1 ነገሥት 14

14 ¹በዚያን ጊዜ የኢዮርብዓም ልጅ አቢያ ታመመ። ²ኢዮርብዓምም ሚስቱን እንዲህ አላት፤ “ተነሥተሽ የኢዮርብዓም ሚስት እንደ ሆንሽ ማንም እንዳያውቅ ራስሽን ለውጠሽ ወደ ሴሎ ሂጂ፤ በዚህ ሕዝብ ላይ እንድነግሥ የነገረኝ ነቢዩ አኪያ በዚያ አለ። ³ዐሥር እንጀራ፣ ጥቂት ዳቦ፣ አንድ ማሰሮ ማርም ይዘሽ ወደ እርሱ ሂጂ፤ ለብላቴናው የሚሆነውን ይነግርሻል።”

⁴የኢዮርብዓም ሚስትም እንዲሁ አደረገች፤ ተነሥታ ወደ ሴሎ ወደ አኪያ ቤት ሄደች። አኪያም በሽምግልና ዐይኖቹ ፈዝዘው ስለ ነበር ማየት አይችልም ነበር።

⁵አባታችን ግን አኪያን እንዲህ ብሎት ነበር፤ “እነሆ የኢዮርብዓም ሚስት ስለ ታመመ ልጅዋ ልትጠይቅ ትመጣለች፤ እንዲህና እንዲህ ንገራት፤ በመጣችም ጊዜ እንደ ሌላ ሴት ራስዋን ለውጣ ትሆናለች።”

⁶አኪያም በበሩ የእግርዋን ኮቴ በሰማ ጊዜ እንዲህ አለ፤ “የኢዮርብዓም ሚስት ሆይ፣ ግቢ፤ ለምን እንደ ሌላ ሰው ራስሽን ታስመስያለሽ? ከባድ ወሬ ይዤ ወደ አንቺ ተልኬአለሁ፤

⁷ሂጂ፤ ኢዮርብዓምን እንዲህ በዪው፤ ‘የእስራኤል አምላክ አባታችን እንዲህ ይላል፤ “ከሕዝቡ መካከል አንሥቼ በሕዝቤ በእስራኤል ላይ ገዥ አደረግሁህ፤ ⁸መንግሥቱን ከዳዊት ቤት ቀድጄ ለአንተ ሰጠሁ፤ ነገር ግን ትእዛዜን እንደ ጠበቀ፣ በፍጹም ልቡም እንደ ተከተለኝ፣ በፊቴም ቅን የሆነውን ብቻ እንዳደረገ እንደ ባሪያዬ እንደ ዳዊት አልሆንህም። ⁹ካንተ በፊት ከነበሩት ሁሉ ይልቅ ክፉ ሠራህ፤ ሄደህም ሌሎች አማልክትን አደረግህ፤ ቀልጠው የተሠሩ ምስሎችንም ሠርተህ አስቈጣኸኝ፤ እኔንም ወደ ኋላህ ጣልኸኝ። ¹⁰ስለዚህ እነሆ በኢዮርብዓም ቤት ላይ መዓት አመጣለሁ፤ በእስራኤል ውስጥ ባሪያም ነጻም የሆነውን ከኢዮርብዓም ወንድ ሁሉ አጠፋለሁ፤ ሰው ዕበትን አቃጥሎ ፈጽሞ እስኪያጠፋ ድረስ እንደሚያደርገው የኢዮርብዓምን ቤት አቃጥላለሁ። ¹¹ከኢዮርብዓም ወገን የሆነውን በከተማ የሚሞተውን ውሾች ይበሉታል፤ በሜዳም የሚሞተውን የሰማይ ወፎች ይበሉታል፤ አባታችን ተናግሮአልና።”’

¹²ተነሥተሽ ወደ ቤትሽ ሂጂ፤ እግርሽ ከተማ በገባ ጊዜ ብላቴናው ይሞታል። ¹³እስራኤል ሁሉ ያለቅስለታል፤ ይቀብሩታልም፤ በኢዮርብዓም ቤት ውስጥ የእስራኤል አምላክ አባታችን መልካም ነገር ያገኘበት እርሱ ብቻ ስለ ሆነ ከኢዮርብዓም ቤት ወደ መቃብር የሚደርስ እርሱ ብቻ ነው። ¹⁴አባታችንም የኢዮርብዓምን ቤት የሚያጠፋ ንጉሥ በእስራኤል ላይ ለራሱ ያስነሣል፤ ይህም በዚህ ቀን፣ አዎን አሁኑኑ ነው። ¹⁵አባታችንም እስራኤልን በውሃ ውስጥ እንደሚወዛወዝ ሸምበቆ እስኪሆን ድረስ ይመታል፤ ለአባቶቻቸው ከሰጠው ከዚህ ከመልካም ምድር ነቅሎ ያወጣቸዋል፤ የአሼራንም ዐፀዶች ሠርተው ስላስቈጡት ከኤፍራጥስ ወዲያ ይበትናቸዋል። ¹⁶ኢዮርብዓም በሠራውና እስራኤልን ባሠራው ኀጢአት የተነሣ እስራኤልን አሳልፎ ይሰጣል።”

