1ይ ነገስት 14 FHB Father's Heart Bible™

14 ¹በቲ እዋን እቲ ኣብያ ወዲ ኢዮርብዓም ሓመመ። ²ኢዮርብዓም ድማ ንሰበይቱ ከምዙይ በላ፦ “ተልዒልኪ፥ ሰበይቲ ኢዮርብዓም ምዃንኪ ሓደ እኳ ምእንቲ ኸይፈልጥ፥ መልክዕኪ ለዊጥኪ ናብ ሺሎ ኪዲ። እቲ ኣብ ልዕሊ እዝ ህዝቢ እዙይ ከም ዝነግስ ዝነገረኒ ነቢይ ኣኪያ ኣብኡ ኣሎ። ³ዓሰርተ እንጀራን ገሊኡ ቕጫን ሓደ ዕትሮ መዓርን ሒዝኪ ናብኡ ኪዲ። ንሱ ነቲ ቆልዓ እንታይ ከም ዝኸውን ክነግረኪ እዩ።”

⁴ሰበይቲ ኢዮርብዓም ድማ ከምኡ ገበረት፤ ናብ ሺሎ ናብ ቤት ኣኪያ ድማ ከደት። ኣኪያ ኸዓ ኣዒንቱ ኻብ እርጋን ዝተልዓለ ፈዚዘን ነበራ እሞ፥ ክርኢ ኣይከኣለን።

⁵ኣቦና ግና ንኣኪያ ከምዙይ ኢሉዎ ነበረ፦ “እንሆ ሰበይቲ ኢዮርብዓም ብዛዕባ ሕሙም ወዳ ኽትሓትት ትመፅእ ኣላ። ከምዙይ በላ፤ ንሳ ምስ መፀት፥ ከም ካልእ ሰበይቲ መሲላ ክትከውን እያ።”

⁶ኣኪያ ድማ ድምፂ ኣእጋራ ኣብ ኣፍ ደገ ምስ ሰምዐ፥ ከምዙይ በላ፦ “ኣቲ ሰበይቲ ኢዮርብዓም እተዊ። ስለምንታይ ከም ካልእ ሰብ ክትመስሊ? ብርቱዕ ዜና ተልኢኸልኪ ኣለኹ።

⁷ኪዲ እሞ ንኢዮርብዓም ከምዙይ በልዮ፦ ‘ኣቦና ኣምላኽ እስራኤል ከምዙይ ይብል ኣሎ፦ “ኣነ ኻብ ማእኸል ህዝቢ ኣልዒለ፥ ኣብ ልዕሊ ህዝበይ እስራኤል ሓለቓ ገበርኩኻ። ⁸ነታ መንግስቲ ኻብ ቤት ዳዊት ቐዲደ ንኣኻ ሃብኩኻ። ንስኻ ግና ትእዛዛተይ ዝሓለወ፥ ብምሉእ ልቡ ንዓይ ዝሰዓበ፥ ኣብ ቅድመይ ቅኑዕ ዝኾነ ጥራሕ ዝገበረ ኸም ባርያይ ዳዊት ኣይኮንካን። ⁹ካብ ኵሎም ቅድሜኻ ዝነበሩ ንላዕሊ ኽፉእ ገበርካ፤ ከይድካ ኸዓ ንኣይ ከተቘጥዓኒ፥ ካልኦት ኣማልኽትን ዝተቐልፁ ምስልታትን ገበርካ፤ ንኣይ ድማ ናብ ድሕሪ ዝባንካ ደርበኻኒ። ¹⁰ስለዙይ ኣብ ልዕሊ ቤት ኢዮርብዓም መዓት ከምፅእ እየ፤ ካብ ኢዮርብዓም ድማ ኣብ እስራኤል ዘሎ ኵሉ ተባዕታይ፥ ባርያ ይኹን ናፃ፥ ከጥፍእ እየ፤ ከምቲ ሰብ ፈርሲ ክሳዕ ዝውዳእ ዘቃፅል ድማ ንቤት ኢዮርብዓም ከቃፅላ እየ። ¹¹ካብ ኢዮርብዓም እቶም ኣብ ውሽጢ ኸተማ ዝሞቱ ኣኽላባት ክበልዕዎም እዮም፤ እቶም ኣብ በረኻ ዝሞቱ ድማ ኣዕዋፍ ሰማይ ክበልዓኦም እየን። ኣቦና ተዛሪቡ እዩ እሞ።”’

¹²ተልዒልኪ ናብ ቤትኪ ኪዲ። ኣእጋርኪ ናብ ከተማ ምስ ኣተዋ፥ እቲ ቆልዓ ክመውት እዩ። ¹³ኵሎም እስራኤል ድማ ክበኽዩሉን ክቐብርዎን እዮም፤ ካብ ቤት ኢዮርብዓም ንሱ ጥራሕ ናብ መቓብር ክበፅሕ እዩ፤ ኣብ ቤት ኢዮርብዓም ኣቦና ኣምላኽ እስራኤል ኣብኡ ፅቡቕ ነገር ረኺቡ እዩ እሞ። ¹⁴ኣቦና ድማ ንቤት ኢዮርብዓም ዘጥፍእ ንጉስ ኣብ ልዕሊ እስራኤል ንርእሱ ኼተንስእ እዩ፤ በዛ መዓልቲ እዚኣ፥ እወ ሕዚ ድማ። ¹⁵ኣቦና ድማ ንእስራኤል ከም ኣብ ማይ ዝወዛወዝ ሻምብቆ ክሳዕ ዝወዛወዝ ክወቕዖ እዩ፤ ካብዛ ነቦታቶም ዝሃቦም ፅብቕቲ ምድሪ ነቒልዎም ኣብ ስግር ኤፍራጥስ ፋሕ ከብሎም እዩ፤ መምለኺ ዓፀድ ገይሮም ስለ ዘቘጥዕዎ እዩ እሞ። ¹⁶ነቲ ኢዮርብዓም ዝገበሮን ንእስራኤል ዘስሓቶን ሓጢኣት ኢሉ፥ ንእስራኤል ኣሕሊፉ ክህቦም እዩ።”

