1ይ ነገስት 16 FHB Father's Heart Bible™

16 ¹ሽዑ ቃል ኣቦና ናብ ኢዩ ወዲ ሃናኒ ኣንፃር ባኦስ ከምዙይ ኢሉ መፀ፦

²“ካብ ተፈር ኣልዓልኩኻ፥ ኣብ ልዕሊ ህዝበይ እስራኤል ድማ ገዛኢ ገበርኩኻ፤ ንስኻ ግና ብመንገዲ ኢዮርብዓም ተመላሊስካ ንህዝበይ እስራኤል ኣስሓትካዮም፥ ብሓጢኣቶም ከዓ ኣቘጥዕካኒ። ³እንሆ፥ ንባኦስን ንቤቱን ከጥፍኦም እየ፤ ንቤትካ ድማ ከም ቤት ኢዮርብዓም ወዲ ናባጥ ክገብራ እየ። ⁴ካብ ባኦስ ኣብ ከተማ ንዝሞተ ኣኽላባት ክበልዕዎ እዮም፥ ካብ ናቱ ኣብ ሜዳ ንዝሞተ ድማ ኣዕዋፍ ሰማይ ክበልዓኦ እየን።”

⁵እቲ ዝተረፈ ናይ ባኦስ ታሪኽን፥ ዝገበሮን ጅግንነቱን፥ ኣብቲ መፅሓፍ ታሪክ ነገስታት እስራኤል ዝተፅሓፈዶ ኣይኮነን? ⁶ባኦስ ምስ ኣቦታቱ ዓረፈ፤ ኣብ ቴርሳ ድማ ተቐበረ፤ ወዱ ኤላ ኸዓ ኣብ ክንድኡ ነገሰ።

⁷ቃል ኣቦናውን ብነቢይ ኢዩ ወዲ ሃናኒ ኣቢሉ ኣንፃር ባኦስን ቤቱን መፀ፤ እዙይ ከዓ ብሰንኪ እቲ ኣብ ቅድሚ ኣቦና ዝገበሮ ኵሉ ክፉእ፥ ብግብሪ ኣእዳዉ ስለ ዘቘጥዖ፥ ከም ቤት ኢዮርብዓም ስለ ዝኾነ፥ ከምኡውን ንቤት ኢዮርብዓም ስለ ዝቐተላ እዩ።

ኤላ ኣብ እስራኤል ነጊሱ ወደቐ

⁸ኣብ መበል ዕስራን ሽዱሽተን ዓመቱ ንኣሳ ንጉስ ይሁዳ፥ ኤላ ወዲ ባኦስ ኣብ ቴርሳ ኣብ እስራኤል ነገሰ፤ ክልተ ዓመትውን ነገሰ። ⁹ኤላ ኣብ ቴርሳ፥ ኣብ ቤት እቲ ኣብ ቴርሳ ኣዛዚ ቤተ መንግስቲ ዝነበረ ኣርሳ፥ ሰትዩ ሰኺሩ እንተሎ፥ ኣገልጋሊኡ ዚምሪ፥ ኣዛዚ ፍርቂ ሰረገላኡ፥ ተመሓሓለሉ። ¹⁰ዚምሪ ኣትዩ ወቒዑ ቐተሎ፤ እዙይ ከዓ ኣብ መበል ዕስራን ሸውዓተን ዓመቱ ንኣሳ ንጉስ ይሁዳ ነበረ፤ ኣብ ክንድኡ ድማ ነገሰ።

