اول بادشاهان 16 FHB Father's Heart Bible™

16 ¹بيا د زمونږ پلار کلام د حنانى زوئ ياهو ته د بعشا په خلاف راغلو چې،

²”ما تۀ د خاورو نه پورته کړې او زما د قوم اِسرائيل سردار مې کړې، خو تۀ د يربعام په لار روان شوې او زما قوم اِسرائيل دې په ګناه کړو، نو هغوئ په خپلو ګناهونو سره زۀ په غصه کړم. ³نو زۀ به اوس بعشا او د هغۀ کور ورک کړم او زۀ به ستا کور د نباط د زوئ يربعام د کور په شان کړم. ⁴د بعشا هر هغه څوک چې په ښار کښې مړ شى هغه به سپى خورى او د هغۀ هر هغه څوک چې په خلاصه ميره کښې مړ شى هغه به د آسمان مارغان خورى.“

⁵د بعشا نور کارونه، څۀ چې هغۀ وکړل او د هغۀ طاقت، آيا دا د اِسرائيل د بادشاهانو د تاريخ په کِتاب کښې ليکلى شوى نۀ دى؟ ⁶بعشا د خپلو پلارانو سره آرام ته لاړو او په تِرضه کښې ښخ کړے شو او د هغۀ زوئ اِيلاه د هغۀ په ځائ بادشاه شو.

⁷د زمونږ پلار کلام د حنانى د زوئ د نبى ياهو په وسيله د بعشا او د هغۀ د کور په خلاف هم راغلو، د دې ټولې بدۍ دپاره چې هغۀ د زمونږ پلار په نظر کښې وکړه، چې د خپلو لاسونو په کار سره يې هغه په غصه کړو او د يربعام د کور په شان شو، او ځکه چې هغۀ د يربعام کور ووهلو.

اِيلاه په اِسرائيل کښې بادشاهى کوى او راپرزيږى

⁸د يهوداه د بادشاه آسا په شپږ ويشتم کال کښې د بعشا زوئ اِيلاه په تِرضه کښې د اِسرائيل بادشاه شو او دوه کاله يې بادشاهى وکړه. ⁹د هغۀ نوکر زِمرى چې د هغۀ د نيمو رتهونو کماندار وو، د هغۀ په خلاف سازش وکړو، کله چې اِيلاه په تِرضه کښې وو او د تِرضه د محل مُنتظم د اَرضا په کور کښې يې شراب څښل او نشه شوے وو. ¹⁰زِمرى ور دننه شو او هغه يې ووهلو او د يهوداه د بادشاه آسا په اوۀ ويشتم کال کښې يې هغه قتل کړو او د هغۀ په ځائ بادشاه شو.

¹¹کله چې هغه بادشاه شو او په تخت کښيناستو، نو هغۀ د بعشا ټول کور ووهلو. هغۀ د هغۀ هيڅ نارينه پرېنښو، نۀ کوم رشتهدار او نۀ کوم دوست. ¹²نو زِمرى د بعشا ټول کور تباه کړو، چې د زمونږ پلار هغه کلام يې پوره کړو کوم چې د بعشا په خلاف د نبى ياهو په وسيله وئيلے شوے وو، ¹³د بعشا د ټولو ګناهونو او د هغۀ د زوئ اِيلاه د ګناهونو دپاره، کومې چې هغوئ وکړې او اِسرائيل يې هم پرې وکړې، چې د زمونږ پلار، د اِسرائيل خُدائ پاک يې، په خپلو بيکاره بتانو سره په غصه کړو. ¹⁴د اِيلاه نور کارونه، هر څۀ چې هغۀ وکړل، آيا دا د اِسرائيل د بادشاهانو د تاريخ په کِتاب کښې ليکلى شوى نۀ دى؟

