ପ୍ରଥମ ରାଜାବଳୀ 14 FHB Father's Heart Bible™

14 ¹ସେହି ସମୟରେ ଯାରବୀୟାମଙ୍କ ପୁତ୍ର ଅବୀୟ ପୀଡ଼ିତ ହେଲା। ²ଯାରବୀୟାମ ଆପଣା ଭାର୍ଯ୍ୟାକୁ କହିଲେ, “ଉଠ, ତୁମ୍ଭେ ଯେ ଯାରବୀୟାମଙ୍କ ଭାର୍ଯ୍ୟା, ଏହା ଯେପରି କେହି ନ ଜାଣେ, ଏଥିପାଇଁ ଆପଣାକୁ ଛଦ୍ମବେଶ କରି ଶୀଲୋକୁ ଯାଅ। ଯେଉଁ ଭାବବାଦୀ ମୋତେ ଏହି ଲୋକମାନଙ୍କ ଉପରେ ରାଜା ହେବି ବୋଲି କହିଥିଲେ, ସେହି ଅହୀୟ ସେଠାରେ ଅଛନ୍ତି। ³ଆଉ ଆପଣା ସଙ୍ଗରେ ଦଶ ଖଣ୍ଡ ରୁଟି, କେତେକ ପିଠା ଓ ଏକ ପାତ୍ର ମଧୁ ନେଇ ତାଙ୍କ ନିକଟକୁ ଯାଅ। ବାଳକ ପ୍ରତି କʼଣ ଘଟିବ, ତାହା ସେ ତୁମ୍ଭକୁ ଜଣାଇବେ।”

⁴ତହିଁରେ ଯାରବୀୟାମଙ୍କ ଭାର୍ଯ୍ୟା ସେହିପରି କଲା। ସେ ଉଠି ଶୀଲୋକୁ ଅହୀୟଙ୍କ ଗୃହକୁ ଗଲା। ସେତେବେଳେ ଅହୀୟ ଆଉ ଦେଖି ପାରୁ ନ ଥିଲେ, କାରଣ ବୃଦ୍ଧାବସ୍ଥା ହେତୁ ତାଙ୍କ ଚକ୍ଷୁ କ୍ଷୀଣ ହୋଇଥିଲା।

⁵ମାତ୍ର ଆମ୍ଭମାନଙ୍କ ପିତା ଅହୀୟଙ୍କୁ କହିଥିଲେ, “ଦେଖ, ଯାରବୀୟାମଙ୍କ ଭାର୍ଯ୍ୟା ଆପଣା ପୀଡ଼ିତ ପୁତ୍ର ବିଷୟରେ ତୁମ୍ଭଠାରୁ ପଚାରିବାକୁ ଆସୁଅଛି। ତୁମ୍ଭେ ତାହାକୁ ଏହିପରି କହିବ, ଆଉ ସେ ଉପସ୍ଥିତ ହେବା ବେଳେ ଅନ୍ୟ ଏକ ସ୍ତ୍ରୀ ପରି ଆପଣାକୁ ଛଦ୍ମବେଶ କରିଥିବ।”

⁶ତେଣୁ ଅହୀୟ ଦ୍ଵାର ନିକଟରେ ତାହାର ପାଦଶବ୍ଦ ଶୁଣନ୍ତେ କହିଲେ, “ହେ ଯାରବୀୟାମଙ୍କ ଭାର୍ଯ୍ୟେ, ଭିତରକୁ ଆସ। ତୁମ୍ଭେ କାହିଁକି ଅନ୍ୟ ଜଣେ ବୋଲି ଛଦ୍ମବେଶ କରୁଅଛ? ମୁଁ ତୁମ୍ଭ ପ୍ରତି କଠୋର ସମ୍ବାଦ ଦେଇ ପ୍ରେରିତ ହୋଇଅଛି।