¹¹ንጉስ ኮይኑ ኣብ ዙፋኑ ምስ ተቐመጠ፥ ንብዘሎ ቤት ባኦስ ወቒዑ ቐተሎ፤ ካብ ዘመዱን ፈተውቱን ሓደ ተባዕታይ እኳ ኣይሓደገን። ¹²ዚምሪ ድማ፥ ነቲ ኣቦና ብነቢይ ኢዩ ኣቢሉ ኣንፃር ባኦስ ዝተዛረቦ ቓል ምእንቲ ኽፍፀም፥ ንብዘላ ቤት ባኦስ ኣጥፍአ፤ ¹³ብሰንኪ ኵሉ ሓጢኣት ባኦስን ሓጢኣት ወዱ ኤላን፥ እቲ ዝገበርዎን ንእስራኤል ዘስሓትዎን፥ ብኸንቱ ጣዖታቶም ከዓ ንኣቦና ኣምላኽ እስራኤል ኣቘጥዕዎ። ¹⁴እቲ ዝተረፈ ናይ ኤላ ታሪኽን፥ ኵሉ ዝገበሮን፥ ኣብቲ መፅሓፍ ታሪክ ነገስታት እስራኤል ዝተፅሓፈዶ ኣይኮነን?

ዚምሪ ኣብ እስራኤል ሸውዓተ መዓልቲ ነገሰ

¹⁵ኣብ መበል ዕስራን ሸውዓተን ዓመቱ ንኣሳ ንጉስ ይሁዳ፥ ዚምሪ ኣብ ቴርሳ ሸውዓተ መዓልቲ ነገሰ። እቲ ሰራዊት ድማ ኣብ ሃገር ፍልስጥኤማውያን ኣብ ዘሎ ገባቶን ሰፊሩ ነበረ። ¹⁶እቲ ኣብኡ ሰፊሩ ዝነበረ ህዝቢ፥ ዚምሪ ኸም ዝተማሓሓለን ንንጉስ ከም ዝቐተሎን ምስ ሰምዐ፥ ኵሉ እስራኤል በታ መዓልቲ እቲኣ ኣብቲ ሰፈር ንዖምሪ ኣዛዚ ሰራዊት ኣብ ልዕሊ እስራኤል ኣንገስዎ። ¹⁷ዖምሪን ብዘለዉ እስራኤልን ከዓ ካብ ገባቶን ደዪቦም ንቴርሳ ኸበብዋ። ¹⁸ዚምሪ እታ ኸተማ ኸም ዝተታሕዘት ምስ ረአየ፥ ናብ ግምቢ ቤተ መንግስቲ ኣተወ፤ ነቲ ቤተ መንግስቲ ኣብ ልዕሊኡ ኣቃፀሎ እሞ ሞተ፤ ¹⁹ብሰንኪ እቲ ዝገበሮ ሓጢኣት፥ ኣብ ቅድሚ ኣቦና ክፉእ ብምግባሩ፥ ብመንገዲ ኢዮርብዓምን ነቲ ንእስራኤል ዘስሓተ ሓጢኣቱን ብምኻዱ እዩ። ²⁰እቲ ዝተረፈ ናይ ዚምሪ ታሪኽን፥ እቲ ዝገበሮ ክድዓትን፥ ኣብቲ መፅሓፍ ታሪክ ነገስታት እስራኤል ዝተፅሓፈዶ ኣይኮነን?

