ମିସରସ୍ଥ ଯିହୂଦୀମାନଙ୍କ ପ୍ରତି ଆମ୍ଭମାନଙ୍କ ପିତାଙ୍କ ଚେତାବନୀ

ମିଶରର ସବୁଆଡ଼େ ବସବାସ କରୁଥିବା ଯିହୁଦୀମାନଙ୍କୁ କହି ଆମ୍ଭମାନଙ୍କ ପିତା ପଚାରନ୍ତି, ଯାହା ଯିହୁଦାକୁ ଶୂନ୍ୟ କଲା ତାହା ସେମାନେ କାହିଁକି ପୁନରାବୃତ୍ତି କରୁଛନ୍ତି। ସେମାନେ ସ୍ପଷ୍ଟ ଉତ୍ତର ଦିଅନ୍ତି ଯେ ସ୍ୱର୍ଗର ରାଣୀ ଉଦ୍ଦେଶ୍ୟରେ ଧୂପ ଜାଳୁଥିବା ବେଳେ ଜୀବନ ଭଲ ଚାଲୁଥିଲା, ଓ ବନ୍ଦ କରିବାକୁ ମନା କରନ୍ତି। ଦିଆଯାଇଥିବା ଚିହ୍ନ ହେଉଛି ଫାରୋ ହପ୍ରଙ୍କ ପତନ।

ଅଧ୍ୟାୟ 44।

ମିଗ୍‌ଦୋଲ, ତହପନ୍‌ହେଷ, ନୋଫ ଓ ପଥ୍ରୋଷରେ, ଅର୍ଥାତ୍‍ ମିସର ଦେଶରେ ବାସ କରୁଥିବା ସମସ୍ତ ଯିହୂଦୀଙ୍କ ବିଷୟରେ ଯିରିମିୟଙ୍କ ନିକଟକୁ ଏହି ବାକ୍ୟ ଉପସ୍ଥିତ ହେଲା,

ସୈନ୍ୟାଧିପତି ପିତା, ଇସ୍ରାଏଲର ଆମ୍ଭମାନଙ୍କ ପିତା ଏହି କଥା କହନ୍ତି, ଯିରୂଶାଲମ ଓ ଯିହୂଦାର ପ୍ରତ୍ୟେକ ନଗର ଉପରେ ଆମ୍ଭେ ଯେଉଁ ସମସ୍ତ ବିପଦ ଆଣିଲୁ, ତାହା ତୁମ୍ଭେମାନେ ଦେଖିଅଛ। ଆଜି ସେହିସବୁ ଉଜାଡ଼ ହୋଇ ପଡ଼ିଅଛି, ସେଠାରେ କେହି ବାସ କରୁ ନାହିଁ, କାରଣ ଆମ୍ଭକୁ ବିରକ୍ତ କରିବା ନିମନ୍ତେ ସେମାନେ ଯେଉଁ ଦୁଷ୍କର୍ମ କଲେ, ଅର୍ଥାତ୍‍ ଯାଇ ଯେଉଁ ଅନ୍ୟ ଦେବତାମାନଙ୍କୁ ସେମାନେ, ତୁମ୍ଭେମାନେ କିମ୍ବା ତୁମ୍ଭମାନଙ୍କ ପିତୃପୁରୁଷମାନେ ଜାଣି ନ ଥିଲେ, ସେମାନଙ୍କ ଉଦ୍ଦେଶ୍ୟରେ ଧୂପ ଜ୍ଵଳାଇ ସେବା କଲେ। ତଥାପି ଆମ୍ଭେ ଆପଣାର ସମସ୍ତ ଦାସ ଭାବବାଦୀମାନଙ୍କୁ ବାରମ୍ବାର ତୁମ୍ଭମାନଙ୍କ ନିକଟକୁ ପ୍ରେରଣ କରି କହିଲୁ, ‘ଆମ୍ଭେ ଯାହା ଘୃଣା କରୁ, ଏହି ଘୃଣ୍ୟ କର୍ମ ତୁମ୍ଭେମାନେ କର ନାହିଁ।’ ମାତ୍ର ସେମାନେ ଶୁଣିଲେ ନାହିଁ, କିଅବା ଅନ୍ୟ ଦେବତାମାନଙ୍କ ଉଦ୍ଦେଶ୍ୟରେ ଧୂପ ଜ୍ଵଳାଇବାରୁ, ଆପଣା ଦୁଷ୍କର୍ମରୁ ଫେରିଲେ ନାହିଁ। ଏଣୁ ଆମ୍ଭର କୋପ ଓ କ୍ରୋଧ ଢଳା ହୋଇ ଯିହୂଦାର ନଗରସମୂହରେ ଓ ଯିରୂଶାଲମର ସଡ଼କମାନଙ୍କରେ ଜ୍ଵଳିଉଠିଲା; ତହିଁରେ ସେହିସବୁ ଆଜିକାର ପରି ଧ୍ଵଂସସ୍ଥାନ ଓ ଉଜାଡ଼ସ୍ଥାନ ହୋଇ ପଡ଼ିଲା।

