Uba Ya Yi Wa Bagaden Yarobowam Hukunci

Wani annabi daga Yahuda ya tsaga bagaden Yerobowam bisa maganar Ubanmu, ya kuma sa hannun sarkin ya shanye, sa'an nan ya ƙi cin abinci a teburin sarki saboda an faɗa masa kada ya ci kome a can. Wani tsohon annabi ya yi masa ƙarya, ya ci, sai zaki ya kashe shi a hanyarsa ta komawa gida.

Babi na 13.

Wani mutumin Ubanmu ya zo daga Yahuda zuwa Betel bisa ga maganar Ubanmu, yayin da Yarobowam yake tsaye a bagaden don yă ƙona turare.

Bisa ga maganar Ubanmu ya yi kira gāba da bagaden ya ce, “Bagade, bagade, Ubanmu ya ce, za a haifi ɗa a gidan Dawuda mai suna Yosiya. A kanka zai miƙa hadayar firistocin masujadan kan tudu waɗanda suke ƙona turare a kanka, a kuma ƙona ƙasusuwan mutane a kanka.”

A ranar nan ya ba da alama ya ce, “Ga alamar da Ubanmu ya faɗa, bagaden zai tsage, tokar da take kansa kuma ta zubo.”

Da Sarki Yarobowam ya ji mutumin Ubanmu yana kira gāba da bagaden a Betel, sai ya miƙa hannunsa daga bagaden ya ce, “A kama shi!” Amma hannun da ya miƙa gāba da shi ya shanye, har ya kāsa mayar da shi gare shi. Bagaden kuma ya tsage, tokar da take kansa ta zubo, bisa ga alamar da mutumin Ubanmu ya bayar ta wurin maganar Ubanmu. Sai sarkin ya ce wa mutumin Ubanmu, “Ka roƙi Ubangiji Allahnka don alheri, ka kuma yi mini addu'a domin a maido mini da hannuna.” Sai mutumin ya roƙi Ubanmu, aka kuwa maido wa sarkin da hannunsa yadda yake dā.

Sarkin ya ce wa mutumin Ubanmu, “Ka zo gida tare da ni ka ci abinci, zan kuwa ba ka kyauta.”

Mutumin Ubanmu ya ce wa sarkin, “Ko ka ba ni rabin gidanka, ba zan tafi tare da kai ba, ba kuwa zan ci abinci ko in sha ruwa a wannan wuri ba.

Gama haka maganar Ubanmu ta umarce ni, ‘Kada ka ci abinci ko ka sha ruwa, kada kuma ka komo ta hanyar da ka zo.’”

Saboda haka ya bi wata hanya dabam, bai komo ta hanyar da ya zo Betel ba.

Akwai wani tsohon annabi da yake zama a Betel. Sai 'ya'yansa maza suka zo suka faɗa masa dukan abin da mutumin Ubanmu ya yi a ranar nan a Betel. Suka kuma faɗa wa mahaifinsu maganar da ya yi wa sarkin.

Mahaifinsu ya tambaye su, “Ta wace hanya ya bi?” 'Ya'yansa kuwa suka nuna masa hanyar da mutumin Ubanmu daga Yahuda ya bi. Sai ya ce wa 'ya'yansa, “Ku ɗaura mini sirdi a kan jaki.” Sai suka ɗaura masa sirdi a kan jaki, ya kuwa hau. Sai ya bi mutumin Ubanmu, ya same shi zaune a ƙarƙashin wata bishiyar oak, ya tambaye shi, “Kai ne mutumin Ubanmu da ya zo daga Yahuda?” Ya amsa ya ce, “I, ni ne.”

Sai ya ce masa, “Ka zo gida tare da ni ka ci abinci.”

Amma ya ce, “Ba zan iya komawa tare da kai ba, ko in shiga tare da kai ba, ba kuwa zan ci abinci ko in sha ruwa tare da kai a wannan wuri ba. Gama Ubanmu ya gaya mini ta wurin maganarsa, ‘Kada ka ci abinci ko ka sha ruwa a can, kada kuma ka komo ta hanyar da ka zo.’”

Sai ya ce masa, “Ni ma annabi ne kamar ka; wani mala'ika kuwa ya gaya mini ta wurin maganar Allah, ‘Ka dawo da shi gidanka domin yă ci abinci yă kuma sha ruwa.’” Amma ƙarya yake yi masa.

Saboda haka mutumin Ubanmu ya komo tare da shi, ya ci abinci a gidansa, ya kuma sha ruwa. Yayin da suke zaune a tebur, sai maganar Ubanmu ta zo wa annabin da ya dawo da shi.

Sai ya yi kira ga mutumin Ubanmu daga Yahuda ya ce, “Ga abin da Ubanmu ya ce, domin ka ƙi maganar Ubanmu, ba ka kuma kiyaye umarnin da Ubanka ya ba ka ba, amma ka komo, ka ci abinci, ka kuma sha ruwa a wurin da ya gaya maka, ‘Kada ka ci abinci ko ka sha ruwa,’ gawarka ba za ta kai kabarin kakanninka ba.”

Bayan mutumin Ubanmu ya ci ya kuma sha, sai tsohon annabin ya ɗaura sirdi a kan jaki domin annabin da ya dawo da shi. Da yana tafiya a hanyarsa, sai wani zaki ya gamu da shi a kan hanya ya kashe shi. Aka jefar da gawarsa a kan hanya, jakin kuwa yana tsaye kusa da ita, zakin ma yana tsaye kusa da gawar. Sai masu wucewa suka ga gawar a jefe a kan hanya da kuma zakin tsaye kusa da ita, suka zo suka faɗa a cikin birnin da tsohon annabin yake zama. Da annabin da ya mayar da shi daga hanya ya ji haka, sai ya ce, “Wannan shi ne mutumin Ubanmu da ya ƙi maganar Ubanmu; saboda haka Ubanmu ya ba da shi ga zaki, wanda ya yayyage shi ya kuma kashe shi, yadda ya gaya masa.” Sai ya ce wa 'ya'yansa, “Ku ɗaura mini sirdi a kan jaki.” Sai suka ɗaura. Sai ya tafi ya tarar da gawar a jefe a kan hanya, jaki da zaki kuma tsaye kusa da ita; zakin bai ci gawar ba, bai kuma yayyage jakin ba. Sai annabin ya ɗauki gawar mutumin Ubanmu, ya aza ta a kan jaki, ya dawo da ita, ya kuma zo birnin domin yă yi makoki yă kuma binne shi. Ya kwantar da gawar a kabarinsa, suka kuwa yi masa makoki suna cewa, “Kaicon, ɗan'uwana!”

Bayan ya binne shi, sai ya ce wa 'ya'yansa, “Sa'ad da na mutu, ku binne ni a kabarin da aka binne mutumin Ubanmu; ku kwantar da ƙasusuwana kusa da ƙasusuwansa. Gama lalle maganar da ya yi kira da ita ta wurin maganar Ubanmu gāba da bagaden Betel da kuma gāba da dukan masujadan kan tudu da suke a cikin biranen Samariya za ta tabbata.”

Bayan wannan, Yarobowam bai juya daga muguwar hanyarsa ba; ya sāke naɗa firistocin masujadan kan tudu daga cikin dukan mutane—duk wanda ya so, yakan naɗa shi, su kuma zama firistocin masujadan kan tudu. Wannan kuwa ya zama zunubi ga gidan Yarobowam, har ya kai ga yanke shi, da hallaka shi daga doron ƙasa.