1 ነገሥት 16

16 ¹የአባታችን ቃል በበኣሳ ላይ ወደ ሐናኒ ልጅ ወደ ዬሁ እንዲህ ሲል መጣ፦

²“ከዐፈር አነሣሁህ፤ በሕዝቤም በእስራኤል ላይ ገዥ አደረግሁህ፤ አንተ ግን በኢዮርብዓም መንገድ ተመላለስህ፤ ሕዝቤን እስራኤልንም አስኀጠእህ፤ በኀጢአታቸውም አስቈጣኸኝ። ³ስለዚህ በኣሳንና ቤቱን ልጠርግ ነው፤ ቤትህንም እንደ ናባጥ ልጅ እንደ ኢዮርብዓም ቤት አደርጋለሁ። ⁴ከበኣሳ ወገን በከተማ የሚሞተውን ውሾች ይበሉታል፤ በሜዳም የሚሞተውን የእርሱን ሰው የሰማይ ወፎች ይበሉታል።”

⁵የተቀረው የበኣሳ ሥራ፣ ያደረገው ሁሉና ኀይሉ በእስራኤል ነገሥት ዜና መዋዕል መጽሐፍ ተጽፎ የለምን? ⁶በኣሳም ከአባቶቹ ጋር አንቀላፋ፤ በቴርሳም ተቀበረ፤ ልጁ ኤላም በእርሱ ፋንታ ነገሠ።

⁷የአባታችን ቃል በበኣሳና በቤቱ ላይ በነቢዩ በሐናኒ ልጅ በዬሁ በኩል ደግሞ መጣ፤ ይህም በአባታችን ፊት ባደረገው ክፋት ሁሉ የተነሣ፣ በእጆቹ ሥራ እንደ ኢዮርብዓም ቤት በመሆን ስላስቈጣው፣ ደግሞም የኢዮርብዓምን ቤት ስለ መታ ነበር።

ኤላ በእስራኤል ነገሠ፤ ወደቀም

⁸በይሁዳ ንጉሥ በአሳ በሃያ ስድስተኛው ዓመት የበኣሳ ልጅ ኤላ በቴርሳ በእስራኤል ላይ ነገሠ፤ ሁለት ዓመትም ገዛ። ⁹ባሪያው ዝምሪ፣ የሰረገሎቹ እኩሌታ አለቃ፣ ኤላ በቴርሳ የቤተ መንግሥቱ አዛዥ በሆነው በአርሳ ቤት ሰክሮ ሳለ፣ በእርሱ ላይ አደመ። ¹⁰ዝምሪም ገብቶ መታው፤ በይሁዳ ንጉሥ በአሳ በሃያ ሰባተኛው ዓመትም ገደለው፤ በእርሱም ፋንታ ነገሠ።

¹¹እርሱም ነግሦ በዙፋኑ ላይ እንደ ተቀመጠ፣ የበኣሳን ቤት ሁሉ መታ፤ ከወንዶቹም አንድ እንኳ አላስቀረለትም፤ ዘመድም ሆነ ወዳጅ አልተወለትም። ¹²ዝምሪም የአባታችንን ቃል፣ በነቢዩ በዬሁ በኩል በበኣሳ ላይ የተነገረውን ፈጽሞ፣ የበኣሳን ቤት ሁሉ አጠፋ፤ ¹³ይህም ስለ በኣሳ ኀጢአት ሁሉና ስለ ልጁ ስለ ኤላ ኀጢአት ነበር፤ እነርሱ የሠሩትና እስራኤልን ያሠሩት፣ በከንቱ ጣዖታቸውም አባታችንን የእስራኤልን አምላክ ያስቈጡት ነበር። ¹⁴የተቀረው የኤላ ሥራ፣ ያደረገው ሁሉ በእስራኤል ነገሥት ዜና መዋዕል መጽሐፍ ተጽፎ የለምን?