¹⁷ሰበይቲ ኢዮርብዓም ድማ ተሲኣ ኸደት፤ ናብ ቴርሳ ኸዓ መፀት። ናብ ድርኵዂት እታ ቤት ምስ በፅሐት፥ እቲ ቆልዓ ሞተ። ¹⁸ኵሎም እስራኤል ድማ ቐቢሮም በኸዩሉ፤ ከምቲ ኣቦና ብባርያኡ ነቢይ ኣኪያ ዝተዛረቦ።

¹⁹እቲ ዝተረፈ ናይ ኢዮርብዓም ነገር፥ ከመይ ኢሉ ኸም ዝተዋግአን ከም ዝነገሰን፥ ኣብ መፅሓፍ ታሪክ ነገስታት እስራኤል ተፅሒፉ ኣሎ። ²⁰ኢዮርብዓም ድማ ንዕስራን ክልተን ዓመት ገዝአ፤ ምስ ኣቦታቱ ኸዓ ደቀሰ። ኣብ ክንዲኡ ድማ ወዱ ናዳብ ነገሰ።

ሮብዓም ኣብ ይሁዳ ነገሰ

²¹ሮብዓም ወዲ ሰሎሞን ኣብ ይሁዳ ነገሰ። ንጉስ ኪኸውን እንተሎ ወዲ ኣርብዓን ሓደን ዓመት ነበረ፤ ኣብ ኢየሩሳሌም፥ ኣብታ ኣቦና ስሙ ኣብኣ ምእንቲ ኼንብር ካብ ኵሎም ነገዳት እስራኤል ዝሓረያ ኸተማ፥ ዓሰርተ ሸውዓተ ዓመት ነገሰ። ስም ኣዲኡ ኸዓ ናዕማ ነበረ፤ ንሳ ኣሞናዊት ነበረት። ²²ይሁዳ ድማ ኣብ ቅድሚ ኣቦና ክፉእ ገበሩ፤ ብዝገበርዎ ሓጢኣት ከዓ ካብ ኵሎም ኣቦታቶም ንላዕሊ ኣቕንእዎ። ²³ንሳቶም ድማ ኣብ ነፍሲ ወከፍ ነዊሕ ኰረብታ፥ ኣብ ትሕቲ ነፍሲ ወከፍ ልምሉም ኦም ከዓ፥ ንባዕላቶም ሰፈራት ኣምልኾ፥ ዓምድታት ሓወልቲ፥ መምለኺ ዓፀድ ሰርሑ። ²⁴ኣብታ ሃገር ድማ ሰዶማውያን እውን ነበሩ። እቲ ህዝቢ ኸዓ ከምቲ ኣቦና ኻብ ቅድሚ እስራኤል ዝሰጐጎም ኣህዛብ ዝገብርዎ ዅሉ ፅዩፍ ነገር ገበሩ።

²⁵ኣብ መበል ሓሙሽተ ዓመቱ ንጉስ ሮብዓም፥ ሺሻቅ ንጉስ ግብፂ ናብ ኢየሩሳሌም ደየበ። ²⁶ነቲ መዝገብ ቤት ኣቦናን ነቲ መዝገብ ቤተ መንግስትን ወሰዶ፤ ኵሉ ወሰደ፤ ሰሎሞን ዝሰርሖ ኵሉ ዋልታታት ወርቂውን ወሰደ። ²⁷ስለዙይ ንጉስ ሮብዓም ክንድኡ ዝኾኑ ዋልታታት ነሃስ ሰርሐ፤ ኣብ ኢድ እቶም በሪ ቤተ መንግስቲ ዝሕልዉ ኣሕሉቕ ሓለውቲ ድማ ኣረከቦም። ²⁸እቲ ንጉስ ናብ ቤት ኣቦና ብዝኣተወሉ ቝፅሪ፥ እቶም ሓለውቲ ነቲ ዋልታታት የልዕልዎ ነበሩ፤ ድሕሪኡ ኸዓ ናብ ክፍሊ ሓለውቲ ይመልስዎ ነበሩ።

²⁹እቲ ዝተረፈ ናይ ሮብዓም ነገርን እቲ ዝገበሮ ዅሉን፥ ኣብ መፅሓፍ ታሪክ ነገስታት ይሁዳ ዝተፅሓፈዶ ኣይኮነን? ³⁰ኣብ መንጎ ሮብዓምን ኢዮርብዓምን ድማ ዅሉ ሳዕ ውግእ ነበረ። ³¹ሮብዓም ምስ ኣቦታቱ ደቀሰ፤ ምስኣቶም ድማ ኣብ ከተማ ዳዊት ተቐበረ። ስም ኣዲኡ ኸዓ ናዕማ ነበረ፤ ንሳ ኣሞናዊት ነበረት። ክንድኡ ድማ ወዱ ኣብያም ነገሰ።