1 Ọba 16

16 ¹Nígbà náà ni ọ̀rọ̀ Baba wa tọ Jehu ọmọ Hanani wá lòdì sí Baaṣa pé:

²“Mo gbé ọ sókè kúrò nínú erùpẹ̀, mo sì fi ọ́ ṣe olórí lórí àwọn ènìyàn mi Israẹli, ṣùgbọ́n ìwọ rìn ní ọ̀nà Jeroboamu, o sì mú àwọn ènìyàn mi Israẹli dẹ́ṣẹ̀, o sì fi ẹ̀ṣẹ̀ wọn mú mi bínú. ³Nítorí náà, èmi yóò gbá Baaṣa àti ilé rẹ̀ kúrò, èmi yóò sì sọ ilé rẹ dàbí ilé Jeroboamu ọmọ Nebati. ⁴Ẹnikẹ́ni tí í ṣe ti Baaṣa tí ó bá kú ní ìlú ni àwọn ajá yóò jẹ, ẹnikẹ́ni tirẹ̀ tí ó bá kú ní pápá ni àwọn ẹyẹ ojú ọ̀run yóò jẹ.”

⁵Ìyókù ìṣe Baaṣa, ohun tí ó ṣe àti agbára rẹ̀, a kò ha kọ wọ́n sínú ìwé Ìtàn Ìgbà Àwọn Ọba Israẹli? ⁶Baaṣa sì sùn pẹ̀lú àwọn baba rẹ̀, a sì sin ín sí Tirsa; Ela ọmọ rẹ̀ sì jẹ ọba ní ipò rẹ̀.

⁷Ọ̀rọ̀ Baba wa sì tún tipasẹ̀ wòlíì Jehu ọmọ Hanani wá lòdì sí Baaṣa àti ilé rẹ̀, nítorí gbogbo ibi tí ó ṣe níwájú Baba wa—ó fi iṣẹ́ ọwọ́ rẹ̀ mú un bínú, ó sì dàbí ilé Jeroboamu—àti nítorí tí ó pa ilé Jeroboamu run.

Ela Jẹ Ọba, Ó Sì Ṣubú ní Israẹli

⁸Ní ọdún kẹrìndínlọ́gbọ̀n Asa ọba Juda, Ela ọmọ Baaṣa di ọba lórí Israẹli ní Tirsa, ó sì jẹ ọba fún ọdún méjì. ⁹Simri ìránṣẹ́ rẹ̀, olórí ìdajì àwọn kẹ̀kẹ́ ogun rẹ̀, dìtẹ̀ sí i nígbà tí Ela wà ní Tirsa, tí ó ń mutí yó ní ilé Arsa, alábòójútó ààfin ní Tirsa. ¹⁰Simri sì wọlé, ó lù ú bolẹ̀, ó sì pa á ní ọdún kẹtàdínlọ́gbọ̀n Asa ọba Juda, ó sì jẹ ọba ní ipò rẹ̀.

¹¹Ní kété tí ó di ọba, tí ó sì jókòó lórí ìtẹ́, ó pa gbogbo ilé Baaṣa run. Kò fi ọkùnrin kan sílẹ̀ fún un—kì í ṣe ìbátan tàbí ọ̀rẹ́ kan ṣoṣo. ¹²Báyìí ni Simri pa gbogbo ilé Baaṣa run, ó sì mú ọ̀rọ̀ Baba wa ṣẹ, èyí tí ó sọ lòdì sí Baaṣa nípasẹ̀ Jehu wòlíì, ¹³nítorí gbogbo ẹ̀ṣẹ̀ Baaṣa àti ẹ̀ṣẹ̀ Ela ọmọ rẹ̀, tí wọ́n dá, tí wọ́n sì mú Israẹli dá, tí wọ́n fi àwọn òrìṣà asán wọn mú Baba wa, Ọlọ́run Israẹli, bínú. ¹⁴Ìyókù ìṣe Ela, gbogbo ohun tí ó ṣe—a kò ha kọ wọ́n sínú ìwé Ìtàn Ìgbà Àwọn Ọba Israẹli?

