ክሳዕ መወዳእታ ዘፍቀሮም

ናብ ኣቦኡ ክምለስ እናሃለወ፥ ኢየሱስ ካብ ድራር ተሲኡ ሽፎን ተዓጢቑ ኣእጋር ደቀ መዛሙርቱ ሓፀበ፥ ነተን ዝጐይያ ኣእጋርን ነተን ዘሕልፋ ኣእጋርን ከይተረፈ። ንይሁዳ እንጀራ ሃቦ፥ ይሁዳ ድማ ናብ ለይቲ ወፀ። እቲ ዝገድፎ ድማ ፍቕሪ እዩ።

ምዕራፍ 13።

ቅድሚ በዓል ፋሲካ፥ ኢየሱስ ካብዛ ዓለም እዚኣ ናብ ኣቦኡ ዝኸደላ ሰዓቱ ከም ዝበፅሐት ፈለጠ። ነቶም ኣብ ዓለም ዝነበሩ ናቱ ኣፍቂሩ ድማ፥ ክሳዕ መወዳእታ ኣፍቀሮም። ኣብ ጊዜ ድራር ከዓ፥ ድያብሎስ ኣብ ልቢ ይሁዳ ወዲ ስምኦን ኣስቆሮታዊ፥ ንኢየሱስ ኣሕሊፉ ኽህቦ ኣቐዲሙ ኣእትዩ ነበረ። ኢየሱስ ኣቦ ኵሉ ኣብ ኢዱ ኸም ዝሃቦ፥ ካብኡውን ከም ዝመፀ ናብኡ ድማ ከም ዝምለስ እናፈለጠ፥ ካብ ድራር ተሲኡ፥ ላዕለዋይ ክዳኑ ኣውፂኡ፥ ሽፎን ኣልዒሉ ድማ ኣብ ሕቘኡ ተዓጥቀ። ሽዑ ኣብ ገበራ ማይ ኣፍሲሱ፥ ኣእጋር እቶም ደቀ መዛሙርቲ ክሓፅብ ጀመረ፤ በቲ ዝተዓጠቖ ሽፎን ድማ ይደርዞም ነበረ። ናብ ስምኦን ጴጥሮስ ድማ መፀ፤ ንሱ ኸዓ “ጐይታ፥ ንስኻዶ ኣእጋረይ ክትሓፅብ?” በሎ።

ኢየሱስ ድማ ኸምዙይ ኢሉ መለሰሉ፦ “ነቲ ኣነ ዝገብሮ ዘለኹ ሕዚ ኣይትፈልጦን ኢኻ፤ ድሕሪ ሕዚ ግና ክተስተውዕል ኢኻ።”

ጴጥሮስ ድማ “ከቶ ኣእጋረይ ኣይክትሓፅበንን ኢኻ” በሎ። ኢየሱስ ከዓ “እንተ ዘይሓፀብኩኻ፥ ምሳይ ዝኾነ ግደ የብልካን” ኢሉ መለሰሉ።

ስምኦን ጴጥሮስ ድማ “ጐይታ፥ ኣእጋረይ ጥራሕ ዘይኮነስ፥ ኣእዳወይን ርእሰይን ከዓ” በሎ።

ኢየሱስ ድማ ከምዙይ በሎ፦ “እቲ ዝተሓፀበ፥ ምሉእ ብምሉእ ንፁህ እዩ እሞ፥ ኣእጋሩ ጥራሕ ክሕፅብ ደኣ የድልዮ እምበር። ንስኻትኩም ንፁሃት ኢኹም፤ ኵላትኩም ግና ኣይኮንኩምን።”

ነቲ ኣሕሊፉ ዝህቦ ይፈልጦ ነበረ እሞ፥ ስለዙይ እዩ “ኵላትኩም ንፁሃት ኣይኮንኩምን” ዝበለ።

ኣእጋሮም ሓፂቡ ክዳኑ ድማ ተኸዲኑ፥ መሊሱ ኣብ ማእዲ ተቐሚጡ ኸዓ ኸምዙይ በሎም፦ “እዚ ዝገበርኩልኩም ትርድእዎዶ ኣለኹም? ንስኻትኩም መምህርን ጐይታን ኢልኩም ትፅውዑኒ ኣለኹም፤ ከምኡ ስለ ዝኾንኩ ኸዓ፥ ቅኑዕ ኢኹም። እምበኣር ኣነ ጐይታኹምን መምህርኹምን እናሃለኹ ኣእጋርኩም እንተ ሓፀብኩ፥ ንስኻትኩምውን ኣእጋር ሓድሕድኩም ክትሓፅቡ ይግብአኩም እዩ። ከምቲ ኣነ ዝገበርኩልኩም ንስኻትኩምውን ክትገብሩ፥ ኣርኣያ ሂበኩም ኣለኹ እሞ። ብሓቂ ብሓቂ እብለኩም ኣለኹ፥ ካብ ጐይታኡ ዝዓቢ ባርያ፥ ካብ ለኣኺኡ ዝዓቢ መልእኽተኛ የለን። ነዝ ነገር እዙይ እንተ ፈለጥኩም፥ እንተ ገበርኩምዎ ብፁኣን ኢኹም።

