Kichame Kot Koletut
Ye kiwendi ole mi Kwanda, king'eet Jeso eng' amisyet, korategei toweet, ak kouun keelyegap kasubikyik, kobooto keelyek che labatugei ak keelyek che ng'wektoe ineendet. Kigoochi Judas lagat, ak kimanda Judas koba kemeut. Ne kibagaakta ko chamyet.
13 1Ago kotom igoortap Sikuot, ki ngen Jeso kole kagonyo sait ne komanda ng'wony ni kowo ole mi Kwanda. Ki kachame pichooto chechiik che mi ng'wony, ak kocham icheek kot koletut. 2Ye kita koamisyei lagat, kiga koinde Diabolosindet eng' muguleldap Judas ne weeriitap Simion Iskaryot kabwaatet ne ng'wektoe Jeso. 3Ki ngen Jeso kole kagogoito Kwanda tuguuk tugul eng' eunekyik, ak kole ki ponu ineendet ole mi ineendet ak koweekyigei ole mi ineendet, 4kong'eet eng' amisyet, ak koisto ngoryennyi ne saang', ak konam toweet, ak korategei choget. 5Yeityo koroong'ji peek karait, ak kotoi koun keelyegap kasubik, ak koyaam icheek eng' toweet ne ki korategei. 6Konyoonji Simion Petero, ne koleenji, “Kiptaiyat, iun keelyekyuk?”
7Kowolji Jeso koleenji, “Moinai nguno kiy ne ayae, ago iguiyo letuut.”
8Kole Petero, “Ma iune keelyekyuk kot koigeny.” Kowol Jeso, “Ngot ma auunin, ko matinye kebeberta kobooto anee.”
9Koleenji Simion Petero, “Kiptaiyat, ma keelyekyuk kityo, ago kobooto eunekyuk ak metinnyu!”
10Koleenji Jeso, “Chiito ne kagiuunegei komachei kityo koun keelyekyik—kotiliilit komugul. Otiliilit okweek, ago ma tugul.”
11Kingen ne ng'wektoe ineendet; nooto anyun si komwa kole, “Ma otiliilit tugul.”
12Kingo kagoun keelyekwak, ak kolaach ngoryennyi, kotep ng'wony kogeny, ak koleenji icheek, “Oguiye kiy ne kaayaiwok? 13Oguure anee Kaneetindet ak Kiptaiyat, ak kaimwa komyee, amu anee nooto. 14Kot ngot aun anee, Kiptaiyeng'wong' ak Kaneetindeng'wong', keelyekwok, ko onyool okweek ouunegei keelyekwok. 15Amu kaagoochwok kaboorunet, si oyae ko uu ye kaayaiwok. 16Amwaiwok iman, iman, ale, ma siirei otwogindet kiptaiyandennyi, ama siirei ne kiyooktoi ineendet ne ki iyook ineendet. 17Ngot ongen tuguuchu, oberuuran ngot oyae.
Ineendet ne ki Amei Magatinyu
18“Ma amwae okweek tugul—angen chooto kaalewen. Ago kanyool kosulda siruutyet, keele, ‘Ineendet ne amei magatinyu kagong'eetyi kwaryannyi anee.’ 19Amwaiwok nguno, kotom koyaak, si ye kagoyaak, oyan ale ANEE NE MII. a a v19 “ANEE NE MII” ko uu ye ki inoiyanegei Kwandanyo kainennyi Musa eng' keetit ne ki belbeele maat. Mwaetap Jeso ko getugul kainet ne po Kamuktaindet ne imwachigei ineegei—komwae nguno kasubik ko uu kaanisyet ne po iyanet, kotom koit ng'wekto. 20Amwaiwok iman, iman, ale, ineendet ne taachei ne ayoogu ko kataacha, ak ineendet ne taachei anee ko kataachei ne ki iyookwo.”
21Kingo kagomwa Jeso ng'aleechu, koiimgei muguleldo, ak kibaoryan, kole, “Amwaiwok iman, iman, ale, ng'wektoo age eng' okweek.”
22Kigeeregei kasubik, koiimgei konai ne komwae eng' icheek. 23Ki mi age eng' kasubikyik, ineendet ne kichame Jeso, ne ki kotebyei kobeny Jeso. 24Koboorchi anyun Simion Petero euut chiichooto, si koteebe ne komwae Jeso. 25Kotiegei tiibiigap Jeso, ak koteebe ineendet, “Kiptaiyat, ng'oo nooto?”
26Kowol Jeso, “Ineendet ne agoochi magatyat ni, ye kaaburburtoi.” Yeityo koburburtoi magatyat, ak kogoochi Judas ne weeriitap Simion Iskaryot. 27Kingo konam Judas magatyat, kochut Setani ineendet. Koleenji anyun Jeso, “Yai eng' yooto kiy ne iyae.”
28Ago mami age eng' chooto kotebyei eng' amisyet ne kiguiyo amu nee ne komwachi ineendet ng'aleechu. 29Amu ki tinyei Judas lolet, ki ibwaat alak kole komwae Jeso, ‘Aal kiy ne kimache eng' igoorto,’ anan, ‘Igoochi poorto kiy age.’ 30Kingo konam Judas magatyat, komanda saang'. Ak ki po kemeut.
Ochamegei
31Kingo komanda Judas, kole Jeso, “Kagitoroore nguno Weeriitap chii, ak kagitoroore Abba eng' ineendet. 32Ngot kagitoroore Abba eng' ineendet, ko itoroori Abba agine Weeriit eng' ineegei, ak kotoroor ineendet eng' yooto. 33Lagok che achame, ta ami kobootok kitigin. Ocheeng'o anee, ak ko uu ye ki amwachi laitorinigap Yahudik, ou nooto amwaiwok nguno: ole wendi, ko momuuchi obwa. 34Agoochwok ng'atuutyet ne leel: ochamyegei. Ko uu ye kaachamwok, ou nooto onyool ochamyegei. 35Eng' nooto konai piik tugul kole okweek kasubikyuk, ngot ochamyegei.”
36Koleenji Simion Petero, “Kiptaiyat, iwendi ano?” Kowol Jeso, “Ole wendi, ko momuuchi isubwo nguno, ago isubwo letuut.”
37Koleenji Petero, “Kiptaiyat, amu nee ne momuuchi asubun nguno? Akonech saboondanyu agobo inyee.”
38Kowol Jeso, “Ikonech saboondang'ung' agobo anee? Amwaun iman, iman, ale: ma koote kipsoiywet agoi ieesyoa anee konyil somok.”