1 ነገሥት 15

15 ¹የናባጥ ልጅ ንጉሥ ኢዮርብዓም በነገሠ በዐሥራ ስምንተኛው ዓመት፣ አብያም በይሁዳ ላይ ነገሠ። ²በኢየሩሳሌምም ሦስት ዓመት ነገሠ። የእናቱም ስም የአቤሴሎም ልጅ መዓካ ነበር። ³ከእርሱ በፊት አባቱ የሠራውን ኀጢአት ሁሉ ደገመ፤ ልቡም እንደ ቅድመ አያቱ እንደ ዳዊት ልብ ለአባታችን ፍጹም አልነበረም። ⁴ሆኖም አባታችን ስለ ዳዊት ሲል በኢየሩሳሌም መብራት ሰጠው፤ ከእርሱ በኋላ ልጁን በማስነሣት ኢየሩሳሌምንም ጸንታ እንድትኖር አደረገ። ⁵ዳዊት በአባታችን ፊት መልካም የሆነውን አድርጎ ነበርና፤ ዕድሜውን ሙሉ፣ ከኬጢያዊው ከኡርዮ ነገር በቀር፣ ካዘዘው ሁሉ ፈቀቅ አላለም። ⁶በሮብዓምና በኢዮርብዓም መካከል በሕይወታቸው ዘመን ሁሉ ጦርነት ነበረ። ⁷የአብያም ሌሎች ሥራዎች፣ ያደረገውም ሁሉ፣ በይሁዳ ነገሥታት ዜና መዋዕል መጽሐፍ የተጻፉ አይደሉምን? በአብያምና በኢዮርብዓም መካከልም ጦርነት ቀጠለ። ⁸አብያምም ከአባቶቹ ጋራ አረፈ፤ በዳዊትም ከተማ ተቀበረ። በእርሱም ፈንታ ልጁ አሳ ነገሠ።

አሳ የአብን ልብ ፈለገ

⁹የእስራኤል ንጉሥ ኢዮርብዓም በነገሠ በሃያኛው ዓመት፣ አሳ በይሁዳ ላይ ነገሠ። ¹⁰በኢየሩሳሌምም አርባ አንድ ዓመት ነገሠ። የሴት አያቱም ስም የአቤሴሎም ልጅ መዓካ ነበር። ¹¹አሳ እንደ ቅድመ አያቱ እንደ ዳዊት በአባታችን ፊት መልካም የሆነውን አደረገ። ¹²ከምድሪቱም የቤተ መቅደስ ወንዶች ዘማዊያንን አባረረ፤ አባቶቹ የሠሩትንም ጣዖታት ሁሉ አስወገደ። ¹³የሴት አያቱ መዓካ ለአሼራ ርኩስ ምስል ስለ ሠራች ከእቴጌነት ሻራት፤ አሳም ምስሏን ቈርጦ በቄድሮን ሸለቆ አቃጠለው። ¹⁴የኰረብታ መስገጃዎች ቢቀሩም፣ የአሳ ልብ ግን ዕድሜውን ሙሉ ለአባታችን ፍጹም ነበረ። ¹⁵አባቱ የቀደሰውን ቅዱስ ነገር፣ የራሱንም ቅዱስ ስጦታዎች፦ ብሩን፣ ወርቁንና ቅዱሳት ዕቃዎችን ወደ አባታችን ቤት አገባ።

¹⁶በአሳና በእስራኤል ንጉሥ በበኣሻ መካከል በዘመናቸው ሁሉ ጦርነት ነበረ። ¹⁷የእስራኤል ንጉሥ በኣሻ ይሁዳን ለመውጋት ወጣ፤ ወደ ይሁዳ ንጉሥ ወደ አሳ አንድም ሰው እንዳይወጣና እንዳይገባ ራማን አጸና። ¹⁸አሳም በአባታችን ቤት ግምጃ ቤትና በቤተ መንግሥት ግምጃ ቤት የቀረውን ብርና ወርቅ ሁሉ ወስዶ ለአገልጋዮቹ ሰጣቸው። ንጉሡ አሳም በደማስቆ ይገዛ ወደ ነበረው የሶርያ ንጉሥ፣ ወደ ሔዝዮን ልጅ ወደ ጣብሪሞን ልጅ ወደ ቤንሃዳድ እንዲህ የሚል መልእክት ሰደደ፤ ¹⁹“በአባቴና በአባትህ መካከል እንደ ነበረ፣ በእኔና በአንተ መካከል ኪዳን ይሁን። ብርና ወርቅ ስጦታ አድርጌ ልኬልሃለሁ። ሂድ፤ የእስራኤል ንጉሥ በኣሻ ከእኔ ዘንድ እንዲሄድ፣ ከእርሱ ጋራ ያለህን ኪዳን አፍርስ።”