زِمرى په اِسرائيل کښې اوه ورځې بادشاهى کوى

¹⁵د يهوداه د بادشاه آسا په اوۀ ويشتم کال کښې زِمرى په تِرضه کښې اوه ورځې بادشاهى وکړه. فوځ د جِبتون په خلاف چې د فلستيانو يو ښار وو خېمې لګولې وې. ¹⁶کله چې هغه فوځ چې هلته يې خېمې لګولې وې واورېدل چې زِمرى سازش کړے دے او بادشاه يې وهلے دے، نو هغه ورځ په لښکرګاه کښې ټول اِسرائيل د فوځ کماندار عُمرى د اِسرائيل بادشاه کړو. ¹⁷بيا عُمرى او د هغۀ سره ټول اِسرائيل د جِبتون نه پورته لاړل او تِرضه يې محاصره کړه. ¹⁸کله چې زِمرى وليدل چې ښار نيولے شو، نو هغه د شاهى محل په قلعه کښې ننوتو او محل يې په خپل ځان باندې وسوزولو او مړ شو، ¹⁹د هغو ګناهونو په سبب چې هغۀ وکړې، چې د زمونږ پلار په مخکښې يې بدى وکړه او د يربعام په لار او د هغۀ په هغه ګناه روان شو کومه چې اِسرائيل يې هم پرې کړو. ²⁰د زِمرى نور کارونه او هغه بغاوت چې هغۀ وکړو، آيا دا د اِسرائيل د بادشاهانو د تاريخ په کِتاب کښې ليکلى شوى نۀ دى؟

عُمرى په اِسرائيل کښې بادشاهى کوى

²¹بيا اِسرائيل په دوه برخو ووېشلے شو، نيمو د جِنت د زوئ تِبنى پسې لاره ونيوله چې هغه بادشاه کړى او نيمو د عُمرى پسې لاره ونيوله. ²²خو د عُمرى پلويان د جِنت د زوئ تِبنى په پلويانو باندې غالِب شول. نو تِبنى مړ شو او عُمرى بادشاه شو. ²³د يهوداه د بادشاه آسا په يو دېرشم کال کښې عُمرى د اِسرائيل بادشاه شو او دولس کاله يې بادشاهى وکړه چې شپږ يې په تِرضه کښې وکړه. ²⁴هغۀ د سامريه غونډۍ د شامر نه نژدې يو سل پنځوس پونډه چاندى واخستله او هلته يې يو ښار جوړ کړو او نوم يې د شامر په نامه چې د غونډۍ مالِک وو، سامريه کېښودو. ²⁵عُمرى د زمونږ پلار په نظر کښې بدى وکړه، د هغه ټولو نه بتره چې د هغۀ نه مخکښې وُو. ²⁶هغه د نباط د زوئ يربعام په هره لار او د يربعام په ګناهونو روان شو، کومې چې يربعام اِسرائيل پرې وکړې، چې د زمونږ پلار، د اِسرائيل خُدائ پاک يې، په خپلو بيکاره بتانو سره په غصه کړو. ²⁷د عُمرى نور کارونه، څۀ چې هغۀ وکړل او هغه طاقت چې هغۀ وښودو، آيا دا د اِسرائيل د بادشاهانو د تاريخ په کِتاب کښې ليکلى شوى نۀ دى؟ ²⁸عُمرى د خپلو پلارانو سره آرام ته لاړو او په سامريه کښې ښخ کړے شو او د هغۀ زوئ اَخاب د هغۀ په ځائ بادشاه شو.

اَخاب بادشاهى کوى او د يزبل سره واده کوى

²⁹د يهوداه د بادشاه آسا په اته دېرشم کال کښې د عُمرى زوئ اَخاب د اِسرائيل بادشاه شو او په سامريه کښې يې د اِسرائيل باندې دوه ويشت کاله بادشاهى وکړه. ³⁰د عُمرى زوئ اَخاب د زمونږ پلار په نظر کښې بدى وکړه، د هغه ټولو نه زياته چې د هغۀ نه مخکښې وُو. ³¹داسې چې ګويا د نباط د زوئ يربعام په ګناهونو کښې روانېدل يې کومه کوچنۍ خبره وه، هغۀ د صيدا د بادشاه د اِتبعل لور يزبل سره واده وکړو، بيا لاړو او د بعل عبادت يې وکړو او سجده يې ورته وکړه. ³²هغۀ د بعل دپاره د بعل په هغه مندر کښې چې هغۀ په سامريه کښې جوړ کړے وو، يوه قربان‌ګاه جوړه کړه. ³³اَخاب د اشيره يو ستن هم جوړ کړو او د زمونږ پلار، د اِسرائيل خُدائ پاک يې، د اِسرائيل د هغه ټولو بادشاهانو نه زيات په غصه کړو چې د هغۀ نه مخکښې وُو. ³⁴د هغۀ په ورځو کښې د بيتايل حيئيل يريحو بيا جوړ کړو. هغۀ د هغۀ بُنياد د خپل مشر زوئ اَبيرام په بدل کښې کېښودو او د هغۀ دروازې يې د خپل کشر زوئ سجوب په بدل کښې ودرولې، لکه څنګه چې د زمونږ پلار د نون د زوئ يشوع په وسيله وئيلى وُو.