ዝምሪ በእስራኤል ሰባት ቀን ነገሠ

¹⁵በይሁዳ ንጉሥ በአሳ በሃያ ሰባተኛው ዓመት ዝምሪ በቴርሳ ሰባት ቀን ነገሠ። ሰራዊቱም የፍልስጥኤም ከተማ በሆነችው በጊበቶን ላይ ሰፍሮ ነበር። ¹⁶በዚያ የሰፈረው ሕዝብም ዝምሪ እንዳመጸና ንጉሡን እንደ መታ በሰማ ጊዜ፣ እስራኤል ሁሉ በዚያን ቀን በሰፈሩ ውስጥ የሰራዊቱን አዛዥ ዓምሪን በእስራኤል ላይ አነገሡት። ¹⁷ዓምሪም ከእርሱ ጋር የነበረው እስራኤል ሁሉ ከጊበቶን ወጥተው ቴርሳን ከበቡ። ¹⁸ዝምሪም ከተማዪቱ እንደ ተያዘች ባየ ጊዜ፣ ወደ ቤተ መንግሥቱ ግንብ ገባ፤ ቤተ መንግሥቱንም በራሱ ላይ በእሳት አቃጥሎ ሞተ፤ ¹⁹ይህም በሠራው ኀጢአት የተነሣ ነበር፤ በአባታችን ፊት ክፉ አድርጎአልና፤ በኢዮርብዓም መንገድና እስራኤልን ባሳተው በኀጢአቱ ተመላልሶአልና። ²⁰የተቀረው የዝምሪ ሥራ፣ ያደረገውም ዐመፅ በእስራኤል ነገሥት ዜና መዋዕል መጽሐፍ ተጽፎ የለምን?

ዓምሪ በእስራኤል ነገሠ

²¹በዚያን ጊዜ እስራኤል ለሁለት ተከፈለ፤ እኩሌታው ሕዝብ የጊኔትን ልጅ ቲብኒን ሊያነግሡት ተከተሉት፤ እኩሌታውም ዓምሪን ተከተሉ። ²²ዓምሪን የተከተሉት የጊኔትን ልጅ ቲብኒን ከተከተሉት በረቱ፤ ስለዚህ ቲብኒ ሞተ፤ ዓምሪም ነገሠ። ²³በይሁዳ ንጉሥ በአሳ በሠላሳ አንደኛው ዓመት ዓምሪ በእስራኤል ላይ ነገሠ፤ ዐሥራ ሁለት ዓመትም ገዛ፤ ከእነዚህም ስድስት ዓመት በቴርሳ ገዛ። ²⁴የሰማርያን ተራራ ከሴሜር በ150 ፓውንድ ብር ያህል ገዛ፤ በዚያም ከተማ ሠራ፤ ተራራው ባለቤት በነበረው በሴሜር ስም ከተማዪቱን ሰማርያ ብሎ ጠራት። ²⁵ዓምሪም በአባታችን ፊት ክፉ አደረገ፤ ከበፊቱ ከነበሩት ሁሉ ይልቅ ክፉ ሠራ። ²⁶የናባጥን ልጅ የኢዮርብዓምን መንገድ ሁሉና ኢዮርብዓም እስራኤልን ያሠራውን ኀጢአቱን ተከተለ፤ በከንቱ ጣዖታቸውም አባታችንን የእስራኤልን አምላክ አስቈጡ። ²⁷የተቀረው የዓምሪ ሥራ፣ ያደረገው ሁሉና ያሳየው ኀይል በእስራኤል ነገሥት ዜና መዋዕል መጽሐፍ ተጽፎ የለምን? ²⁸ዓምሪም ከአባቶቹ ጋር አንቀላፋ፤ በሰማርያም ተቀበረ፤ ልጁ አክዓብም በእርሱ ፋንታ ነገሠ።

አክዓብ ነገሠ፤ ኤልዛቤልንም አገባ

²⁹በይሁዳ ንጉሥ በአሳ በሠላሳ ስምንተኛው ዓመት የዓምሪ ልጅ አክዓብ በእስራኤል ላይ ነገሠ፤ በሰማርያም በእስራኤል ላይ ሃያ ሁለት ዓመት ገዛ። ³⁰የዓምሪ ልጅ አክዓብም በአባታችን ፊት ከበፊቱ ከነበሩት ሁሉ ይልቅ ክፉ አደረገ። ³¹በናባጥ ልጅ በኢዮርብዓም ኀጢአት መመላለስ ቀላል ነገር እንደ ሆነ፣ የሲዶናውያን ንጉሥ የኤትበኣልን ልጅ ኤልዛቤልን አገባ፤ ሄዶም በኣልን አገለገለ፤ ሰገደለትም። ³²በሰማርያ በሠራው በበኣል ቤተ ጣዖት ውስጥ ለበኣል መሠዊያ አቆመ። ³³አክዓብም ደግሞ የአሼራን ምሰሶ ሠራ፤ ከበፊቱ ከነበሩት ከእስራኤል ነገሥት ሁሉ ይልቅ አባታችንን የእስራኤልን አምላክ አስቈጣ። ³⁴በዘመኑም የቤቴሉ ኪኤል ኢያሪኮን ዳግመኛ ሠራ፤ መሠረትዋን በበኵር ልጁ በአቢራም ዋጋ ጣለ፤ በሮችዋንም በታናሽ ልጁ በሰጉብ ዋጋ አቆመ፤ ይህም አባታችን በነዌ ልጅ በኢያሱ በኩል እንደ ተናገረው ነበር።