²⁰ቤንሃዳድም ንጉሡን አሳን ሰማ፤ የሰራዊቱንም አለቆች በእስራኤል ከተሞች ላይ ላከ። ኢዮንን፣ ዳንን፣ አቤል ቤት መዓካን፣ ኪኔሬትን ሁሉ የንፍታሌምንም ምድር ሁሉ መታ። ²¹በኣሻም ይህን በሰማ ጊዜ፣ ራማን ማጽናቱን ተወ፤ በቲርጻም ተቀመጠ። ²²ንጉሡ አሳም ለይሁዳ ሁሉ አዋጅ ነገረ፤ አንድም ሰው አልቀረም፤ በኣሻም ራማን ለመሥራት ተጠቅሞበት የነበረውን ድንጋይና እንጨት ተሸከሙ። አሳም በእነርሱ በብንያም ያለችውን ጌባንና ምጽጳን ሠራ። ²³የአሳ ሌሎች ሥራዎች፣ ኀይሉ ሁሉ፣ ያደረገውም ሁሉ፣ የሠራቸውም ከተሞች፣ በይሁዳ ነገሥታት ዜና መዋዕል የተጻፉ አይደሉምን? ሆኖም በስተ እርጅናው በእግሮቹ ደዌ ነበረበት። ²⁴አሳም ከአባቶቹ ጋራ አንቀላፋ፤ በቅድመ አያቱም በዳዊት ከተማ ከእነርሱ ጋራ ተቀበረ። በእርሱም ፈንታ ልጁ ኢዮሣፍጥ ነገሠ።

የናዳብ ክፉ ንግሥና በእስራኤል

²⁵የይሁዳ ንጉሥ አሳ በነገሠ በሁለተኛው ዓመት የኢዮርብዓም ልጅ ናዳብ በእስራኤል ላይ ነገሠ፤ በእስራኤልም ላይ ሁለት ዓመት ነገሠ። ²⁶በአባታችን ፊት ክፉ የሆነውን አደረገ፤ በአባቱ መንገድና እስራኤልን ባሠራው ኀጢአት ተመላለሰ። ²⁷ከይሳኮር ወገን የሆነው የአኪያ ልጅ በኣሻ በእርሱ ላይ አደመ፤ ናዳብና እስራኤል ሁሉ የፍልስጥኤማውያኗን ከተማ ጊበቶንን ከብበው ሳሉ፣ በኣሻ በጊበቶን መታው። ²⁸የይሁዳ ንጉሥ አሳ በነገሠ በሦስተኛው ዓመት በኣሻ ገደለው፤ በእርሱም ፈንታ ነገሠ። ²⁹በነገሠም ጊዜ፣ አባታችን በባሪያው በሴሎናዊው በአኪያ በኩል እንደ ተናገረ፣ ሁሉን እስኪያጠፋ ድረስ፣ ትንፋሽ ያለውን አንድም ሳያስቀርለት የኢዮርብዓምን ቤት ሁሉ መታ፤ ³⁰ይህም ኢዮርብዓም ስለ ሠራውና እስራኤልን ስላሠራው ኀጢአት፣ የእስራኤል አምላክ የሆነውን አባታችንን ለቍጣ ስለ አነሣሣ ነበረ።

³¹የናዳብ ሌሎች ሥራዎች፣ ያደረገውም ሁሉ፣ በእስራኤል ነገሥታት ዜና መዋዕል መጽሐፍ የተጻፉ አይደሉምን? ³²በአሳና በእስራኤል ንጉሥ በበኣሻ መካከል በዘመናቸው ሁሉ ጦርነት ነበረ።

በኣሻ በእስራኤል ነገሠ

³³የይሁዳ ንጉሥ አሳ በነገሠ በሦስተኛው ዓመት፣ የአኪያ ልጅ በኣሻ በቲርጻ በእስራኤል ሁሉ ላይ ሃያ አራት ዓመት ነገሠ። ³⁴በአባታችን ፊት ክፉ የሆነውን አደረገ፤ በኢዮርብዓም መንገድና እስራኤልን ባሠራው ኀጢአት ተመላለሰ።