Hekh Tak Morom Korise
Tai laga Pitri usor te wapas jai thaka homoi te, Jisu rati laga khana pora uthi, ekta gamcha bandhi, aru Tai laga chella khan laga theng dhuye, bhagi juwa theng khan aru dhoka diya theng bhi. Tai Judas ke roti diye, aru Judas rati bhitor te bahar jai. Tai ki chari kene jai utu morom ase.
13 1Etiya, Nistar Purbb age te, Jisu pora jani loise Tar somoi ahhi jaise, etu prithibi chari kene Pitri logot te jabole. Prithibi te thaka Tar nijor manuh khan ke morom kori kene, Tarkhan ke hekh tak morom korise. 2Rati kha-luwa somoi te, saitan pora Simon Iscariot laga chokra Judas laga mon bhitor te Jisu ke thogai dibole bhabona poila pora he rakhi disele. 3Jisu, Pitri pora sob jinis Tar hath te di disele, aru Tai Pitri pora ahhise aru Tar logot te wapas jai ase, etu sob jani kene, 4kha-luwa pora uthi kene, Tar uporte laga kapra khuli kene, ekta tuwal loi kene, aru etu Tar komor te bandhise. 5Tetiya Tai ekta borton te pani hali kene chella khan laga theng dhui dibole shuru korise, aru Tar komor te bandha tuwal pora etu khan sukhai dise. 6Tai Simon Peter logot te ahhise, aru tai pora Tar ke koise, “Prabhu, Apuni moi laga theng dhui dibo?”
7Jisu pora tar ke jawab dise, “Moi ki kori ase etu tumi etiya bujhi napabo, kintu pichete tumi bujhibo.”
8Peter pora koise, “Apuni kitia bhi moi laga theng dhui nadibo.” Jisu pora jawab dise, “Jodi Moi tumi ke nadhuwai, tumi Moi logot te eku bhag napabo.”
9Simon Peter pora Tar ke koise, “Prabhu, khali moi laga theng he nohoi, kintu moi laga hath aru matha bhi!”
10Jisu pora tar ke koise, “Kun manuh nahaise, tai laga theng he dhula lage—tai pura sapha ase. Tumikhan sapha ase, kintu tumikhan sob nohoi.”
11Kun pora Tar ke thogai dibo etu Tai janise; etu karne Tai koise, “Tumikhan sob sapha nohoi.”
12Tarkhan laga theng dhui kene aru kapra pindhi kene, Tai aru bohi jaise aru tarkhan ke koise, “Moi tumikhan nimite ki korise etu tumikhan bujhise? 13Tumikhan Moi ke Guruji aru Prabhu mate, aru etu thik ase, kilemane Moi eneka he ase. 14Etu karne jodi Moi, tumikhan laga Prabhu aru Guruji, tumikhan laga theng dhui dise, tumikhan bhi ekjon-ekjon laga theng dhui dibo lage. 15Kilemane Moi tumikhan nimite kineka korise, tumikhan bhi eneka koribole, Moi tumikhan ke ekta namuna dise. 16Hosa kotha, hosa kotha, Moi tumikhan ke koi ase, nokor tu tai laga malik pora dangor nohoi, aru khobor-manuh tu tai ke pathua manuh pora dangor nohoi. 17Jodi tumikhan etu khan jane, aru etu khan kore, tumikhan asirbad pabo.
Moi Laga Roti Khai Thaka Manuh
18“Moi tumikhan sob laga kotha koa nohoi—Moi kun ke basi loise etu khan ke Moi jane. Kintu Shastro purah hobole lage: ‘Kun pora moi laga roti khai ase, tai moi laga bipokhyote tai laga theng uthaise.’ 19Etu huwa age te, Moi etiya tumikhan ke koi ase, titia etu hobole somoi te tumikhan biswas koribo, ki MOI ASE. a a v19 “MOI ASE” eitu amar Pitri pora Moses ke jui-laga jhari te Tai nijor ke kineka janai disele. Jisu laga dabi bhi etu eke Isor-nijor-nam-diya ase—thoga-thogi huwa age te, biswas laga uphar hisebe etiya chella khan ke etu koi ase. 20Hosa kotha, hosa kotha, Moi tumikhan ke koi ase, kun pora Moi pathai diya manuh ke grohon kore, tai Moi ke grohon kore, aru kun pora Moi ke grohon kore, tai Moi ke pathua Jon ke grohon kore.”
21Etu koi kene, Jisu, Tar atma te chinta hoi kene, gawahi dise, “Hosa kotha, hosa kotha, Moi tumikhan ke koi ase, tumikhan majot ekjon pora Moi ke thogai dibo.”
22Chella khan, Tai kun laga kotha koise etu bujhibo napari kene, ekjon-ekjon ke saise. 23Tar chella khan majot ekjon, kun ke Jisu morom korise, Tar usorte bohi thakise. 24Etu karne Simon Peter pora tai ke ishara korise, Jisu kun laga kotha koise etu hudibole. 25Jisu laga phale theke kene, tai pora Tar ke hudise, “Prabhu, etu kun ase?”
26Jisu pora jawab dise, “Moi etu roti chubai kene kun ke dibo, etu tai he ase.” Tetiya Tai roti chubai kene Simon Iscariot laga chokra Judas ke dise. 27Judas pora roti luwa pichete, saitan tai bhitorte ghusi jaise. Etu karne Jisu pora tai ke koise, “Tumi ki kori ase etu joldi koribi.”
28Kintu khana-mez te bohi thaka kun bhi, Tai kile tai ke eneka koise etu bujha nai. 29Judas pora poisa laga jola rakhi thaka karne, kunba khan bhabise ki Jisu pora koise, ‘Purbb nimite ki lage etu kini bi,’ nahole, ‘Gorib khan ke kiba dibi.’ 30Judas pora roti luwa loge-loge, tai bahar te ulai jaise. Aru etu rati thakise.
Ekjon-ekjon Ke Morom Koribi
31Judas jhuwa pichete, Jisu koise, “Etiya Manuh laga Putro ke mahima dise, aru moi laga Pitri ke Tar bhitorte mahima dise. 32Jodi moi laga Pitri ke Tar bhitorte mahima dise, moi laga Pitri bhi Tai nijor bhitorte Putro ke mahima dibo aru joldi Tar ke mahima dibo. 33Morom laga bacha khan, Moi tumikhan logote olop somoi he ase. Tumikhan Moi ke bisaribo, aru Moi Yehudi cholawta khan ke kineka koise, eneka Moi etiya tumikhan ke koi ase: Moi kun jagate jai ase, ta te tumikhan ahhibo napare. 34Moi tumikhan ke ekta notun hukum di ase: ekjon-ekjon ke morom koribi. Moi tumikhan ke kineka morom korise, eneka tumikhan bhi ekjon-ekjon ke morom koribo lage. 35Jodi tumikhan ekjon-ekjon ke morom kore, etu pora sob manuh janibo ki tumikhan Moi laga chella khan ase.”
36Simon Peter pora Tar ke koise, “Prabhu, Apuni kot te jai ase?” Jisu pora jawab dise, “Moi kun jagate jai ase, ta te tumi etiya Moi laga pichete ahhibo napare, kintu pichete tumi ahhibo.”
37Peter pora hudise, “Prabhu, kile moi etiya Apuni laga pichete ahhibo napare? Moi Apuni nimite moi laga jibon di dibo.”
38Jisu pora jawab dise, “Tumi Moi nimite tumi laga jibon di dibo? Hosa kotha, hosa kotha, Moi tumi ke koi ase: tumi Moi ke tinbar helna nakora tak, murga tu nabasibo.”