ሕዝቅያስ ንይሁዳ ናብ ኣቦና ይመልስ

ሕዝቅያስ ካብ ኵሎም ነገስታት ይሁዳ ዝበለፀ ብኣቦና ኣመነ፥ ነቲ ናይ ሙሴ ነሃስ ተመን እውን ሰባበሮ። ኮይኑ ግና ኣሶር ነተን ዝተዓረዳ ከተማታት ወሰደን። ኣብቲ ቀፅሪ ኸዓ ሓደ ሹመኛ ብዕብራይስጢ፥ ኮነ ኢሉ ንኢየሩሳሌም ኣላገፀ፦ ናይ ሓደ ህዝቢ ኣምላኽ ንሓደ እኳ ኣየድሓነን፥ ናትኩምከ ስለምንታይ የድሕን? እቲ ህዝቢ ሓንቲ እኳ ኣይበለን።

ምዕራፍ 18።

ኣብ መበል ሳልሳይ ዓመት ሆሴዕ ወዲ ኤላ ንጉስ እስራኤል፥ ሕዝቅያስ ወዲ ኣካዝ ኣብ ይሁዳ ነገሰ። ክነግስ እንተሎ ወዲ ዕስራን ሓሙሽተን ዓመት ነበረ፤ ኣብ ኢየሩሳሌም ድማ ዕስራን ትሽዓተን ዓመት ገዝአ። ስም ኣዲኡ ኣቢያ ጓል ዘካርያስ ነበረ። ከምቲ ኣቦኡ ዳዊት ዝገበሮ፥ ኣብ ቅድሚ ኣቦና ቅኑዕ ዝኾነ ገበረ። ነቲ በረኽቲ ኣልገሰ፤ ነቲ ሓወልቲ ጣዖት ድማ ሰበሮ፤ ነቲ ኣስታሮትን ቘረፆ፤ ነቲ ሙሴ ዝገበሮ ነሃስ ተመን ከዓ ሰባበሮ፤ ክሳዕ እታ መዓልቲ እቲኣ ደቂ እስራኤል ዕጣን የዐጥኑሉ ነይሮም እሞ፥ ንሑሽታን ኢሎም ከዓ ይፅውዕዎ ነበሩ። ^a ብኣቦና፥ ብኣምላኽ እስራኤል ኣመነ፤ ካብ ኵሎም ነገስታት ይሁዳ ድማ፥ ድሕሪኡ ይኹን ቅድሚኡ ኸምኡ ዝበለ ኣይነበረን። ምስ ኣቦና ተፀግዐ፤ ካብ ምስዓብ ድማ ኣየቋረፀን፤ ነቲ ኣቦና ንሙሴ ዝኣዘዞ ትእዛዛት ሓለወ። ኣቦና ምስኡ ስለ ዝነበረ ኸዓ፥ ኣብ ዝኸዶ ዘበለ ዅሉ ስራሑ ይቕንዖ ነበረ። ኣብ ልዕሊ ንጉስ ኣሶር ዓመፀ፤ ከገልግሎውን ኣበየ። ንፍልስጥኤማውያን ክሳዕ ጋዛ ምስ ወሰና፥ ካብ ግንቢ ዘብዐኛ ክሳዕ ዝተዓረደት ከተማ ወቕዖም።

ኣብ መበል ራብዓይ ዓመት ንጉስ ሕዝቅያስ፥ ንሱ ኸዓ መበል ሻውዓይ ዓመት ሆሴዕ ወዲ ኤላ ንጉስ እስራኤል፥ ሳልማናሶር ንጉስ ኣሶር ናብ ሰማርያ ደየበ፤ ከበባውን። ድሕሪ ሰለስተ ዓመት ድማ ሓዝዋ፤ ኣብ መበል ሻድሻይ ዓመት ሕዝቅያስ፥ ንሱ ኸዓ መበል ታሽዓይ ዓመት ሆሴዕ ንጉስ እስራኤል፥ ሰማርያ ተታሕዘት። ንጉስ ኣሶር ድማ ንእስራኤል ማሪኹ ናብ ኣሶር ወሰዶም፤ ኣብ ሓላሕን ኣብ ሩባ ሓቦር ናይ ጎዛንን ኣብ ከተማታት ሜዶንን ኣቐመጦም፤ ድምፂ ኣቦና ስለ ዘይሰምዑ፥ ኺዳኑውን ስለ ዘፍረሱ፥ ነቲ ባርያ ኣቦና ሙሴ ዝኣዘዞ ዅሉ ኣይሰምዑን ኣይገበሩዎንን።

