1 Ọba 13

13 ¹Ènìyàn Baba wa kan sì wá láti Juda sí Beteli nípa ọ̀rọ̀ Baba wa, bí Jeroboamu ti dúró ní ẹ̀bá pẹpẹ láti sun tùràrí.

²Nípa ọ̀rọ̀ Baba wa ó kígbe lòdì sí pẹpẹ náà pé, “Pẹpẹ, pẹpẹ, báyìí ni Baba wa wí: ilé Dafidi yóò bí ọmọkùnrin kan tí orúkọ rẹ̀ yóò máa jẹ́ Josiah. Lórí rẹ ni yóò ti fi àwọn àlùfáà ibi gíga tí ń sun tùràrí lórí rẹ rúbọ, egungun ènìyàn yóò sì jóná lórí rẹ.”

³Ní ọjọ́ náà ó sì fún wọn ní àmì kan pé, “Èyí ni àmì tí Baba wa sọ: pẹpẹ náà yóò fàya, eérú rẹ̀ yóò sì dànù.”

⁴Nígbà tí Jeroboamu ọba gbọ́ bí ènìyàn Baba wa ṣe kígbe lòdì sí pẹpẹ náà ní Beteli, ó na ọwọ́ rẹ̀ jáde kúrò ní pẹpẹ náà, ó wí pé, “Ẹ mú un!” Ṣùgbọ́n ọwọ́ tí ó na sí i gbẹ, kò sì lè fà á padà sọ́dọ̀ ara rẹ̀. ⁵Pẹpẹ náà sì fàya, eérú rẹ̀ sì dànù—àmì tí ènìyàn Baba wa fúnni nípa ọ̀rọ̀ Baba wa. ⁶Ọba sì wí fún ènìyàn Baba wa pé, “Bẹ Ọlọ́run rẹ kí ó ṣe ojú rere, kí o sì gbàdúrà fún mi, kí ọwọ́ mi lè padà bọ̀ sí ipò rẹ̀.” Ó sì bẹ Baba wa, ọwọ́ ọba náà sì padà bọ̀ sí ipò rẹ̀ bí ti àtijọ́.

⁷Ọba sì wí fún ènìyàn Baba wa pé, “Wá sí ilé pẹ̀lú mi, kí o sì jẹun, èmi yóò sì fún ọ ní ẹ̀bùn.”

⁸Ènìyàn Baba wa sì wí fún ọba pé, “Bí ìwọ tilẹ̀ fún mi ní ìdajì ilé rẹ, èmi kì yóò bá ọ lọ, bẹ́ẹ̀ ni èmi kì yóò jẹ àkàrà, bẹ́ẹ̀ ni èmi kì yóò mu omi níhìn-ín.

⁹Nítorí báyìí ni ọ̀rọ̀ Baba wa ṣe pàṣẹ fún mi pé, ‘Má jẹ àkàrà, má mu omi, má padà ní ọ̀nà tí o gbà wá.’”

¹⁰Bẹ́ẹ̀ ni ó gba ọ̀nà mìíràn lọ, kò sì padà ní ọ̀nà tí ó gbà wá sí Beteli.

¹¹Wòlíì arúgbó kan sì ń gbé ní Beteli. Àwọn ọmọ rẹ̀ sì wá, wọ́n sì ròyìn gbogbo ohun tí ènìyàn Baba wa ṣe ní ọjọ́ náà ní Beteli fún un. Wọ́n sì tún sọ àwọn ọ̀rọ̀ tí ó bá ọba sọ fún baba wọn.

¹²Baba wọn sì béèrè pé, “Ọ̀nà wo ni ó gbà lọ?” Àwọn ọmọ rẹ̀ sì fi ọ̀nà tí ènìyàn Baba wa láti Juda gbà hàn án. ¹³Ó sì wí fún àwọn ọmọ rẹ̀ pé, “Ẹ dì kẹ́tẹ́kẹ́tẹ́ ní gàárì fún mi.” Wọ́n sì dì kẹ́tẹ́kẹ́tẹ́ ní gàárì fún un, ó sì gùn ún. ¹⁴Ó sì tẹ̀lé ènìyàn Baba wa, ó rí i tí ó jókòó lábẹ́ igi óákù, ó sì béèrè pé, “Ìwọ ni ènìyàn Baba wa tí ó ti Juda wá bí?” Ó sì dáhùn pé, “Èmi ni.”

¹⁵Nígbà náà ni ó wí fún un pé, “Bá mi wá sí ilé, kí o sì jẹ àkàrà díẹ̀.”

¹⁶Ṣùgbọ́n ó wí pé, “Èmi kò lè bá ọ padà tàbí bá ọ wọlé, bẹ́ẹ̀ ni èmi kì yóò jẹ àkàrà tàbí mu omi pẹ̀lú rẹ níhìn-ín. ¹⁷Nítorí Baba wa ti sọ fún mi nípa ọ̀rọ̀ rẹ̀ pé, ‘Má jẹ àkàrà, má mu omi níbẹ̀, má sì padà ní ọ̀nà tí o gbà wá.’”