ዖምሪ ኣብ እስራኤል ነገሰ

²¹ሽዑ ህዝቢ እስራኤል ኣብ ክልተ ተኸፍለ፤ ፍርቂ ህዝቢ ንቲብኒ ወዲ ጊናት ኬንግስዎ ደድሕሪኡ ሰዓቡ፥ ፍርቂ ድማ ደድሕሪ ዖምሪ ሰዓቡ። ²²እቶም ደድሕሪ ዖምሪ ዝሰዓቡ ድማ ነቶም ደድሕሪ ቲብኒ ወዲ ጊናት ዝሰዓቡ ሰዓርዎም፤ ስለዙይ ቲብኒ ሞተ፤ ዖምሪ ኸዓ ነገሰ። ²³ኣብ መበል ሰላሳን ሓደን ዓመቱ ንኣሳ ንጉስ ይሁዳ፥ ዖምሪ ኣብ እስራኤል ነገሰ፤ ዓሰርተ ኽልተ ዓመትውን ነገሰ፤ ካብኡ ኣብ ቴርሳ ሽዱሽተ ዓመት። ²⁴ንኰረብታ ሰማርያ ካብ ሳሜር ብኣስታት ሚእትን ሓምሳን ፓውንድ ብሩር ዓደጎ፤ ኣብኡ ኸዓ ኸተማ ሰርሐ፤ ነታ ዝሰርሓ ኸተማ ድማ ብስም ሳሜር፥ በዓል እቲ ኰረብታ፥ ሰማርያ ኢሉ ሰመያ። ²⁵ዖምሪ ኣብ ቅድሚ ኣቦና ክፉእ ገበረ፤ ካብ ኵሎም እቶም ቅድሚኡ ዝነበሩ ኸዓ ገደደ። ²⁶ብኵሉ መንገዲ ኢዮርብዓም ወዲ ናባጥን ነቲ ንእስራኤል ዘስሓቶ ሓጢኣት ኢዮርብዓምን ከደ፤ ብኸንቱ ጣዖታቶም ከዓ ንኣቦና ኣምላኽ እስራኤል ኣቘጥዖ። ²⁷እቲ ዝተረፈ ናይ ዖምሪ ታሪኽን፥ ዝገበሮን ዘርኣዮ ጅግንነቱን፥ ኣብቲ መፅሓፍ ታሪክ ነገስታት እስራኤል ዝተፅሓፈዶ ኣይኮነን? ²⁸ዖምሪ ምስ ኣቦታቱ ዓረፈ፤ ኣብ ሰማርያ ድማ ተቐበረ፤ ወዱ ኣክኣብ ከዓ ኣብ ክንድኡ ነገሰ።

ኣክኣብ ነጊሱ ንኤልዛቤል ተመርዓወ

²⁹ኣብ መበል ሰላሳን ሸሞንተን ዓመቱ ንኣሳ ንጉስ ይሁዳ፥ ኣክኣብ ወዲ ዖምሪ ኣብ ልዕሊ እስራኤል ነገሰ፤ ኣብ ሰማርያ ኾይኑ ድማ ዕስራን ክልተን ዓመት ነገሰ። ³⁰ኣክኣብ ወዲ ዖምሪ ኣብ ቅድሚ ኣቦና፥ ካብ ኵሎም እቶም ቅድሚኡ ዝነበሩ ንላዕሊ ክፉእ ገበረ። ³¹ብመንገዲ ሓጢኣት ኢዮርብዓም ወዲ ናባጥ ምኻድ ንእሽተይ ነገር ከም ዝኾነ ገይሩ፥ ንኤልዛቤል ጓል ኤትበኣል ንጉስ ሲዶናውያን ኣእተዋ፤ ከይዱ ድማ ንበዓል ኣገልገለ፥ ሰገደሉ ኸዓ። ³²ኣብ ሰማርያ ኣብ ዝሰርሖ ቤት በዓል ድማ ንበዓል መሰውኢ ኣቘመሉ። ³³ኣክኣብ ከዓ ምስሊ ጣዖት ኣስታሮት ገበረ፤ ካብ ኵሎም እቶም ቅድሚኡ ዝነበሩ ነገስታት እስራኤል ንላዕሊ ድማ ንኣቦና ኣምላኽ እስራኤል ኣቘጥዖ። ³⁴ብዘመኑ ድማ ሂኤል በዓል ቤትኤል ንኢያሪኮ ሰርሓ፤ ከምቲ ኣቦና ብኢያሱ ወዲ ነዌ ኣቢሉ ዝተዛረቦ ቓል፥ መሰረት እንትንፅፍ በዅሪ ወዱ ኣቤሮን ሞተ፥ ደገታታ እንትቕውም ከዓ እቲ ንእሽተይ ወዱ ሴጉብ ሞተ።