1ይ ነገስት 15 FHB Father's Heart Bible™

15 ¹ኣብ መበል ዓሰርተን ሸሞንተን ዓመት ንጉስ ኢዮርብዓም ወዲ ናባጥ፥ ኣብያ ኣብ ልዕሊ ይሁዳ ነገሰ። ²ሰለስተ ዓመት ድማ ኣብ ኢየሩሳሌም ገዝአ። ስም እኖኡ ኸዓ መዓካ ጓል ኣቤሴሎም ነበረት። ³ኵሉ እቲ ኣቦኡ ዝገበሮ ሓጢኣት ደገመ፤ ልቡ ድማ ከምቲ ናይ ኣቦሓጎኡ ዳዊት ልቢ፥ ምሉእ ብምሉእ ናብ ኣቦና ኣይነበረን። ⁴ይኹን እምበር ኣቦና ምእንቲ ዳዊት ኢሉ፥ ድሕሪኡ ወዱ ብምትሳእን ንኢየሩሳሌም ብምቛምን፥ ኣብ ኢየሩሳሌም መብራህቲ ሃቦ። ⁵ዳዊት ኣብ ቅድሚ ኣቦና ቅኑዕ ገበረ፤ ብዘሎ ዘመን ህይወቱ ኸዓ፥ ብዘይ ናይ ኦርዮ ሔታዊ ነገር ጥራሕ፥ ካብቲ ዝኣዘዞ ዅሉ ኣይዘንበለን። ⁶ብዅሉ ዘመን ህይወቶም ድማ ኣብ መንጎ ሮብዓምን ኢዮርብዓምን ውግእ ነበረ። ⁷እቲ ዝተረፈ ናይ ኣብያ ነገርን፥ ኵሉ ዝገበሮን፥ ኣብቲ መፅሓፍ ታሪክ ነገስታት ይሁዳ ዝተፅሓፈዶ ኣይኮነን? ኣብ መንጎ ኣብያን ኢዮርብዓምን ድማ ውግእ ነበረ። ⁸ኣብያ ምስ ኣቦታቱ ደቀሰ፤ ኣብ ከተማ ዳዊት ድማ ተቐበረ። ክንድኡ ኸዓ ወዱ ኣሳ ነገሰ።

ኣሳ ንልቢ ኣቦ ይደሊ

⁹ኣብ መበል ዕስራ ዓመት ኢዮርብዓም ንጉስ እስራኤል፥ ኣሳ ኣብ ልዕሊ ይሁዳ ነገሰ። ¹⁰ኣርብዓን ሓደን ዓመት ድማ ኣብ ኢየሩሳሌም ገዝአ። ስም ዓባዩ ኸዓ መዓካ ጓል ኣቤሴሎም ነበረት። ¹¹ኣሳ ኸም ኣቦሓጎኡ ዳዊት ኣብ ቅድሚ ኣቦና ቅኑዕ ገበረ። ¹²ነቶም ሰዶማውያን ካብ ሃገር ኣባረሮም፤ ነቶም ኣቦታቱ ዝገበርዎ ኵሎም ጣዖታት ድማ ኣርሓቐ። ¹³ነታ ዓባዩ መዓካ ድማ፥ ንኣስታሮት ፅዩፍ ምስሊ ስለ ዝገበረት፥ ካብ መዓርግ ንግስቲ ኣውረዳ። ኣሳ ኸዓ ነቲ ምስላ ቘሪፁ ኣብ ሩባ ቄድሮን ኣቃፀሎ። ¹⁴እቲ ንጣዖት ዝሰግዱሉ በረኽቲ ግና ተሪፉ ነበረ፤ ልቢ ኣሳ ኸዓ ብዅሉ ዘመኑ ምሉእ ብምሉእ ናብ ኣቦና ነበረ። ¹⁵ነቲ ኣቦኡ ዝቐደሶ ቅዱስ ነገርን ባዕሉ ዝቐደሶ መባእን፥ ብሩርን ወርቅን ቅዱሳት ኣቑሑን ናብ ቤት ኣቦና ኣእተወ።

¹⁶ብዅሉ መዓልቲታቶም ድማ ኣብ መንጎ ኣሳን ባኦስ ንጉስ እስራኤልን ውግእ ነበረ። ¹⁷ባኦስ ንጉስ እስራኤል ድማ ናብ ይሁዳ ወፈረ፤ ሓደ እኳ ናብ ኣሳ ንጉስ ይሁዳ ኸይኣቱ ወይ ካብኡ ኸይወፅእ፥ ንራማ ዓረዳ። ¹⁸ሽዑ ኣሳ ኣብ መዛግብቲ ቤት ኣቦናን ኣብ መዛግብቲ ቤተ መንግስትን ዝተረፈ ዅሉ ብሩርን ወርቅን ወሲዱ ናብ ኣገልገልቱ ሃቦ። ንጉስ ኣሳ ኸዓ ናብ ወልደ ኣዴር ወዲ ጠብሪሞን ወዲ ሔዝዮን፥ ኣብ ደማስቆ ዝነግስ ዝነበረ ንጉስ ሶርያ፥ ከምዙይ ኢሉ ለኣኾ፦ ¹⁹“ከምቲ ኣብ መንጎ ኣቦይን ኣቦኻን ዝነበረ፥ ኣብ መንጎይን ኣብ መንጎኻን ኪዳን ይኹን። እንሆ፥ ብሩርን ወርቅን ሽልማት ገይረ ልኢኸልካ ኣለኹ። ኪድ፥ ነቲ ምስ ባኦስ ንጉስ እስራኤል ዘሎ ኪዳንካ ኣፍርሶ፤ ካባይ ድማ ምእንቲ ኽግለስ።”