ଏବେ ସୈନ୍ୟାଧିପତି ପିତା, ଇସ୍ରାଏଲର ଆମ୍ଭମାନଙ୍କ ପିତା ଏହି କଥା କହନ୍ତି, ତୁମ୍ଭେମାନେ କାହିଁକି ଯିହୂଦା ମଧ୍ୟରୁ ପୁରୁଷ, ସ୍ତ୍ରୀ, ବାଳକ ଓ ସ୍ତନ୍ୟପାୟୀ ଶିଶୁଙ୍କୁ ଉଚ୍ଛିନ୍ନ କରି, ଆପଣାମାନଙ୍କ ପାଇଁ କାହାକୁ ଅବଶିଷ୍ଟ ନ ରଖି, ଆପଣାମାନଙ୍କ ଏଡ଼େ ମହା ଅନିଷ୍ଟ କରୁଅଛ?

“ତୁମ୍ଭେମାନେ ଯେଉଁ ମିସର ଦେଶରେ ବାସ କରିବାକୁ ଆସିଅଛ, ସେଠାରେ ଅନ୍ୟ ଦେବତାମାନଙ୍କ ଉଦ୍ଦେଶ୍ୟରେ ଧୂପ ଜ୍ଵଳାଇ ଆପଣା ହସ୍ତକୃତ କର୍ମ ଦ୍ଵାରା ଆମ୍ଭକୁ ବିରକ୍ତ କରି, ଆପଣାମାନଙ୍କୁ ଉଚ୍ଛିନ୍ନ କରୁଅଛ ଓ ପୃଥିବୀସ୍ଥ ସମସ୍ତ ଜାତି ମଧ୍ୟରେ ଅଭିଶାପ ଓ ନିନ୍ଦାର ପାତ୍ର ହେଉଅଛ। ଯିହୂଦା ଦେଶରେ ଓ ଯିରୂଶାଲମର ସଡ଼କମାନଙ୍କରେ ତୁମ୍ଭମାନଙ୍କ ପିତୃପୁରୁଷଗଣ, ଯିହୂଦାର ରାଜାମାନେ, ସେମାନଙ୍କ ଭାର୍ଯ୍ୟାମାନେ, ତୁମ୍ଭେମାନେ ଓ ତୁମ୍ଭମାନଙ୍କ ଭାର୍ଯ୍ୟାମାନେ ଯେଉଁ ଦୁଷ୍କର୍ମ କଲ, ତାହା କʼଣ ତୁମ୍ଭେମାନେ ପାସୋରିଅଛ? ଆଜିଯାଏ ସେମାନେ ଆପଣାମାନଙ୍କୁ ନମ୍ର କରି ନାହାନ୍ତି, କିଅବା ଆମ୍ଭକୁ ଭୟ କରି ନାହାନ୍ତି, ଅଥବା ତୁମ୍ଭମାନଙ୍କ ଓ ତୁମ୍ଭମାନଙ୍କ ପିତୃପୁରୁଷଗଣ ସମ୍ମୁଖରେ ଆମ୍ଭେ ଯେଉଁ ବ୍ୟବସ୍ଥା ଓ ବିଧି ସ୍ଥାପନ କଲୁ, ତଦନୁସାରେ ଆଚରଣ କରି ନାହାନ୍ତି।”