¹⁸Ó sì wí pé, “Èmi náà jẹ́ wòlíì bí ìwọ; angẹli kan sì sọ fún mi nípa ọ̀rọ̀ Ọlọ́run pé, ‘Mú un padà wá sí ilé rẹ kí ó lè jẹ àkàrà, kí ó sì mu omi.’” Ṣùgbọ́n ó parọ́ fún un.

¹⁹Bẹ́ẹ̀ ni ènìyàn Baba wa bá a padà, ó jẹ àkàrà ní ilé rẹ̀, ó sì mu omi. ²⁰Bí wọ́n ti jókòó lórí tábìlì, ọ̀rọ̀ Baba wa sì tọ wòlíì tí ó mú un padà wá.

²¹Ó sì ké pe ènìyàn Baba wa tí ó ti Juda wá pé, “Báyìí ni Baba wa wí: Nítorí tí ìwọ ṣàìgbọràn sí ọ̀rọ̀ rẹ̀, tí o kò sì pa àṣẹ tí Baba rẹ fún ọ mọ́, ²²ṣùgbọ́n tí o padà wá, tí o jẹ àkàrà, tí o sì mu omi ní ibi tí ó sọ fún ọ pé, ‘Má jẹ àkàrà, má mu omi’—òkú rẹ kì yóò dé ibojì àwọn baba rẹ.”

²³Lẹ́yìn tí ènìyàn Baba wa jẹun tí ó sì mu tán, wòlíì arúgbó náà dì kẹ́tẹ́kẹ́tẹ́ ní gàárì fún un, fún wòlíì tí ó mú padà wá. ²⁴Bí ó ti ń lọ ní ọ̀nà rẹ̀, kìnnìún kan sì pàdé rẹ̀ ní ọ̀nà, ó sì pa á. A sì sọ òkú rẹ̀ sí ojú ọ̀nà, kẹ́tẹ́kẹ́tẹ́ sì dúró ní ẹ̀gbẹ́ rẹ̀, kìnnìún náà sì dúró ní ẹ̀gbẹ́ òkú náà. ²⁵Àwọn tí ń kọjá sì rí òkú náà tí a sọ sí ojú ọ̀nà, àti kìnnìún náà tí ó dúró ní ẹ̀gbẹ́ rẹ̀, wọ́n sì wá, wọ́n sì ròyìn rẹ̀ ní ìlú níbi tí wòlíì arúgbó náà ń gbé. ²⁶Nígbà tí wòlíì tí ó ti yí i padà kúrò ní ọ̀nà gbọ́ èyí, ó wí pé, “Ènìyàn Baba wa ni èyí tí ó ṣàìgbọràn sí ọ̀rọ̀ Baba wa; nítorí náà ó fi í fún kìnnìún, tí ó fà á ya tí ó sì pa á, gẹ́gẹ́ bí ó ti sọ fún un.” ²⁷Nígbà náà ni ó wí fún àwọn ọmọ rẹ̀ pé, “Ẹ dì kẹ́tẹ́kẹ́tẹ́ ní gàárì fún mi.” Wọ́n sì dì í ní gàárì. ²⁸Ó sì lọ, ó rí òkú náà tí a sọ sí ojú ọ̀nà, kẹ́tẹ́kẹ́tẹ́ àti kìnnìún dúró ní ẹ̀gbẹ́ rẹ̀; kìnnìún náà kò jẹ òkú náà, bẹ́ẹ̀ ni kò fa kẹ́tẹ́kẹ́tẹ́ náà ya. ²⁹Wòlíì náà sì gbé òkú ènìyàn Baba wa sókè, ó gbé e lé kẹ́tẹ́kẹ́tẹ́, ó sì mú un padà wá, ó sì dé ìlú láti ṣọ̀fọ̀ àti láti sin ín. ³⁰Ó sì tẹ́ òkú náà sínú ibojì ara rẹ̀, wọ́n sì ṣọ̀fọ̀ lé e lórí pé, “Yéè, arákùnrin mi!”

³¹Lẹ́yìn tí ó sin ín tán, ó wí fún àwọn ọmọ rẹ̀ pé, “Nígbà tí mo bá kú, ẹ sin mí sínú ibojì níbi tí a sin ènìyàn Baba wa sí; ẹ tẹ́ egungun mi sí ẹ̀gbẹ́ egungun rẹ̀. ³²Nítorí ọ̀rọ̀ tí ó kígbe nípa ọ̀rọ̀ Baba wa lòdì sí pẹpẹ Beteli àti sí gbogbo ilé àwọn ibi gíga tí ń bẹ ní àwọn ìlú Samaria yóò ṣẹ dandan.”

³³Lẹ́yìn èyí, Jeroboamu kò yípadà kúrò ní ọ̀nà búburú rẹ̀; ó tún fi nínú gbogbo ènìyàn yan àwọn àlùfáà ibi gíga—ẹnikẹ́ni tí ó bá fẹ́, ó yà á sọ́tọ̀, ó sì di àlùfáà ibi gíga. ³⁴Èyí sì di ẹ̀ṣẹ̀ sí ilé Jeroboamu, tí ó gé e kúrò, tí ó sì pa á run kúrò lórí ilẹ̀ ayé.