1 Wungnaobing 14

14 ¹Atam chitharan Jeroboamwui nao Abijahna kazāhaowa. ²Jeroboamna awui preiva̱li hānga, "Ngakarthuilu; khipānakha nana Jeroboamwui preiva̱na da mathei khavai nakhalatta azak ngacheikhuilaga Shilohli vālu. Marān Ahijah apam chili leida lei; ana ili yur hiwuitungli awunga sāra da hāngkahaina. ³Khamui tharā, khamui ahang kaikha, kala khuira̱ ham akha khuiphungda ali vālu. Nao chili khi shoknikhala da ana nali hāngra."

⁴Jeroboamwui preiva̱na chithāda sāda Shilohli Ahijahwui shimli vāhaowa. Ahijah a rarkahaiwui vang amik ngazanhaida matheirarthuwa.

⁵Kha ithumwui Avāna Ahijahli hāngkahaina, "Jeroboamwui preiva̱na awui kagazā naowui vang ngahānkhavai rāli. Ali hi hānglu; ana rā tharan a preiva̱ khangatei akha thāda azak ngacheihaira."

⁶Ahijahna khāmongli awui pheikhon shā tharan, ana hānga, "Jeroboamwui preiva̱, zanglu. Khi sāda mi khangatei akha thāda sākhaningkhala? Ina nali zakkashi pao eina chihovā kahaina.

⁷Vālu, Jeroboamli hānglu, 'Ithumwui Avā, Israelwui Varena hithāda hānga: "Ina nali mibingwui eina khāngkhuilaga iwui yur Israelli khangama sāngasakhaira. ⁸Ina wungram chi Davidwui shimkhurwui eina serkhāhailaga nali mi. Chithālala iwui ningkhami mayonda ningtonglak eina ili shurda iwui mikyanli khamashung ot chimāng kasā iwui rao David thāda nava maleimana. ⁹Nava na sāngngarānda leikasābing saikorawuitungli lāngmeida makaphā sai. Nana vāda vare khangatei kala heikakhui ama̱bing sākhuilaga ili malungvātngasaka, kala ili na khanukshongla horsanghaira. ¹⁰Chiwui vang eina ina Jeroboamwui shimkhurli kalākashi rāngasakra. Ina Israelli khalei Jeroboamshi raonao kala ningkhān kahai mayarnao saikora katathaora, kala mina pai riktā thāda Jeroboamwui shimkhur shimānchao khavai riktāra. ¹¹Jeroboamshi keinungli kathebing chi fana phazāra, kala khararli kathebing chi kazingramwui vānaobingna phazāra. Kaja ithumwui Avāna hāngkahaina."'

¹²Ngakarthuilu, shimli ungulu. Nawui phei keinungli vākazang tharan, nao chi thira. ¹³Israel saikorana ali chapngachāda chifara. Jeroboamwui shimkhurwui alungli amāng chikhurli vāshungra, kaja ithumwui Avā, Israelwui Varena Jeroboamwui shimkhurli awuili khamathā ot akha samphanga. ¹⁴Kala ithumwui Avāna akhalattawui vang Israelwuitungli awunga akha phākhuira; china chithanghon aruichang tangda Jeroboamwui shimkhur katathaora. ¹⁵Tara̱li titi nganuka thāda ithumwui Avāna Israelli shaora; athumwui avā ngarāli mikahai ngalei khamathā hiwui eina athumli phurkashokra, kala Euphrates kong kānda athumli chaiyāngmihaora, khikhalajila athumna sākahai Asherim china ali malungvātngasakhaowa. ¹⁶Jeroboamna morei sāda Israelli morei sākhangasakwui vang eina ana Israelli horhaora."

¹⁷Jeroboamwui preiva̱na ngakarthuida thuilaga Tirzahli vāhaowa. Ana shim khāmongpheili vākashung tharan, nao chi thihaowa. ¹⁸Ithumwui Avāna awui rao marān Ahijahwui mangāli hānghaikasā athishurda, Israel saikorana ali chifahaida chapngachai.

¹⁹Jeroboamwui kasā otsakbing kateibing, ana kathāda rai ngarar kala munga kaji, Israel Awungabingwui Thotrinchān Lairikli kapiserhaida lei. ²⁰Jeroboamna zingkum maga̱da khani munga; chiwui thili avāva̱ ngarāli ngasoda thihaowa, kala anaomayara Nadabna awui mahut thuimunga.

Rehoboamna Judahli munga

²¹Solomonwui nao Rehoboamna Judahli mung ra̱katonga. Ana zingkum hangmatida akha kākahai tharan mungphoka, kala Jerusalemli zingkum tharāda shini munga. Jerusalem chi ithumwui Avāna awui ming haihaikhavai Israelwui shang saikorawui alungli hākhui kahai keinungna. Awui ava̱va̱ chi Ammonlā preiva̱ Naamah hoi. ²²Judahna ithumwui Avāwui miktāli makaphā sai, avāva̱ ngarāna sāhaikasā saikorali reimeida athumna morei sākahai eina ali yuikashi mathuk ngasaka. ²³Athumnala kaphungton kachiva̱li kala matekchim kahai thingphei kachiva̱li themlāk vang kajuipam, lungshom, kala Asherim sakai. ²⁴Ngalei chili khayora mayarnaobingla leisai. Ithumwui Avāna Israelwui mangāli kashamshok kahai yurbingwui ningkakachai ot saikora mibingna sai.

²⁵Awunga Rehoboamna mungda kaphangā kumli, Egypt awunga Shishakna Jerusalem chili rāngarara. ²⁶Ithumwui Avāwui shimli khalei lan kala awungawui shimli khalei lan saikora pongkorthuihaowa; Solomonna sākahai sinā chāngvei saikorala khuithuihaowa. ²⁷Chiwui pamli Awunga Rehoboamna chibingwui mahut shinsangkhavai pithraiwui chāngvei sākhuilaga awungawui shim khāmong yangmi shantribingwui raithānabingwui pāngli horsangmi. ²⁸Awungana ithumwui Avāwui shimli vāzang kachida shantribingna chāngvei chi phungda, chiwui thili khamayonbing shim chili khuiungluishita.

²⁹Rehoboamwui kasā khavā, kala ana kasāsā saikora, Judah Awungabingwui Thotrinchān Lairikli makapiserhaimala? ³⁰Rehoboam eina Jeroboamwui thotli rai sangarokchinga. ³¹Rehoboamna avāva̱ ngarāli ngasoda thihaoda, athumla ngasoda Davidwui keinungli chifahaowa. Ava̱va̱li Naamah hoi, Ammonlāna. Kala anaomayara Abijamna awui mahut thuimunga.