ናብ ቤቴል ምምላስ

ናብ ቤቴል ተፀዊዑ፥ ያእቆብ ነቶም ቤተ ሰቡ ገና ዝሓዝዎም ጓኖት ኣማልኽቲ ቀበሮም። ኣቦና ድማ ስም እስራኤል ኣረጋገፀ። ድሕሪኡ ኸስራ ተኸመረ፦ መጕዚቱ ሞተት፥ ራሄል ንብንያም እናሰመየት ሞተት፥ ሮቤል ዓራት ኣቦኡ ኣርከሰ፥ ይስሓቅ ድማ ተቐበረ።

ምዕራፍ 35።

ሽዑ ኣቦና ንያእቆብ ከምዙይ በሎ፦ “ተሲእካ ናብ ቤቴል ደይብ፤ ኣብኡ ኸዓ ተቐመጥ። ነቲ ካብ ሓውካ ኤሳው ክትሃድም እንተለኻ ዝተገለፀልካ ድማ ኣብኡ መሰውኢ ስራሕለይ።”

ያእቆብ ድማ ንቤተ ሰቡን ንዅሎም እቶም ምስኡ ዝነበሩን ከምዙይ በሎም፦ “ነቶም ኣብ ማእኸልኩም ዘለዉ ጓኖት ኣማልኽቲ ኣርሕቑ፤ ተነፃሁ፤ ክዳውንትኹምውን ቀይሩ። ናብ ቤቴል ንደይብ። ነቲ ብመዓልቲ ፀበባይ ዝመለሰለይ፥ ኣብ ዝኸድክዎ ዘበለ ድማ ምሳይ ዝነበረ ኣቦና ኣብኡ መሰውኢ ክሰርሕ እየ።”

ንያእቆብ ድማ ነቶም ኣብ ኢዶም ዝነበሩ ዅሎም ጓኖት ኣማልኽትን ኣብ ኣእዛኖም ዝነበረ ኵትሻን ሃብዎ፤ ንሱ ኸዓ ኣብ ትሕቲ እታ ኣብ ሴኬም ዘላ ዓባይ ኦም ሓብኦም። ተጓዒዞም ድማ ከዱ፤ ራዕዲ ኣቦና ኸዓ ነተን ኣብ ዙርያኦም ዝነበራ ኸተማታት ስለ ዝወደቐን፥ ንደቂ ያእቆብ ዝሰዓበ ሓደኳ ኣይነበረን። ያእቆብ ድማ ንሱን ምስኡ ዝነበሩ ዅሎም ህዝብን፥ ናብታ ኣብ ምድሪ ከነዓን እትርከብ ሎዛ ማለት ቤቴል መፁ። ኣብኡ ድማ መሰውኢ ሰርሐ፤ ካብ ሓዉ ኽሃድም እንተሎ ኣብኡ ንያእቆብ ተገሊፁሉ ስለ ዝነበረ፥ ነቲ ቦታ ኤልቤቴል ማለት ቤት ኣቦና ኢሉ ሰመዮ። ዲቦራ መጕዚት ርብቃ ድማ ሞተት፤ ኣብ ታሕቲ ቤቴል ኣብ ትሕቲ እታ ዓባይ ኦም ከዓ ተቐበረት፤ ስማ ድማ ኣሎንባኩት ማለት ኦም ብኽያት ተባህለ።

ያእቆብ ካብ መስጴጦምያ ሶርያ ምስ መፀ፥ ኣቦና መሊሱ ንያእቆብ ተገለፀሉ፤ ባረኾውን።

ኣቦና ድማ ከምዙይ በሎ፦ “ስምካ ያእቆብ እዩ፤ ግና ደጊም ያእቆብ ኣይክትበሃልን ኢኻ፤ ስምካ እስራኤል እዩ።” እስራኤል ኢሉ ድማ ሰመዮ። ኣቦና ድማ ከምዙይ በሎ፦ “ኣነ ኤልሻዳይ፥ ኵሉ ዝኽእል ኣቦኻ እየ። ፍረ፤ ተባዛሕ። ህዝብን ኣኼባ ህዝብታትን ካባኻ ክወፁ እዮም፤ ነገስታት ከዓ ካብ ሕቘኻ ክወፁ እዮም። ነታ ንኣብርሃምን ንይስሓቅን ዝሃብክዋ ምድሪ፥ ንኣኻ ክህበካ እየ፤ ድሕሬኻ ንዘርእኻ ድማ ክህቦ እየ።”