ኣሶር ናብ ይሁዳ ይመፅእ

ኣብ መበል ዓሰርተ ኣርባዕተ ዓመት ንጉስ ሕዝቅያስ፥ ሰናክሬም ንጉስ ኣሶር ናብ ኵለን ዝተዓረዳ ከተማታት ይሁዳ ተዋግአ፤ ሓዘንውን። ሽዑ ሕዝቅያስ ንጉስ ይሁዳ ናብ ንጉስ ኣሶር ናብ ላኪሶ ልኢኹ “በዲለ ኣለኹ፤ ካባይ ተመለስ፤ እቲ እትፅዕነኒ ዅሉ ኸዓ ክፅወር እየ” በሎ። ንጉስ ኣሶር ድማ ኣብ ሕዝቅያስ ንጉስ ይሁዳ ዓሰርተ ሓደ ሽሕ ኪሎ ግራም ብሩርን ሽሕ ኪሎ ግራም ወርቅን ፀዐነ። ሕዝቅያስ ድማ ነቲ ኣብ ቤት ኣቦናን ኣብ መዛግብ ቤተ መንግስትን ዝተረኽበ ብሩር ዅሉ ሃቦ። በቲ ጊዜ እቱይ ሕዝቅያስ ነቲ ደገታት ቤተ መቕደስ ኣቦናን ነቲ ባዕሉ ሕዝቅያስ ንጉስ ይሁዳ ዝለበጦ ልዳውትን ወርቂ ቀንጠጠ፤ ንንጉስ ኣሶር ድማ ሃቦ።

ንጉስ ኣሶር ድማ ንዓብዪ ሓለቓ ሰራዊቱን ንሓለቓ ሹማምንቱን ንሓለቓ ጦሩን ምስ ብዙሕ ሰራዊት ካብ ላኪሶ ናብ ንጉስ ሕዝቅያስ ናብ ኢየሩሳሌም ሰደዶም። ናብ ኢየሩሳሌም ደዪቦም ከዓ፥ ኣብ ጥቓ መትረብ እቲ ላዕለዋይ ቓላይ፥ ኣብ መንገዲ ግራት ሓፃቢ ደው በሉ። ንንጉስ ድማ ፀውዕዎ፤ ኤልያቄም ወዲ ሒልቅያስ፥ ሓላዊ ቤተ መንግስቲ፥ ምስ ሸብና ፀሓፊን ዮኣ ወዲ ኣሳፍ ተሓዚ መዝገብን ድማ ናባቶም ወፁ። ሓለቓ ጦር ድማ ከምዙይ በሎም፦ “ንሕዝቅያስ ከምዙይ በልዎ፦ እቲ ዓብዪ ንጉስ፥ ንጉስ ኣሶር ከምዙይ ይብል ኣሎ፦ እዝ እትኣማመኖ ዘለኻ ምትእምማን እንታይ እዩ? ‘ንውግእ ብልሓትን ሓይልን ኣለኒ’ ትብል ኢኻ፥ እዙይ ግና ዘረባ ጥራሕ እዩ። ሕዚ ኸ፥ ብመን ኢኻ ተኣሚንካ ዝዓመፅካኒ? እንሆ፥ ነታ ዝተሰብረት ብረት ሻምብቆ፥ ንግብፂ ተኣሚንካ ኣለኻ፤ ንሳ ኸዓ ነቲ ዝተመርኰሳ ዅሉ፥ ኢዱ ወጊኣ ትሰብሮ። ፈርዖን ንጉስ ግብፂ ድማ ነቶም ዝተኣመንዎ ዅሎም ከምኡ እዩ። እንተ ‘ብእግዚኣብሄር ኣምላኽና ተኣሚንና ኣለና’ እንተ ትብሉ ኸዓ፥ ንሱዶ እቲ ሕዝቅያስ በረኽቱን መሰውኢታቱን ዘልገሰ፥ ንይሁዳን ንኢየሩሳሌም ድማ ‘ኣብ ቅድሚ እዝ መሰውኢ እዙይ ኣብ ኢየሩሳሌም ስገዱ’ ዝበሎም ኣይኮነን? ሕዚ ድማ ምስ ጐይታይ ንጉስ ኣሶር ተዋራረድ፤ ፈረሰኛታት ከተደይበሎም እንተ ኽኢልካ፥ ክልተ ሽሕ ኣፍራስ ክህበካ እየ። ንግብፂ ብሰረገላታትን ብፈረሰኛታትን ተኣሚንካ ኸለኻ፥ ካብ ኣናእሽቱ ባሮት ጐይታይ ንሓደ ሓለቓ ኸመይ ኢልካ ንድሕሪት ክትመልሶ ትኽእል? ሕዚ ኸዓ፥ እዛ ቦታ እዚኣ ኸጥፍኣ ብዘይ እግዚኣብሄርዶ ደየብኩ? እግዚኣብሄር ‘ናብዛ ምድሪ እዚኣ ደይብካ ኣጥፍኣ’ ኢሉ ነጊሩኒ እዩ።”