Simri Jẹ Ọba Ní Ọjọ́ Méje ní Israẹli

¹⁵Ní ọdún kẹtàdínlọ́gbọ̀n Asa ọba Juda, Simri jẹ ọba fún ọjọ́ méje ní Tirsa. Àwọn ọmọ ogun sì dó ti Gibetoni, ìlú àwọn Filistini. ¹⁶Nígbà tí àwọn ọmọ ogun tí ó dó síbẹ̀ gbọ́ pé Simri ti dìtẹ̀, tí ó sì ti pa ọba, ní ọjọ́ náà nínú ibùdó, gbogbo Israẹli fi Omri, olórí ogun, jẹ ọba lórí Israẹli. ¹⁷Nígbà náà ni Omri àti gbogbo Israẹli pẹ̀lú rẹ̀ gòkè kúrò ní Gibetoni, wọ́n sì dó ti Tirsa. ¹⁸Nígbà tí Simri rí i pé a ti gba ìlú náà, ó wọ inú odi ààfin ọba, ó sì fi iná sun ààfin náà lé ara rẹ̀, ó sì kú, ¹⁹nítorí àwọn ẹ̀ṣẹ̀ tí ó dá, tí ó ń ṣe ibi níwájú Baba wa, tí ó rìn ní ọ̀nà Jeroboamu àti nínú ẹ̀ṣẹ̀ rẹ̀, èyí tí ó fa Israẹli sínú ẹ̀ṣẹ̀. ²⁰Ìyókù ìṣe Simri, àti ọ̀tẹ̀ tí ó dá—a kò ha kọ wọ́n sínú ìwé Ìtàn Ìgbà Àwọn Ọba Israẹli?

Omri Jẹ Ọba ní Israẹli

²¹Nígbà náà ni Israẹli pín sí méjì: ìdajì tẹ̀lé Tibni ọmọ Ginati láti fi í jẹ ọba, ìdajì sì tẹ̀lé Omri. ²²Àwọn ọmọlẹ́yìn Omri sì borí àwọn ọmọlẹ́yìn Tibni ọmọ Ginati. Báyìí ni Tibni kú, Omri sì di ọba. ²³Ní ọdún kọkànlélọ́gbọ̀n Asa ọba Juda, Omri di ọba lórí Israẹli, ó sì jẹ ọba fún ọdún méjìlá, mẹ́fà nínú rẹ̀ ní Tirsa. ²⁴Ó ra òkè Samaria lọ́wọ́ Ṣemeri ní nǹkan bí àádọ́jọ poun fàdákà, ó kọ́ ìlú kan síbẹ̀, ó sì sọ ọ́ ní Samaria, ní ìbámu pẹ̀lú orúkọ Ṣemeri, ẹni tí ó ní òkè náà tẹ́lẹ̀. ²⁵Omri sì ṣe ibi níwájú Baba wa, ó sì burú ju gbogbo àwọn tí ó ṣáájú rẹ̀ lọ. ²⁶Ó rìn ní gbogbo ọ̀nà Jeroboamu ọmọ Nebati àti nínú àwọn ẹ̀ṣẹ̀ Jeroboamu, tí Jeroboamu fi mú Israẹli dẹ́ṣẹ̀, tí ó fi àwọn òrìṣà asán wọn mú Baba wa, Ọlọ́run Israẹli, bínú. ²⁷Ìyókù ìṣe Omri, ohun tí ó ṣe àti agbára tí ó fihàn—a kò ha kọ wọ́n sínú ìwé Ìtàn Ìgbà Àwọn Ọba Israẹli? ²⁸Omri sì sùn pẹ̀lú àwọn baba rẹ̀, a sì sin ín sí Samaria; Ahabu ọmọ rẹ̀ sì jẹ ọba ní ipò rẹ̀.

Ahabu Jẹ Ọba, Ó Sì Fẹ́ Jesebeli

²⁹Ní ọdún kejìdínlógójì Asa ọba Juda, Ahabu ọmọ Omri di ọba lórí Israẹli, ó sì jẹ ọba lórí Israẹli ní Samaria fún ọdún méjìlélógún. ³⁰Ahabu ọmọ Omri sì ṣe ibi níwájú Baba wa, ó ju gbogbo àwọn tí ó ṣáájú rẹ̀ lọ. ³¹Bí ẹni pé rírìn ní àwọn ẹ̀ṣẹ̀ Jeroboamu ọmọ Nebati jẹ́ ohun kékeré jù, ó fẹ́ Jesebeli ọmọbìnrin Etibaali ọba àwọn ará Sidoni, ó sì lọ sin Baali, ó sì foríbalẹ̀ fún un. ³²Ó sì gbé pẹpẹ kalẹ̀ fún Baali nínú tẹmpili Baali tí ó kọ́ ní Samaria. ³³Ahabu sì tún ṣe òpó Aṣera, ó sì mú Baba wa, Ọlọ́run Israẹli, bínú ju gbogbo àwọn ọba Israẹli tí ó ṣáájú rẹ̀ lọ. ³⁴Ní àkókò rẹ̀, Hieli ará Beteli tún Jeriko kọ́. Ó fi ìpìlẹ̀ rẹ̀ lélẹ̀ ní iye ẹ̀mí Abiramu àkọ́bí rẹ̀, ó sì gbé àwọn ẹnu-ọ̀nà rẹ̀ kalẹ̀ ní iye ẹ̀mí Segubu àbíkẹ́hìn rẹ̀, gẹ́gẹ́ bí Baba wa ti sọ nípasẹ̀ Joṣua ọmọ Nuni.