ଏଣୁ ସୈନ୍ୟାଧିପତି ପିତା, ଇସ୍ରାଏଲର ଆମ୍ଭମାନଙ୍କ ପିତା ଏହି କଥା କହନ୍ତି, ଦେଖ, ଆମ୍ଭେ ତୁମ୍ଭମାନଙ୍କ ଅନିଷ୍ଟ କରିବାକୁ ଓ ସମୁଦାୟ ଯିହୂଦାକୁ ଉଚ୍ଛିନ୍ନ କରିବାକୁ ତୁମ୍ଭମାନଙ୍କ ବିରୁଦ୍ଧରେ ଆପଣା ମୁଖ ରଖିଲୁ। “ମିସର ଦେଶରେ ବାସ କରିବାକୁ ଯିବା ନିମନ୍ତେ ଉଦ୍‍ଯୁକ୍ତ ଯିହୂଦାର ଅବଶିଷ୍ଟ ଲୋକଙ୍କୁ ଆମ୍ଭେ ନେଇଯିବା; ସେମାନେ ସମସ୍ତେ ବିନଷ୍ଟ ହୋଇ ସେଠାରେ ଖଡ୍ଗ ଓ ଦୁର୍ଭିକ୍ଷରେ ପତିତ ହେବେ; କ୍ଷୁଦ୍ରଠାରୁ ମହାନ୍‍ ପର୍ଯ୍ୟନ୍ତ ସମସ୍ତେ ଖଡ୍ଗ ଓ ଦୁର୍ଭିକ୍ଷରେ ମରିବେ ଓ ସେମାନେ ଅଭିଶାପ, ବିସ୍ମୟ, ନିନ୍ଦା ଓ ଧିକ୍କାରର ପାତ୍ର ହେବେ। ଆମ୍ଭେ ଯେପ୍ରକାରେ ଯିରୂଶାଲମକୁ ଖଡ୍ଗ, ଦୁର୍ଭିକ୍ଷ ଓ ମହାମାରୀ ଦ୍ଵାରା ଦଣ୍ଡ ଦେଲୁ, ସେପ୍ରକାରେ ମିସର ଦେଶରେ ବାସ କରୁଥିବା ଲୋକମାନଙ୍କୁ ଦଣ୍ଡ ଦେବା। ପୁଣି ଯିହୂଦାର ଯେଉଁ ଅବଶିଷ୍ଟ ଲୋକମାନେ ମିସର ଦେଶରେ ବାସ କରିବାକୁ ଆସିଅଛନ୍ତି, ସେମାନଙ୍କ ମଧ୍ୟରୁ କେହି ରକ୍ଷା ପାଇବ ନାହିଁ କିମ୍ବା ବଞ୍ଚି ରହି, ଯେଉଁଠାରେ ପୁନର୍ବାର ବାସ କରିବାକୁ ଆକାଂକ୍ଷା କରନ୍ତି, ସେହି ଯିହୂଦା ଦେଶକୁ ଫେରିଯିବ ନାହିଁ; କେବଳ କେତେକ ପଳାତକ ଛଡ଼ା ଆଉ କେହି ଫେରିଯିବ ନାହିଁ।”