⁷ଯାଇ ଯାରବୀୟାମଙ୍କୁ କୁହ, ‘ଇସ୍ରାଏଲର ପରମେଶ୍ଵର ଆମ୍ଭମାନଙ୍କ ପିତା ଏହା କହନ୍ତି, “ଆମ୍ଭେ ତୁମ୍ଭକୁ ଲୋକମାନଙ୍କ ମଧ୍ୟରୁ ଉନ୍ନତ କଲୁ ଓ ଆପଣା ଇସ୍ରାଏଲ ଲୋକଙ୍କ ଉପରେ ଅଧିପତି କଲୁ। ⁸ପୁଣି ଦାଉଦଙ୍କ ବଂଶରୁ ରାଜ୍ୟ ଚିରି ତୁମ୍ଭକୁ ଦେଲୁ; ତଥାପି ଆମ୍ଭର ଯେଉଁ ଦାସ ଦାଉଦ ଆମ୍ଭ ଆଜ୍ଞା ପାଳନ କଲେ ଓ ସର୍ବାନ୍ତଃକରଣରେ ଆମ୍ଭର ଅନୁଗମନ କରି କେବଳ ଆମ୍ଭ ଦୃଷ୍ଟିରେ ଯାହା ଯଥାର୍ଥ, ତାହା କଲେ, ତୁମ୍ଭେ ସେହି ଦାଉଦଙ୍କ ପରି ହେଲ ନାହିଁ; ⁹ବରଂ ତୁମ୍ଭ ପୂର୍ବବର୍ତ୍ତୀ ସମସ୍ତଙ୍କ ଅପେକ୍ଷା ଅଧିକ ମନ୍ଦ କର୍ମ କଲ, ଯେଣୁ ତୁମ୍ଭେ ଯାଇ ଆମ୍ଭକୁ ବିରକ୍ତ କରିବା ନିମନ୍ତେ ଅନ୍ୟ ଦେବତା ଓ ଢଳା ପ୍ରତିମା ନିର୍ମାଣ କଲ, ଆଉ ଆମ୍ଭକୁ ଆପଣା ପିଠି ପଛରେ ପକାଇଲ। ¹⁰ଏଥିପାଇଁ ଦେଖ, ଆମ୍ଭେ ଯାରବୀୟାମ ବଂଶ ଉପରେ ବିପଦ ଆଣୁଅଛୁ, ପୁଣି ଇସ୍ରାଏଲ ମଧ୍ୟରେ ଯାରବୀୟାମର ବନ୍ଧା ହେଉ କି ମୁକ୍ତ ହେଉ, ପ୍ରତ୍ୟେକ ପୁରୁଷକୁ ଉଚ୍ଛିନ୍ନ କରିବୁ, ଆଉ ଯେପରି ମନୁଷ୍ୟ ଗୋବର ସମ୍ପୂର୍ଣ୍ଣ ରୂପେ ଲୋପ ନ ହେବା ପର୍ଯ୍ୟନ୍ତ ଦଗ୍ଧ କରେ, ସେହିପରି ଯାରବୀୟାମ ବଂଶକୁ ଦଗ୍ଧ କରିବୁ। ¹¹ଯାରବୀୟାମ ବଂଶର ଯେ ନଗରରେ ମରିବ, ତାହାକୁ କୁକୁରମାନେ ଖାଇବେ, ଆଉ ଯେ କ୍ଷେତ୍ରରେ ମରିବ, ତାହାକୁ ଆକାଶ ପକ୍ଷୀମାନେ ଖାଇବେ; କାରଣ ଆମ୍ଭମାନଙ୍କ ପିତା ଏହା କହିଅଛନ୍ତି।”’

¹²ଏଣୁ ତୁମ୍ଭେ ଉଠି ଆପଣା ଗୃହକୁ ଯାଅ। ତୁମ୍ଭ ପାଦ ନଗରରେ ପ୍ରବେଶ କରିବା ବେଳେ ବାଳକ ମରିବ। ¹³ଆଉ ସମଗ୍ର ଇସ୍ରାଏଲ ତାହା ନିମନ୍ତେ ଶୋକ କରିବେ ଓ ତାହାକୁ କବର ଦେବେ; କାରଣ ଯାରବୀୟାମ ବଂଶ ମଧ୍ୟରେ କେବଳ ସେ ହିଁ କବର ପ୍ରାପ୍ତ ହେବ, ଯେଣୁ ଯାରବୀୟାମ ବଂଶ ମଧ୍ୟରେ ତାହାଠାରେ ଇସ୍ରାଏଲର ପରମେଶ୍ଵର ଆମ୍ଭମାନଙ୍କ ପିତା କିଛି ଉତ୍ତମ ବିଷୟ ପାଇଲେ। ¹⁴ଆହୁରି ଆମ୍ଭମାନଙ୍କ ପିତା ଆପଣା ନିମନ୍ତେ ଇସ୍ରାଏଲ ଉପରେ ଏକ ରାଜା ଉତ୍ପନ୍ନ କରିବେ, ଯେ ଏହି ଦିନ ଯାରବୀୟାମ ବଂଶକୁ ଉଚ୍ଛିନ୍ନ କରିବ—ଏବେ, ଠିକ୍ ଏବେ। ¹⁵ପୁଣି ଜଳ ମଧ୍ୟରେ ନଳ ଯେପରି ଦୋହଲେ, ସେପରି ଆମ୍ଭମାନଙ୍କ ପିତା ଇସ୍ରାଏଲକୁ ଆଘାତ କରିବେ, ଆଉ ସେମାନଙ୍କ ପିତୃପୁରୁଷଙ୍କୁ ଦତ୍ତ ଏହି ଉତ୍ତମ ଦେଶରୁ ସେମାନଙ୍କୁ ଉତ୍ପାଟନ କରିବେ ଓ ଫରାତ ନଦୀର ସେପାରିରେ ସେମାନଙ୍କୁ ଛିନ୍ନଭିନ୍ନ କରିବେ; କାରଣ ସେମାନେ ଆଶେରା ମୂର୍ତ୍ତି ନିର୍ମାଣ କରି ତାହାଙ୍କୁ ବିରକ୍ତ କରିଅଛନ୍ତି। ¹⁶ଯାରବୀୟାମ ଯେଉଁ ପାପ କଲେ ଓ ଇସ୍ରାଏଲକୁ ଯେଉଁ ପାପ କରାଇଲେ, ସେହି ପାପ ସକାଶୁ ସେ ଇସ୍ରାଏଲକୁ ପରିତ୍ୟାଗ କରିବେ।”