እቲ እንጀራይ ዝበልዐ

“ብዛዕባ ኵላትኩም ኣይኮንኩን ዝዛረብ ዘለኹ፤ ኣነ ነቶም ዝሓረኽዎም እፈልጦም እየ። ግና እቲ ‘እቲ እንጀራይ ዝበልዕ ሸዀናኡ ኣንፃረይ ኣልዓለ’ ዝብል ፅሑፍ ክፍፀም ኣለዎ። እቲ ነገር እንተይኮነ ሕዚ እነግረኩም ኣለኹ፤ ምስ ኮነ ኣነ ንሱ ምዃነይ ምእንቲ ኽትኣምኑ። ^a ብሓቂ ብሓቂ እብለኩም ኣለኹ፥ ነቲ ኣነ ዝልእኮ ዝቕበል ሰብ፥ ንኣይ እዩ ዝቕበል ዘሎ፤ ንኣይ ዝቕበል ሰብ ከዓ፥ ነቲ ዝለኣኸኒ እዩ ዝቕበል።”

ኢየሱስ እዙይ ምስ በለ፥ ብመንፈሱ ተሻቒሉ፥ “ብሓቂ ብሓቂ እብለኩም ኣለኹ፥ ካባኻትኩም ሓደ ኣሕሊፉ ኽህበኒ እዩ” ኢሉ መስከረ።

እቶም ደቀ መዛሙርቲ ድማ፥ ብዛዕባ መን ይዛረብ ከም ዘሎ ጠፊእዎም፥ ንስንሳቶም ተጠማመቱ። ካብ ደቀ መዛሙርቱ ሓደ፥ እቲ ኢየሱስ ዘፍቅሮ ዝነበረ፥ ኣብ ጐኒ ኢየሱስ ተፃጊዑ ነበረ። ስለዙይ ስምኦን ጴጥሮስ፥ ብዛዕባ መን ይዛረብ ከም ዘሎ ኽሓትቶ ኣመልከተሉ። ንሱ ድማ ናብ ኢየሱስ ተፃጊዑ “ጐይታ፥ መን እዩ?” በሎ።

ኢየሱስ ድማ “እቲ ነዚ እንጀራ ጠቢሰ ዝህቦ፥ ንሱ እዩ” ኢሉ መለሰ። ነቲ እንጀራ ጠቢሱ ድማ፥ ንይሁዳ ወዲ ስምኦን ኣስቆሮታዊ ሃቦ። ይሁዳ ነቲ እንጀራ ምስ ወሰደ፥ ሰይጣን ናብኡ ኣተወ። ኢየሱስ ድማ “ነቲ እትገብሮ ዘለኻ ቀልጢፍካ ግበሮ” በሎ።

ካብቶም ኣብ ማእዲ ተቐሚጦም ዝነበሩ ግና፥ ስለምንታይ ከምዙይ ከም ዝበሎ ዝፈለጠ ሓደኳ ኣይነበረን። ይሁዳ ናይ ገንዘብ ከረጢት ሒዙ ስለ ዝነበረ፥ ገሊኣቶም ኢየሱስ ‘ነቲ ንበዓል ዘድልየና ዓድግ’ ወይ ‘ንድኻታት ገለ ሃብ’ ኢሉ ዝበሎ መሰሎም። ይሁዳ ነቲ እንጀራ ምስ ወሰደ፥ ሽዑ ንሽዑ ወፀ። ለይቲ ኸዓ ነበረ።

ንሓድሕድኩም ተፋቐሩ

ይሁዳ ምስ ወፀ፥ ኢየሱስ ከምዙይ በለ፦ “ሕዚ ወዲ ሰብ ከበረ፤ ኣቦይ ድማ ብእኡ ከበረ። ኣቦይ ብእኡ እንተ ኸበረ፥ ኣቦይ ድማ ንወልድ ብርእሱ ኼኽብሮ እዩ፤ ቀልጢፉ ኸዓ ኼኽብሮ እዩ። ኣቱም ደቀይ፥ ገና ቍሩብ ጊዜ ምሳኻትኩም ኣለኹ። ክትደልዩኒ ኢኹም፤ ከምቲ ንመራሕቲ ኣይሁድ ዝበልክዎም ድማ፥ ሕዚ ንኣኻትኩምውን ‘ናብ ዝኸዶ ክትመፁ ኣይትኽእሉን ኢኹም’ እብለኩም ኣለኹ። ሓድሽ ትእዛዝ እህበኩም ኣለኹ፦ ንሓድሕድኩም ተፋቐሩ። ከምቲ ኣነ ዘፍቀርኩኹም፥ ንስኻትኩምውን ከምኡ ንሓድሕድኩም ተፋቐሩ። ንሓድሕድኩም ፍቕሪ እንተ ኣልዩኩም፥ በዙይ ኵሉ ሰብ ደቀ መዛሙርተይ ምዃንኩም ክፈልጥ እዩ።”

ስምኦን ጴጥሮስ ድማ “ጐይታ፥ ናበይ ኢኻ እትኸይድ?” በሎ። ኢየሱስ ከዓ “ናብ ዝኸዶ ሕዚ ክትስዕበኒ ኣይትኽእልን ኢኻ፤ ድሕሪ ሕዚ ግና ክትስዕበኒ ኢኻ” ኢሉ መለሰሉ።

ጴጥሮስ ድማ “ጐይታ፥ ስለምንታይ ሕዚ ክስዕበካ ዘይኽእል? ህይወተይ ምእንታኻ ኣሕሊፈ ክህብ እየ” በሎ።

ኢየሱስ ድማ “ህይወትካ ምእንታይዶ ኣሕሊፍካ ክትህብ ኢኻ? ብሓቂ ብሓቂ እብለካ ኣለኹ፥ ሰለስተ ሻዕ ክሳዕ እትኽሕደኒ፥ ደርሆ ኣይነቅውን እዩ” ኢሉ መለሰ።