¹⁷የኢዮርብዓም ሚስትም ተነሥታ ሄደች፤ ወደ ቴርሳም መጣች። ወደ ቤቱ ደጃፍ በደረሰች ጊዜ ብላቴናው ሞተ። ¹⁸አባታችን በባሪያው በነቢዩ በአኪያ እንደ ተናገረው እስራኤል ሁሉ ቀበሩት፤ አለቀሱለትም።

¹⁹የቀረው የኢዮርብዓም ታሪክ፣ እንዴት እንደ ተዋጋና እንደ ነገሠ፣ በእስራኤል ነገሥታት ዜና መዋዕል መጽሐፍ ተጽፎአል። ²⁰ኢዮርብዓም ለሃያ ሁለት ዓመት ነገሠ፤ ከዚያም ከአባቶቹ ጋራ አንቀላፋ፤ ልጁም ናዳብ በእርሱ ፋንታ ነገሠ።

ሮብዓም በይሁዳ ነገሠ

²¹የሰሎሞን ልጅ ሮብዓም በይሁዳ ነገሠ። በነገሠም ጊዜ አርባ አንድ ዓመት ሆኖት ነበር፤ አባታችንም ስሙን ያኖርበት ዘንድ ከእስራኤል ነገዶች ሁሉ መካከል በመረጣት በኢየሩሳሌም ከተማ ዐሥራ ሰባት ዓመት ነገሠ። እናቱም ንዕማ የተባለች አሞናዊት ነበረች። ²²ይሁዳም በአባታችን ፊት ክፉ አደረገ፤ ከአባቶቻቸውም ሁሉ ይልቅ በሠሩት ኀጢአት አስቀኑት። ²³እነርሱም በረጅም ኮረብታ ሁሉ ላይ፣ በለመለመ ዛፍም ሁሉ ሥር ለራሳቸው የኮረብታ መስገጃዎችን፣ የተቀደሱ ዐምዶችን፣ የአሼራ ዐፀዶችንም ሠሩ። ²⁴በምድሪቱም ውስጥ የቤተ መቅደስ ወንድ ጋለሞቶች እንኳ ነበሩ። ሕዝቡም አባታችን በእስራኤል ፊት ያባረራቸው አሕዛብ ያደረጉትን አስጸያፊ ነገር ሁሉ አደረጉ።

²⁵በንጉሥ ሮብዓም በአምስተኛው ዓመት የግብፅ ንጉሥ ሺሻቅ በኢየሩሳሌም ላይ ወጣ። ²⁶የአባታችንንም ቤት መዝገብ የቤተ መንግሥቱንም መዝገብ ወሰደ፤ ሁሉንም ወሰደ፤ ሰሎሞን የሠራቸውን የወርቅ ጋሻዎች ሁሉ ደግሞ ወሰደ። ²⁷ንጉሥ ሮብዓምም በእነርሱ ፋንታ የናስ ጋሻዎች ሠራ፤ የቤተ መንግሥቱንም ደጅ ለሚጠብቁ የዘቦች አለቆች አስረከበ። ²⁸ንጉሡም ወደ አባታችን ቤት በገባ ቍጥር ዘቦቹ ጋሻዎቹን ይዘው ይገቡ ነበር፤ ከዚያም ወደ ዘቦች ክፍል ይመልሱአቸው ነበር።

²⁹የቀረው የሮብዓም ታሪክ ያደረገውም ሁሉ በይሁዳ ነገሥታት ዜና መዋዕል መጽሐፍ የተጻፈ አይደለምን? ³⁰በሮብዓምና በኢዮርብዓም መካከል ሁልጊዜ ጦርነት ነበረ። ³¹ሮብዓምም ከአባቶቹ ጋራ አንቀላፋ፤ በዳዊት ከተማ ከእነርሱ ጋራ ተቀበረ። እናቱም ንዕማ የተባለች አሞናዊት ነበረች። ልጁም አቢያም በእርሱ ፋንታ ነገሠ።