1 Ọba 12

12 ¹Rehoboamu lọ sí Ṣekemu, nítorí gbogbo Israẹli ti wá sí Ṣekemu láti fi í jẹ ọba. ²Nígbà tí Jeroboamu ọmọ Nebati gbọ́ èyí—ó ṣì wà ní Ejibiti, níbi tí ó ti sá fún Solomoni ọba lọ, ó sì ń gbé ibẹ̀. ³Wọ́n ránṣẹ́ sí i, wọ́n sì pè é. Jeroboamu àti gbogbo ìjọ Israẹli wá, wọ́n sì wí fún Rehoboamu pé: ⁴“Baba yín sọ àjàgà wa di le. Nísinsìnyí, ẹ fúyẹ́ iṣẹ́ wíwúwo baba yín àti àjàgà wíwúwo tí ó dà lé wa lórí, àwa yóò sì sìn yín.”

⁵Ó wí fún wọn pé, “Ẹ lọ fún ọjọ́ mẹ́ta, lẹ́yìn náà kí ẹ padà wá sọ́dọ̀ mi.” Àwọn ènìyàn náà sì lọ.

⁶Rehoboamu ọba bá àwọn àgbà tí wọ́n ti sin Solomoni baba rẹ̀ nígbà tí ó wà láàyè gbìmọ̀. Ó béèrè pé, “Báwo ni ẹ ṣe gba mi nímọ̀ràn láti fi dá àwọn ènìyàn wọ̀nyí lóhùn?”

⁷Wọ́n dáhùn pé, “Bí ẹ bá sin àwọn ènìyàn wọ̀nyí lónìí, tí ẹ sì fi inú rere dá wọn lóhùn, wọn yóò jẹ́ ìránṣẹ́ yín títí láé.”

⁸Ṣùgbọ́n ó kọ ìmọ̀ràn àwọn àgbà, ó sì bá àwọn ọ̀dọ́mọkùnrin tí wọ́n bá a dàgbà tí wọ́n sì ń sìn ín gbìmọ̀. ⁹Ó béèrè lọ́wọ́ wọn pé, “Kí ni ìmọ̀ràn yín? Báwo ni kí a ṣe dá àwọn ènìyàn wọ̀nyí lóhùn tí wọ́n wí fún mi pé, ‘Fúyẹ́ àjàgà tí baba rẹ dà lé wa lórí’?”

¹⁰Àwọn ọ̀dọ́mọkùnrin tí wọ́n bá a dàgbà dáhùn pé, “Sọ fún àwọn ènìyàn wọ̀nyí tí wọ́n wí fún ọ pé, ‘Baba rẹ sọ àjàgà wa di wúwo, ṣùgbọ́n ìwọ fúyẹ́ ẹ̀’—sọ fún wọn báyìí pé: ‘Ìka kékeré mi nípọn ju ìbàdí baba mi lọ.’ ¹¹Baba mi dà àjàgà wíwúwo lé e yín lórí; èmi yóò mú kí ó wúwo sí i. Baba mi fi pàṣán nà yín; èmi yóò fi àkekèé nà yín.”

¹²Lẹ́yìn ọjọ́ mẹ́ta, Jeroboamu àti gbogbo àwọn ènìyàn padà wá sọ́dọ̀ Rehoboamu, gẹ́gẹ́ bí ọba ti wí pé, “Ẹ padà wá sọ́dọ̀ mi ní ọjọ́ kẹta.” ¹³Ọba fi ìkanra dá àwọn ènìyàn náà lóhùn. Ó kọ ìmọ̀ràn tí àwọn àgbà ti fún un, ¹⁴ó sì bá wọn sọ̀rọ̀ gẹ́gẹ́ bí àwọn ọ̀dọ́mọkùnrin ti gbà á nímọ̀ràn pé: “Baba mi sọ àjàgà yín di wúwo; èmi yóò mú kí ó wúwo sí i. Baba mi fi pàṣán nà yín; èmi yóò fi àkekèé nà yín.”

¹⁵Báyìí ni ọba kọ etí ikún sí àwọn ènìyàn náà, nítorí ìyípadà nǹkan yìí ti ọ̀dọ̀ Baba wa wá, láti mú ọ̀rọ̀ tí Baba wa sọ láti ẹnu Ahijah ará Ṣilo fún Jeroboamu ọmọ Nebati ṣẹ.

¹⁶Nígbà tí gbogbo Israẹli rí i pé ọba kọ̀ láti fetí sí wọn, wọ́n dá a lóhùn pé: “Ìpín wo ni àwa ní nínú Dafidi? Àwa kò ní ogún kankan nínú ọmọ Jesse! Israẹli, ẹ padà sí àgọ́ yín! Dafidi, nísinsìnyí ṣọ́ ilé ara rẹ!” Báyìí ni Israẹli padà sí àgọ́ wọn.