²⁰ወልደ ኣዴር ድማ ንንጉስ ኣሳ ሰሚዑ፥ ኣሕሉቕ ሰራዊቱ ናብ ከተማታት እስራኤል ለኣኸ። ንኢዮንን ዳንን ኣቤል ቤት መዓካን ብዘላ ኪኔሬትን ብዘላ ሃገር ንፍታሌምን ድማ ሰዓሮም። ²¹ባኦስ ድማ እዙይ ምስ ሰምዐ፥ ንራማ ምዕራድ ኣቋረፀ፤ ኣብ ቴርሳ ኸዓ ተቐመጠ። ²²ንጉስ ኣሳ ድማ ንብዘሎ ይሁዳ ኣወጀ፤ ሓደ እኳ ኣይተረፈን። ነቲ ባኦስ ራማ ዝሃነፀሉ ኣእማንን ኣእዋምን ድማ ኣልዒሎም ወሰዱ። ብእኡ ኸዓ ኣሳ ንጌባ ዘብንያምን ንሚስጳን ሃነፀ። ²³እቲ ዝተረፈ ናይ ኣሳ ነገርን፥ ኵሉ ጅግንነቱን፥ ኵሉ ዝገበሮን፥ እተን ዝሰርሐን ከተማታትን ኣብ መፅሓፍ ታሪክ ነገስታት ይሁዳ ዝተፅሓፈዶ ኣይኮነን? ብግዜ እርጋኑ ግና ኣብ ኣእጋሩ ሓመመ። ²⁴ኣሳ ምስ ኣቦታቱ ደቀሰ፤ ምስ ኣቦታቱ ድማ ኣብ ከተማ ዳዊት ኣቦኡ ተቐበረ። ክንድኡ ኸዓ ወዱ ኢዮሳፍጥ ነገሰ።

ክፉእ ንግስና ናዳብ ኣብ እስራኤል

²⁵ናዳብ ወዲ ኢዮርብዓም፥ ኣሳ ንጉስ ይሁዳ ኣብ ዝነገሰሉ ኻልኣይ ዓመት፥ ኣብ ልዕሊ እስራኤል ነገሰ፤ ኣብ ልዕሊ እስራኤል ድማ ክልተ ዓመት ገዝአ። ²⁶ንሱ ኣብ ቅድሚ ኣቦና ክፉእ ገበረ፤ ብመንገዲ ኣቦኡን በቲ ንእስራኤል ዘስሓቶ ሓጢኣትን ከደ። ²⁷ባኦስ ወዲ ኣኪያ፥ ካብ ነገድ ይሳኮር ዝኾነ፥ ድማ ኣብ ልዕሊኡ ተመሳጠረ፤ ናዳብን ኵሎም እስራኤልን ንገባቶን ከቢቦምዋ እንተለዉ፥ ባኦስ ኣብታ ናይ ፍልስጥኤማውያን ከተማ ገባቶን ቀተሎ። ²⁸ባኦስ ድማ ኣሳ ንጉስ ይሁዳ ኣብ ዝነገሰሉ ሳልሳይ ዓመት ቀተሎ፤ ክንድኡ ኸዓ ነገሰ። ²⁹ምስ ነገሰ ኸዓ ንብዘላ ቤት ኢዮርብዓም ወቕዓ፤ ከምቲ ኣቦና ብባርያኡ ብነቢይ ኣኪያ በዓል ሴሎ ዝተዛረቦ፥ ክሳዕ ዘጥፍኦም ኵሎም፥ ንኢዮርብዓም እስትንፋስ ዘለዎ ሓደ እኳ ኣይገደፈሉን። ³⁰ምእንቲ እቲ ኢዮርብዓም ዝገበሮን ንእስራኤል ከዓ ዘሕጥኦን ሓጢኣት፥ ንኣቦና ኣምላኽ እስራኤል ኣቘጥዖ።

³¹እቲ ዝተረፈ ናይ ናዳብ ነገርን፥ ኵሉ ዝገበሮን፥ ኣብ መፅሓፍ ታሪክ ነገስታት እስራኤል ዝተፅሓፈዶ ኣይኮነን? ³²ብዅሉ መዓልቲታቶም ድማ ኣብ መንጎ ኣሳን ባኦስ ንጉስ እስራኤልን ውግእ ነበረ።

ባኦስ ኣብ እስራኤል ይነግስ

³³ኣሳ ኣብ ይሁዳ ምስ ነገሰ፥ ኣብ ሳልሳይ ዓመቱ ባኦስ ወዲ ኣኪያ ኣብ ልዕሊ ብዘሎ እስራኤል ኣብ ቴርሳ ነገሰ፤ ዕስራን ኣርባዕተን ዓመት ድማ ገዝአ። ³⁴ንሱ ኣብ ቅድሚ ኣቦና ክፉእ ገበረ፤ ብመንገዲ ኢዮርብዓምን በቲ ንእስራኤል ዘስሓቶ ሓጢኣትን ከደ።