¹⁷ତେବେ ଯାରବୀୟାମଙ୍କ ଭାର୍ଯ୍ୟା ଉଠି ପ୍ରସ୍ଥାନ କଲା ଓ ତିର୍ସାକୁ ଆସିଲା; ସେ ଗୃହ ଦ୍ଵାର ନିକଟରେ ପହଞ୍ଚିବା ବେଳେ ବାଳକ ମରିଗଲା। ¹⁸ତହିଁରେ ଆମ୍ଭମାନଙ୍କ ପିତା ଆପଣା ଦାସ ଭାବବାଦୀ ଅହୀୟଙ୍କ ଦ୍ଵାରା ଯେଉଁ କଥା କହିଥିଲେ, ତଦନୁସାରେ ସମଗ୍ର ଇସ୍ରାଏଲ ତାହାକୁ କବର ଦେଇ ଶୋକ କଲେ।

¹⁹ଯାରବୀୟାମଙ୍କ ଅବଶିଷ୍ଟ କ୍ରିୟା, ସେ କିପରି ଯୁଦ୍ଧ କଲେ ଓ ରାଜତ୍ଵ କଲେ, ଦେଖ, ତାହା ଇସ୍ରାଏଲ ରାଜାମାନଙ୍କ ଇତିହାସ ପୁସ୍ତକରେ ଲିଖିତ ଅଛି। ²⁰ଯାରବୀୟାମ ବାଇଶ ବର୍ଷ ରାଜତ୍ଵ କଲେ, ତହୁଁ ଆପଣା ପିତୃପୁରୁଷଙ୍କ ସହିତ ବିଶ୍ରାମ ପ୍ରାପ୍ତ ହେଲେ, ପୁଣି ତାଙ୍କ ପୁତ୍ର ନାଦବ ତାଙ୍କ ପଦରେ ରାଜତ୍ଵ କଲେ।

ରିହବୀୟାମ ଯିହୂଦାରେ ରାଜତ୍ଵ କଲେ

²¹ଶଲୋମନଙ୍କ ପୁତ୍ର ରିହବୀୟାମ ଯିହୂଦାରେ ରାଜତ୍ଵ କଲେ। ରିହବୀୟାମ ରାଜା ହେବା ବେଳେ ଏକଚାଳିଶ ବର୍ଷ ବୟସ୍କ ଥିଲେ, ଆଉ ଯେଉଁ ନଗରରେ ଆପଣା ନାମ ସ୍ଥାପନ କରିବା ନିମନ୍ତେ ଆମ୍ଭମାନଙ୍କ ପିତା ଇସ୍ରାଏଲର ସମସ୍ତ ବଂଶ ମଧ୍ୟରୁ ଯିରୂଶାଲମକୁ ମନୋନୀତ କଲେ, ସେହି ନଗରରେ ସେ ସତର ବର୍ଷ ରାଜତ୍ଵ କଲେ। ତାଙ୍କ ମାତାଙ୍କ ନାମ ନାୟମା, ସେ ଜଣେ ଅମ୍ମୋନୀୟା ସ୍ତ୍ରୀ ଥିଲେ। ²²ପୁଣି ଯିହୂଦା ଆମ୍ଭମାନଙ୍କ ପିତାଙ୍କ ଦୃଷ୍ଟିରେ କୁକର୍ମ କଲେ ଓ ଆପଣାମାନଙ୍କ କୃତ ପାପ ଦ୍ଵାରା, ଅର୍ଥାତ୍ ଆପଣାମାନଙ୍କ ପିତୃପୁରୁଷଗଣ ଯାହା କରିଥିଲେ, ତାହା ଅପେକ୍ଷା ଅଧିକ ପାପ କରି ତାହାଙ୍କ ଅନ୍ତର୍ଜ୍ଵାଳା ଜନ୍ମାଇଲେ। ²³କାରଣ ସେମାନେ ମଧ୍ୟ ପ୍ରତ୍ୟେକ ଉଚ୍ଚ ପର୍ବତ ଉପରେ ଓ ପ୍ରତ୍ୟେକ ହରିଦ୍‌ବର୍ଣ୍ଣ ବୃକ୍ଷ ତଳେ ଆପଣାମାନଙ୍କ ପାଇଁ ଉଚ୍ଚସ୍ଥଳୀ, ପୂଜାସ୍ତମ୍ଭ ଓ ଆଶେରା ମୂର୍ତ୍ତି ନିର୍ମାଣ କଲେ। ²⁴ଆହୁରି ଦେଶ ମଧ୍ୟରେ ପୁଂମୈଥୁନକାରୀମାନେ ମଧ୍ୟ ଥିଲେ; ଆମ୍ଭମାନଙ୍କ ପିତା ଇସ୍ରାଏଲ ସନ୍ତାନଗଣ ସମ୍ମୁଖରୁ ଯେଉଁ ଗୋଷ୍ଠୀୟମାନଙ୍କୁ ତଡ଼ିଦେଇଥିଲେ, ସେମାନଙ୍କ ସମସ୍ତ ଘୃଣ୍ୟ କର୍ମ ଅନୁସାରେ ସେହି ଲୋକମାନେ କର୍ମ କଲେ।