ତେବେ ଅନ୍ୟ ଦେବତାମାନଙ୍କ ଉଦ୍ଦେଶ୍ୟରେ ଆପଣା ଭାର୍ଯ୍ୟାମାନେ ଧୂପ ଜ୍ଵଳାନ୍ତି ବୋଲି ଜାଣିଥିବା ସମସ୍ତ ପୁରୁଷ, ନିକଟରେ ଠିଆ ହୋଇଥିବା ସମସ୍ତ ସ୍ତ୍ରୀ — ଏକ ମହାଜନତା — ପୁଣି ମିସର ଦେଶରେ, ପଥ୍ରୋଷରେ ବାସ କରୁଥିବା ସମସ୍ତ ଲୋକ ଯିରିମିୟଙ୍କୁ ଉତ୍ତର ଦେଲେ, “ତୁମ୍ଭେ ଆମ୍ଭମାନଙ୍କ ପିତାଙ୍କ ନାମରେ ଆମ୍ଭମାନଙ୍କୁ ଯେଉଁ ବାକ୍ୟ କହିଅଛ, ତାହା ଆମ୍ଭେମାନେ ତୁମ୍ଭ ମୁଖରୁ ଶୁଣିବୁ ନାହିଁ। ନା, ଆମ୍ଭେମାନେ ଯାହା ମାନତ କଲୁ, ତାହାସବୁ ନିଶ୍ଚୟ କରିବୁ; ଆକାଶ-ରାଣୀ ଉଦ୍ଦେଶ୍ୟରେ ଧୂପ ଜ୍ଵଳାଇବୁ ଓ ଆମ୍ଭେମାନେ, ଆମ୍ଭମାନଙ୍କ ପିତୃପୁରୁଷଗଣ, ଆମ୍ଭମାନଙ୍କ ରାଜାମାନେ ଓ ଆମ୍ଭମାନଙ୍କ ଅଧିପତିମାନେ ଯିହୂଦାର ନଗରସମୂହରେ ଓ ଯିରୂଶାଲମର ସଡ଼କମାନଙ୍କରେ ଯେପରି କରିଥିଲୁ, ସେପରି ତାହା ଉଦ୍ଦେଶ୍ୟରେ ପେୟ-ନୈବେଦ୍ୟ ଢାଳିବୁ; କାରଣ ସେତେବେଳେ ଆମ୍ଭମାନଙ୍କ ଯଥେଷ୍ଟ ଆହାର ଥିଲା, ଆମ୍ଭେମାନେ ସମୃଦ୍ଧ ଥିଲୁ ଓ କୌଣସି ବିପଦ ଦେଖି ନ ଥିଲୁ। ^a ମାତ୍ର ଯେଉଁ ସମୟଠାରୁ ଆମ୍ଭେମାନେ ଆକାଶ-ରାଣୀ ଉଦ୍ଦେଶ୍ୟରେ ଧୂପ ଜ୍ଵଳାଇବା ଓ ପେୟ-ନୈବେଦ୍ୟ ଢାଳିବା ବନ୍ଦ କଲୁ, ସେହି ସମୟଠାରୁ ଆମ୍ଭମାନଙ୍କର ସବୁ ବିଷୟର ଅଭାବ ଘଟିଅଛି ଓ ଆମ୍ଭେମାନେ ଖଡ୍ଗ ଓ ଦୁର୍ଭିକ୍ଷ ଦ୍ଵାରା ସଂହାରିତ ହୋଇଅଛୁ।”

ଆଉ ସ୍ତ୍ରୀମାନେ କହିଲେ, “ଆମ୍ଭେମାନେ ଯେତେବେଳେ ଆକାଶ-ରାଣୀ ଉଦ୍ଦେଶ୍ୟରେ ଧୂପ ଜ୍ଵଳାଇ ତାହା ଉଦ୍ଦେଶ୍ୟରେ ପେୟ-ନୈବେଦ୍ୟ ଢାଳିଲୁ, ସେତେବେଳେ କʼଣ ଆମ୍ଭମାନଙ୍କ ସ୍ଵାମୀମାନଙ୍କ ଅଜ୍ଞାତରେ ତାହାର ପ୍ରତିମୂର୍ତ୍ତି ଗଢ଼ି ପିଠା ତିଆରି କଲୁ ଓ ପେୟ-ନୈବେଦ୍ୟ ଢାଳିଲୁ?”

ତେବେ ଯିରିମିୟ ଏହିପରି ଉତ୍ତର ଦେଇଥିବା ପୁରୁଷ ଓ ସ୍ତ୍ରୀ, ଅର୍ଥାତ୍‍ ସମସ୍ତ ଲୋକଙ୍କୁ କହିଲେ, “ତୁମ୍ଭେମାନେ, ତୁମ୍ଭମାନଙ୍କ ପିତୃପୁରୁଷଗଣ, ତୁମ୍ଭମାନଙ୍କ ରାଜାମାନେ, ତୁମ୍ଭମାନଙ୍କ ଅଧିପତିମାନେ ଓ ଦେଶର ଲୋକମାନେ ଯିହୂଦାର ନଗରସମୂହରେ ଓ ଯିରୂଶାଲମର ସଡ଼କମାନଙ୍କରେ ଯେଉଁ ଧୂପ ଜ୍ଵଳାଇଲ, ତାହା କʼଣ ଆମ୍ଭମାନଙ୍କ ପିତା ସ୍ମରଣ କଲେ ନାହିଁ? ତାହା କʼଣ ତାହାଙ୍କ ମନରେ ପଡ଼ିଲା ନାହିଁ? ଏଣୁ ଆମ୍ଭମାନଙ୍କ ପିତା ତୁମ୍ଭମାନଙ୍କ ଦୁଷ୍କର୍ମ ଓ ଘୃଣ୍ୟ କର୍ମ ଆଉ ସହି ନ ପାରିବାରୁ ତୁମ୍ଭମାନଙ୍କ ଦେଶ ଆଜିକାର ପରି ଧ୍ଵଂସସ୍ଥାନ, ବିସ୍ମୟ ଓ ଅଭିଶାପର ପାତ୍ର ଓ ନିବାସୀବିହୀନ ହୋଇ ପଡ଼ିଅଛି। ତୁମ୍ଭେମାନେ ଧୂପ ଜ୍ଵଳାଇ ଆମ୍ଭମାନଙ୍କ ପିତାଙ୍କ ବିରୁଦ୍ଧରେ ପାପ କରିବାରୁ, ପୁଣି ତାହାଙ୍କ ରବ ନ ମାନି, ତାହାଙ୍କ ବ୍ୟବସ୍ଥା, ବିଧି ଓ ସାକ୍ଷ୍ୟାନୁସାରେ ଆଚରଣ ନ କରିବାରୁ, ଆଜିକାର ପରି ଏହି ବିପଦ ତୁମ୍ଭମାନଙ୍କ ଉପରେ ଘଟିଅଛି।”