¹⁷Ṣùgbọ́n Rehoboamu ṣì ń jẹ ọba lórí àwọn ọmọ Israẹli tí wọ́n ń gbé ní àwọn ìlú Juda. ¹⁸Rehoboamu ọba rán Adoramu, ẹni tí ó ń bójú tó iṣẹ́ ipá, ṣùgbọ́n gbogbo Israẹli sọ ọ́ ní òkúta pa. Rehoboamu ọba yára gun kẹ̀kẹ́ ẹṣin rẹ̀, ó sì sá lọ sí Jerusalemu. ¹⁹Báyìí ni Israẹli ti ń ṣọ̀tẹ̀ sí ilé Dafidi títí di òní.

²⁰Nígbà tí gbogbo Israẹli gbọ́ pé Jeroboamu ti padà dé, wọ́n ránṣẹ́ pè é sí ìjọ, wọ́n sì fi í jẹ ọba lórí gbogbo Israẹli. Ẹ̀yà Juda nìkan ṣoṣo ni ó tẹ̀lé ilé Dafidi.

²¹Nígbà tí Rehoboamu dé Jerusalemu, ó kó gbogbo ilé Juda àti ẹ̀yà Benjamini jọ—ọ̀kẹ́ mẹ́sàn-án (180,000) àwọn jagunjagun àṣàyàn—láti bá ilé Israẹli jà àti láti dá ìjọba padà fún Rehoboamu ọmọ Solomoni.

²²Ṣùgbọ́n ọ̀rọ̀ Baba wa tọ Ṣemaiah, ènìyàn Baba wa, wá pé:

²³“Sọ fún Rehoboamu ọmọ Solomoni, ọba Juda, àti gbogbo ilé Juda àti Benjamini, àti àwọn ènìyàn tí ó kù pé:

²⁴“Èyí ni ohun tí Baba wa wí: Ẹ má ṣe gòkè lọ bá àwọn arákùnrin yín, àwọn ọmọ Israẹli, jà. Kí olúkúlùkù yín padà sí ilé rẹ̀, nítorí lọ́dọ̀ mi ni èyí ti wá.” Báyìí ni wọ́n ṣe gbọ́ ọ̀rọ̀ rẹ̀, wọ́n sì padà sí ilé, gẹ́gẹ́ bí ó ti wí.

Jeroboamu Kọ́ Òrìṣà ní Beteli àti Dani

²⁵Jeroboamu kọ́ Ṣekemu ní àwọn orí òkè Efraimu, ó sì gbé ibẹ̀. Láti ibẹ̀ ni ó ti jáde, ó sì kọ́ Penueli. ²⁶Jeroboamu rò nínú ara rẹ̀ pé, “Nísinsìnyí, ìjọba lè padà sí ilé Dafidi. ²⁷Bí àwọn ènìyàn wọ̀nyí bá gòkè lọ láti rú ẹbọ ní ilé Baba wa ní Jerusalemu, ọkàn wọn yóò padà sí ọ̀dọ̀ olúwa wọn, Rehoboamu ọba Juda. Wọn yóò pa mí, wọn yóò sì padà sí ọ̀dọ̀ Rehoboamu ọba Juda.” ²⁸Lẹ́yìn tí ó ti wá ìmọ̀ràn, ọba ṣe ọmọ màlúù wúrà méjì. Ó wí fún àwọn ènìyàn náà pé, “Gígòkè lọ sí Jerusalemu pọ̀ jù fún yín. Israẹli, àwọn ọlọ́run yín nìyí, tí ó mú yín gòkè ti ilẹ̀ Ejibiti wá.” ²⁹Ó gbé ọ̀kan kalẹ̀ ní Beteli, èkejì sì ní Dani. ³⁰Èyí sì di ẹ̀ṣẹ̀, nítorí àwọn ènìyàn náà lọ láti sìn níwájú ọ̀kan títí dé Dani. ³¹Jeroboamu kọ́ àwọn ojúbọ ní àwọn ibi gíga, ó sì fi onírúurú ènìyàn ṣe àwọn àlùfáà, kì í ṣe àwọn ọmọ Lefi. ³²Jeroboamu dá àjọyọ̀ sílẹ̀ ní ọjọ́ kẹ́ẹdógún oṣù kẹjọ, gẹ́gẹ́ bí àjọyọ̀ Juda, ó sì rú ẹbọ lórí pẹpẹ. Bẹ́ẹ̀ ni ó ṣe ní Beteli, ó ń rú ẹbọ sí àwọn ọmọ màlúù tí ó ti ṣe, ó sì fi àwọn àlùfáà sípò níbẹ̀ fún àwọn ibi gíga tí ó ti kọ́. ³³Ní ọjọ́ kẹ́ẹdógún oṣù kẹjọ—oṣù tí ó ti fúnra rẹ̀ pète—ó gòkè lọ sí pẹpẹ tí ó kọ́ ní Beteli, ó sì dá àjọyọ̀ sílẹ̀ fún àwọn ọmọ Israẹli, ó sì gòkè lọ sí orí pẹpẹ láti sun tùràrí.