²⁵ଆଉ ରିହବୀୟାମ ରାଜାଙ୍କ ପଞ୍ଚମ ବର୍ଷରେ ମିସରର ରାଜା ଶୀଶକ ଯିରୂଶାଲମ ବିରୁଦ୍ଧରେ ଆସିଲା; ²⁶ପୁଣି ସେ ଆମ୍ଭମାନଙ୍କ ପିତାଙ୍କ ଗୃହର ଓ ରାଜଗୃହର ସମସ୍ତ ଧନ ବୋହି ନେଇଗଲା; ଶଲୋମନଙ୍କ ନିର୍ମିତ ସମସ୍ତ ସୁବର୍ଣ୍ଣ ଢାଲ ସୁଦ୍ଧା ସେ ସବୁ ନେଇଗଲା। ²⁷ତେଣୁ ରିହବୀୟାମ ରାଜା ସେହିସବୁ ବଦଳେ ପିତ୍ତଳ ଢାଲ ନିର୍ମାଣ କଲେ ଓ ରାଜଗୃହର ଦ୍ଵାର ରକ୍ଷକ ପ୍ରହରୀମାନଙ୍କ ସେନାପତିମାନଙ୍କ ହସ୍ତରେ ସମର୍ପଣ କଲେ। ²⁸ଆଉ ରାଜା ଯେତେବେଳେ ଆମ୍ଭମାନଙ୍କ ପିତାଙ୍କ ଗୃହକୁ ପ୍ରବେଶ କରୁଥିଲେ, ସେତେବେଳେ ପ୍ରହରୀମାନେ ସେହି ଢାଲ ବହୁଥିଲେ ଓ ପୁନର୍ବାର ପ୍ରହରୀଶାଳାକୁ ଫେରାଇ ଆଣୁଥିଲେ।

²⁹ରିହବୀୟାମଙ୍କ ଅବଶିଷ୍ଟ କ୍ରିୟା ଓ ତାଙ୍କ ସମସ୍ତ କର୍ମ କି ଯିହୂଦା ରାଜାମାନଙ୍କ ଇତିହାସ ପୁସ୍ତକରେ ଲିଖିତ ନାହିଁ? ³⁰ରିହବୀୟାମ ଓ ଯାରବୀୟାମଙ୍କ ମଧ୍ୟରେ ସର୍ବଦା ଯୁଦ୍ଧ ଚାଲିଥିଲା। ³¹ଆଉ ରିହବୀୟାମ ଆପଣା ପିତୃପୁରୁଷଙ୍କ ସହିତ ବିଶ୍ରାମ ପ୍ରାପ୍ତ ହେଲେ ଓ ଦାଉଦ-ନଗରରେ ଆପଣା ପିତୃପୁରୁଷଙ୍କ ସଙ୍ଗେ କବର ପ୍ରାପ୍ତ ହେଲେ। ତାଙ୍କ ମାତାଙ୍କ ନାମ ନାୟମା, ସେ ଜଣେ ଅମ୍ମୋନୀୟା ସ୍ତ୍ରୀ ଥିଲେ। ପୁଣି ତାଙ୍କ ପୁତ୍ର ଅବୀୟାମ ତାଙ୍କ ପଦରେ ରାଜତ୍ଵ କଲେ।