ଯିରିମିୟ ଆହୁରି ସମସ୍ତ ଲୋକ ଓ ସମସ୍ତ ସ୍ତ୍ରୀଙ୍କୁ କହିଲେ, “ହେ ମିସର ଦେଶସ୍ଥ ସମୁଦାୟ ଯିହୂଦା, ତୁମ୍ଭେମାନେ ଆମ୍ଭମାନଙ୍କ ପିତାଙ୍କ ବାକ୍ୟ ଶୁଣ।

ସୈନ୍ୟାଧିପତି ପିତା, ଇସ୍ରାଏଲର ଈଶ୍ଵର ଏହି କଥା କହନ୍ତି, ତୁମ୍ଭେମାନେ ଓ ତୁମ୍ଭମାନଙ୍କ ଭାର୍ଯ୍ୟାମାନେ ଆପଣା ମୁଖରେ ତାହା କହିଲ ଓ ଆପଣା ହସ୍ତରେ ତାହା ସଫଳ କଲ, ‘ଆମ୍ଭେମାନେ ଆକାଶ-ରାଣୀ ଉଦ୍ଦେଶ୍ୟରେ ଧୂପ ଜ୍ଵଳାଇବା ଓ ତାହା ଉଦ୍ଦେଶ୍ୟରେ ପେୟ-ନୈବେଦ୍ୟ ଢାଳିବା ବୋଲି ଯେଉଁ ମାନତ କଲୁ, ତାହା ପୂର୍ଣ୍ଣ କରିବୁ।’ ତେବେ ତୁମ୍ଭେମାନେ ଆପଣା ମାନତ ରକ୍ଷା କର! ଆପଣା ମାନତ ସଫଳ କର!”

“ଏହେତୁ ହେ ମିସର ଦେଶରେ ବାସ କରୁଥିବା ସମୁଦାୟ ଯିହୂଦା, ତୁମ୍ଭେମାନେ ଆମ୍ଭମାନଙ୍କ ପିତାଙ୍କ ବାକ୍ୟ ଶୁଣ; ଦେଖ, ଆମ୍ଭେ ଆପଣା ମହାନ୍‍ ନାମ ନେଇ ଶପଥ କରିଅଛୁ, ଏହା ସେ କହନ୍ତି, ଯେ ସମୁଦାୟ ମିସର ଦେଶରେ ଯିହୂଦାର କୌଣସି ଲୋକ ‘ଜୀବିତ ପ୍ରଭୁ ପିତାଙ୍କ ଦିବ୍ୟ’ ବୋଲି କହି ଆଉ ଆମ୍ଭର ନାମ ଉଚ୍ଚାରଣ କରିବ ନାହିଁ। ଦେଖ, ଆମ୍ଭେ ସେମାନଙ୍କର ମଙ୍ଗଳ ନିମନ୍ତେ ନୁହେଁ, ମାତ୍ର ଅମଙ୍ଗଳ ନିମନ୍ତେ ସେମାନଙ୍କ ଉପରେ ଦୃଷ୍ଟି ରