1 ነገሥት 13

13 ¹ኢዮርብዓም ለማጠን በመሠዊያው አጠገብ ቆሞ ሳለ፣ የአባታችን ሰው በአባታችን ቃል ከይሁዳ ወደ ቤቴል መጣ።

²በአባታችንም ቃል በመሠዊያው ላይ እንዲህ ሲል ጮኸ፤ “መሠዊያ ሆይ፣ መሠዊያ ሆይ፣ አባታችን እንዲህ ይላል፤ የዳዊት ቤት ኢዮስያስ የሚባል ወንድ ልጅ ይወልዳል። በአንተ ላይ የሚያጥኑትን የኰረብታ መስገጃ ካህናት በአንተ ላይ ይሠዋል፤ የሰውም ዐጥንት በአንተ ላይ ይቃጠላል።”

³በዚያም ቀን ምልክት ሰጠ፤ “አባታችን የተናገረው ምልክት ይህ ነው፤ መሠዊያው ይሰነጠቃል፤ በላዩ ያለውም ዐመድ ይፈሳል።”

⁴ንጉሡ ኢዮርብዓም የአባታችን ሰው በቤቴል ባለው መሠዊያ ላይ ሲጮኽ በሰማ ጊዜ፣ ከመሠዊያው እጁን ዘርግቶ “ያዙት!” አለ። ነገር ግን በእርሱ ላይ የዘረጋት እጁ ደረቀች፤ ወደ ራሱም ሊመልሳት አልቻለም። ⁵መሠዊያውም ተሰነጠቀ፤ ዐመዱም ፈሰሰ፤ ይህም የአባታችን ሰው በአባታችን ቃል የሰጠው ምልክት ነበር። ⁶ንጉሡም የአባታችንን ሰው “አምላክህን ለምን፤ እጄም እንድትመለስልኝ ስለ እኔ ጸልይ” አለው። የአባታችንም ሰው አባታችንን ለመነ፤ የንጉሡም እጅ እንደ ቀድሞዋ ተመለሰችለት።

⁷ንጉሡም የአባታችንን ሰው “ወደ ቤት ና፤ ከእኔም ጋር ብላ፤ ስጦታም እሰጥሃለሁ” አለው።

⁸የአባታችንም ሰው ንጉሡን እንዲህ አለው፤ “የቤትህን እኵሌታ ብትሰጠኝ እንኳ፣ ከአንተ ጋር አልሄድም፤ በዚህም ቦታ እንጀራ አልበላም፤ ውሃም አልጠጣም።

⁹አባታችን በቃሉ እንዲህ ሲል አዝዞኛልና፤ ‘እንጀራ አትብላ፤ ውሃም አትጠጣ፤ በመጣህበትም መንገድ አትመለስ።’”

¹⁰ስለዚህ በሌላ መንገድ ሄደ፤ ወደ ቤቴል በመጣበትም መንገድ አልተመለሰም።

¹¹በቤቴልም አንድ ሽማግሌ ነቢይ ይኖር ነበር። ልጆቹም መጥተው የአባታችን ሰው በዚያች ቀን በቤቴል ያደረገውን ሁሉ ነገሩት፤ ለንጉሡም የተናገረውን ቃል ለአባታቸው ነገሩት።

¹²አባታቸውም “በየትኛው መንገድ ሄደ?” አላቸው። ልጆቹም ከይሁዳ የመጣው የአባታችን ሰው የሄደበትን መንገድ አሳዩት። ¹³ልጆቹንም “አህያውን ጫኑልኝ” አላቸው። አህያውንም ጫኑለት፤ እርሱም ተቀመጠበት። ¹⁴የአባታችንንም ሰው ተከትሎ ሄደ፤ ከአድባር ዛፍ ሥር ተቀምጦም አገኘው፤ “ከይሁዳ የመጣኸው የአባታችን ሰው አንተ ነህን?” አለው። እርሱም “እኔ ነኝ” አለ።

¹⁵ያን ጊዜም “ከእኔ ጋር ወደ ቤት ና፤ እንጀራም ብላ” አለው።

¹⁶እርሱ ግን እንዲህ አለ፤ “ከአንተ ጋር ልመለስ ወይም ከአንተ ጋር ልገባ አልችልም፤ በዚህም ቦታ ከአንተ ጋር እንጀራ አልበላም፤ ውሃም አልጠጣም። ¹⁷አባታችን በቃሉ እንዲህ ብሎ ነግሮኛልና፤ ‘እዚያ እንጀራ አትብላ፤ ውሃ አትጠጣ፤ በመጣህበትም መንገድ አትመለስ።’”

¹⁸እርሱም “እኔ ደግሞ እንደ አንተ ነቢይ ነኝ፤ መልአክም በእግዚአብሔር ቃል ‘እንጀራ እንዲበላና ውሃ እንዲጠጣ ወደ ቤትህ መልሰው’ ብሎ ነግሮኛል” አለው። ነገር ግን ዋሸው።

¹⁹ስለዚህ የአባታችን ሰው ከእርሱ ጋር ተመለሰ፤ በቤቱም እንጀራ በላ፤ ውሃም ጠጣ። ²⁰በማዕድ ተቀምጠው ሳሉ፣ የአባታችን ቃል መልሶ ወዳመጣው ነቢይ መጣ።

²¹ከይሁዳም የመጣውን የአባታችንን ሰው ጮኾ እንዲህ አለው፤ “አባታችን እንዲህ ይላል፤ የአባታችንን ቃል ስለ ተቃወምህ፣ አባትህም ያዘዘህን ትእዛዝ ስለ ናቅህ፣ ²²ነገር ግን ተመልሰህ ‘እንጀራ አትብላ፤ ውሃ አትጠጣ’ ባለህ ስፍራ እንጀራ ስለ በላህና ውሃ ስለ ጠጣህ፣ ሬሳህ ወደ አባቶችህ መቃብር አይገባም።”

²³የአባታችን ሰው እንጀራ በልቶ ውሃ ከጠጣ በኋላ፣ ሽማግሌው ነቢይ መልሶ ላመጣው ነቢይ አህያውን ጫነለት። ²⁴በመንገዱም ሲሄድ፣ አንበሳ በመንገድ ላይ አገኘው፤ ገደለውም። ሬሳውም በመንገድ ላይ ተጣለ፤ አህያውም በአጠገቡ ቆመ፤ አንበሳውም በሬሳው አጠገብ ቆመ። ²⁵በዚያም የሚያልፉ ሰዎች ሬሳው በመንገድ ላይ ተጥሎ አንበሳውም በአጠገቡ ቆሞ አዩ፤ መጥተውም ሽማግሌው ነቢይ በሚኖርበት ከተማ ነገሩ። ²⁶ከመንገዱም መልሶ ያመጣው ነቢይ ይህን በሰማ ጊዜ፣ “የአባታችንን ቃል የተቃወመ የአባታችን ሰው ይህ ነው፤ ስለዚህ አባታችን እንደ ነገረው ቃል ለሰበረውና ለገደለው አንበሳ አሳልፎ ሰጠው” አለ። ²⁷ልጆቹንም “አህያውን ጫኑልኝ” አላቸው፤ እነርሱም ጫኑ። ²⁸ሄዶም ሬሳው በመንገድ ላይ ተጥሎ አህያውና አንበሳው በአጠገቡ ቆመው አገኘ፤ አንበሳውም ሬሳውን አልበላም፤ አህያውንም አልቀደደም። ²⁹ነቢዩም የአባታችንን ሰው ሬሳ አነሣ፤ በአህያውም ላይ ጫነው፤ መልሶም አመጣው፤ ሊያለቅስለትና ሊቀብረው ወደ ከተማ መጣ። ³⁰ሬሳውንም በገዛ መቃብሩ አኖረው፤ “ወይኔ፣ ወንድሜ ሆይ!” እያሉ አለቀሱለት።

³¹ከቀበረውም በኋላ ልጆቹን እንዲህ አላቸው፤ “በምሞትበት ጊዜ የአባታችን ሰው በተቀበረበት መቃብር ቅበሩኝ፤ ዐጥንቴንም በዐጥንቱ አጠገብ አኑሩ። ³²በአባታችን ቃል በቤቴል መሠዊያ ላይ፣ በሰማርያ ከተሞችም ባሉ የኰረብታ መስገጃ ቤቶች ሁሉ ላይ የጮኸው ቃል በእርግጥ ይፈጸማልና።”

³³ከዚህም በኋላ ኢዮርብዓም ከክፉ መንገዱ አልተመለሰም፤ ዳግመኛም ከሕዝቡ ሁሉ የኰረብታ መስገጃ ካህናትን አደረገ፤ የፈለገውን ሁሉ ሾመ፤ እነርሱም የኰረብታ መስገጃ ካህናት ሆኑ። ³⁴ይህም ለኢዮርብዓም ቤት ኀጢአት ሆነ፤ ቤቱንም ቈርጦ ከምድር ፊት ለማጥፋት ምክንያት ሆነ።