ኤልያቄም ወዲ ሒልቅያስን ሸብናን ዮኣን ድማ ነቲ ሓለቓ ጦር፦ “በጃኻ፥ ንሕና ባሮትካ ንርድኦ ኢና እሞ፥ ብቋንቋ ኣራማይስጢ ተዛረበና። እቶም ኣብ መንደቕ ዘለዉ ህዝቢ እናሰምዑ፥ ብቋንቋ ዕብራይስጢ ኣይትዛረብ” በልዎ።

ሓለቓ ጦር ድማ “ጐይታይ ነዝ ዘረባ እዙይ ናብ ጐይታኻን ናባኻን ጥራሕ ክዛረብ ድዩ ለኣኸኒ? ነቶም ኣብ መንደቕ ዘለዉ፥ ምሳኻትኩም ፀፃኦም ክበልዑን ሽንቶም ክሰትዩን ዘለዎም ሰባትዶ ኣይኮነን?” ኢሉ መለሰ።

ሽዑ ሓለቓ ጦር ደው ኢሉ፥ ብቋንቋ ዕብራይስጢ ዓው ኢሉ ጨደረ፦ “ናይቲ ዓብዪ ንጉስ፥ ናይ ንጉስ ኣሶር ቃል ስምዑ! ንጉስ ከምዙይ ይብል ኣሎ፦ ሕዝቅያስ ኣይተታልልኩም፤ ካብ ኢዱ ኼድሕነኩም ኣይክእልን እዩ እሞ። ሕዝቅያስ፥ ‘እግዚኣብሄር ብርግፅ ከድሕነና እዩ፤ እዛ ኸተማ እዚኣ ኣብ ኢድ ንጉስ ኣሶር ኣይትወድቕን እያ’ እናበለ፥ ብእግዚኣብሄር ኣየተኣምንኩም። ንሕዝቅያስ ኣይትስምዕዎ። ንጉስ ኣሶር ከምዙይ ይብል ኣሎ፦ ምሳይ ተዓረቑ፥ ናባይ ድማ ውፅኡ፤ ነፍሲ ወከፍኩም ከዓ ካብ ወይኑን ካብ በለሱን ክበልዕ፥ ካብ ዔላኡውን ማይ ክሰቲ እዩ፤ ከምታ ምድሪ ዓዲኹም ናብ እትመስል ምድሪ፥ ምድሪ እኽልን ሓዱሽ ወይንን፥ ምድሪ እንጀራን ኣታኽልቲ ወይንን፥ ምድሪ ኦም ኣውሊዕን መዓርን ናብ ዝኾነት ምድሪ ኽሳዕ ዝወስደኩም፤ ምእንቲ ኽትነብሩ እምበር ከይትሞቱ። ‘እግዚኣብሄር ከድሕነና እዩ’ እናበለ የታልለኩም ኣሎ እሞ፥ ንሕዝቅያስ ኣይትስምዕዎ። ካብ ኣማልኽቲ እዞም ኣህዛብ፥ ሓደ እኳ ንሃገሩ ኻብ ኢድ ንጉስ ኣሶር ኣድሒኑዶ? ኣማልኽቲ ሃማትን ኣርጳድንከ ኣበይ ኣለዉ? ኣማልኽቲ ሴፈርዋይምን ሄናን ዒዋንከ ኣበይ ኣለዉ? ንሰማርያዶ ኻብ ኢደይ ኣድሒኖምዋ? ካብ ኣማልኽቲ እዘን ኵለን ሃገራት፥ ንሃገሩ ኻብ ኢደይ ዘድሐነ መን እዩ፥ እግዚኣብሄር ንኢየሩሳሌም ካብ ኢደይ ከድሕን?”

እቲ ህዝቢ ግና ስቕ በሉ፤ እቲ ንጉስ “ኣይትመልስሉ” ኢሉ ስለ ዝኣዘዘ፥ ቃል እኳ ኣይመለሱሉን። ኤልያቄም ወዲ ሒልቅያስ፥ ሓላዊ ቤተ መንግስቲ፥ ሸብና ፀሓፊን ዮኣ ወዲ ኣሳፍ ተሓዚ መዝገብን ድማ ክዳውንቶም ቀዲዶም ናብ ሕዝቅያስ መፁ፤ ዘረባ ሓለቓ ጦር ድማ ነገርዎ።