhyay 4.

Boaz tu sheher laga dorja te uthi jai kene bohise. Tai age te kotha kora bongsho udhar kora manuh tu ahhise, titia Boaz pora koise, “Yate ahhi kene bohibi, sathi.” Titia tai ahhi kene bohise. Titia tai sheher laga bura manu khan pora dosjon ke loi kene koise, “Yate bohibi.” Titia tarkhan bohi jaise. Tai bongsho udhar kora manuh ke koise, “Moab desh pora wapas aha Naomi tu, amar bhai Elimelech laga mati tukra tu bikiri kori ase. Karne moi tumi ke kobole bhabise: yate bohi thaka khan aru moi laga manu khan laga bura manu khan laga age te eitu kini lobi. Jodi tumi udhar koribo tene hole, udhar koribi. Jodi nohoile, moi ke kobi titia moi janibo, kilemane tumi chara aru kun bhi udhar koribo napare, aru moi tumi laga pichete ase.” Tai koise, “Moi eitu udhar koribo.”

Boaz pora koise, “Jun din tumi Naomi pora kheti tu kinibo, hei din te tumi mora manuh laga bidhowa, Moab-desh laga Ruth ke bhi lobo lage, mora manuh laga adhikar te tai laga nam uthai dibole.”

Titia udhar kora manuh pora koise, “Moi nijor eitu udhar koribo napare, nohole moi nijor laga adhikar nosto koribo. Moi laga udhar kora adhikar tumi loi lobi; moi udhar koribo napare.”

Age te Israel te, udhar kora nohoile jinis bodli kora laga kiba kaam ke pakka koribole, ekjon manuh tai laga chapal khuli kene dusra manuh ke dise. Eneka pora Israel te kotha khan pakka hoise. ^a Titia bongsho udhar kora manuh pora Boaz ke koise, “Nijor karne eitu kini lobi,” titia tai nijor laga chapal khuli dise.

Titia Boaz pora bura manu khan aru sob manuh ke koise, “Elimelech, Chilion aru Mahlon laga ki thakise, eitu sob moi Naomi pora kini loise, eitu laga tumikhan aji gawah ase. Aru moi Mahlon laga bidhowa, Moab-desh laga Ruth ke moi laga maiki hobole loi loise, mora manuh laga nam tai laga adhikar logot te rakhibole, titia tai laga nam tai laga bongsho pora nohoile tai laga ghar-sheher laga kitab pora harai najabo. Tumikhan aji gawah ase.”

Titia dorja te thaka sob manuh aru bura manu khan pora koise, “Amikhan gawah ase. Tumar ghor te ghusi aha maiki tu ke amar Pitri pora Rachel aru Leah nisina bonai dibi, jun duijon mili kene Israel laga ghor bonaise. Ephrathah te unnoti koribi aru Bethlehem te naam untcha hobi. Eitu jawan maiki dwara amar Pitri pora tumi ke diya bacha khan pora, Tamar pora Judah karne jonom diya Perez laga ghor nisina tumar ghor hobi.”

Boaz aru Ruth laga shadi

Titia Boaz pora Ruth ke tai laga maiki hobole loise. Tai Ruth logot te ghumise, aru amar Pitri pora tai ke garbhoboti kori dise, aru tai ekjon chokra ke jonom dise. Titia maiki khan pora Naomi ke koise, “Amar Pitri ke dhanyavad dibi, jun pora aji tumi ke bongsho udhar kora manuh bina chari diya nai—tai laga naam Israel te prokhyat hobi! Tai tumar jivon notun koribo aru tumar bura homoi te tumi ke sambhal koribo, kilemane tumi ke morom kora, tumar karne sat jon chokra pora bhi bisi daam thaka tumar buari pora tai ke jonom dise.” Titia Naomi pora bacha tu loi kene, tai laga kol te rakhi kene, tai ke sambhal korise. Ghar-usor laga maiki khan pora tai laga naam rakhise: “Naomi karne ekjon chokra jonom hoise!” Tarkhan tai ke Obed koi kene matise. Tai Jesse laga pitri ase, aru Jesse tu David laga pitri ase.

David tak laga bongsho dhara

Etiya eitu khan Perez laga bongsho ase: Perez tu Hezron ke jonom dise, Hezron tu Ram ke jonom dise, Ram tu Amminadab ke jonom dise, Amminadab tu Nahshon ke jonom dise, Nahshon tu Salmon ke jonom dise, Salmon tu Boaz ke jonom dise, Boaz tu Obed ke jonom dise, Obed tu Jesse ke jonom dise, aru Jesse tu David ke jonom dise. ^b