ኣቦና ድማ ኣብቲ ምስኡ ዝተዛረበሉ ቦታ ኻብኡ ደየበ። ያእቆብ ድማ ኣብቲ ኣቦና ምስኡ ዝተዛረበሉ ቦታ ሓወልቲ ተኸለ፤ ሓወልቲ እምኒ ድማ ነበረ፤ ኣብ ልዕሊኡ ኸዓ መስዋእቲ መስተ ኣፍሰሰ፤ ኣብ ልዕሊኡ ድማ ዘይቲ ኣፍሰሰ። ያእቆብ ድማ ነቲ ኣቦና ምስኡ ዝተዛረበሉ ቦታ ቤቴል ኢሉ ሰመዮ።

ናይ መወዳእታ ወዲ ራሄል

ካብ ቤቴል ድማ ተጓዒዞም ከዱ፤ ናብ ኤፍራታ ኽበፅሑ ቑሩብ ምስ ተረፎም ከዓ፥ ራሄል ሕርሲ ሓዛ፤ ሕርሳ ድማ ብርቱዕ ነበረ። ብርቱዕ ሕርሲ ኣብ ዝሓዛ ጊዜ ኸዓ፥ እታ መሕረሲት “እዝውን ወዲ እዩ እሞ፥ ኣይትፍርሒ” በለታ።

ነፍሳ ኽትወፅእ እንተላ፥ ንሳ ትመውት ስለ ዝነበረት፥ ቤንኦኒ ማለት ወዲ ሓዘነይ ኢላ ሰመየቶ፤ ኣቦኡ ግና ብንያም ማለት ወዲ የማን ኢሉ ሰመዮ። ^a ራሄል ድማ ሞተት፤ ኣብ መንገዲ ኤፍራታ ማለት ቤተ ልሔም ከዓ ተቐበረት። ያእቆብ ድማ ኣብ መቓብራ ሓወልቲ ተኸለ፤ ንሱ ኽሳዕ ሎሚ ሓወልቲ መቓብር ራሄል እዩ።

እስራኤል ድማ ተጓዒዙ ኸደ፤ ኣብ ስግር ሚግዳልዔደር ማለት ግንቢ መጓሰ ኸዓ ሰፈረ። እስራኤል ኣብታ ምድሪ እቲኣ ኣብ ዝነበረሉ ጊዜ፥ ሮቤል ከይዱ ምስ ባላ ሰበይቲ ወሰን ኣቦኡ ደቀሰ፤ እስራኤልውን ሰምዐ። ያእቆብ ዓሰርተው ክልተ ደቂ ነበርዎ።

ደቂ ልያ ድማ፦ ሮቤል በዅሪ ያእቆብ፥ ስምኦን፥ ሌዊ፥ ይሁዳ፥ ይሳኮር፥ ዛብሎን እዮም። ደቂ ራሄል ድማ፦ ዮሴፍን ብንያምን እዮም። ደቂ ባላ ኣገልጋሊት ራሄል ድማ፦ ዳንን ንፍታሌምን እዮም። ደቂ ዘለፋ ኣገልጋሊት ልያ ድማ፦ ጋድን ኣሴርን እዮም። እዚኣቶም ደቂ ያእቆብ፥ ኣብ መስጴጦምያ ሶርያ ዝተወለዱሉ እዮም።

ያእቆብ ድማ ናብ ኣቦኡ ይስሓቅ፥ ናብ መምሬ፥ ናብ ቂርያትኣርባቅ ማለት ኬብሮን፥ ናብታ ኣብርሃምን ይስሓቅን ዝተቐመጡላ መፀ።

ይስሓቅ ድማ ሚእትን ሰማንያን ዓመት ነበረ። ይስሓቅ ድማ ኣሪጉ ዕድመ ፀጊቡ ነፍሱ ወፀት፤ ሞተ፤ ናብ ወገናቱ ኸዓ ተፀመረ። ደቁ ኤሳውን ያእቆብን ድማ ቐበርዎ።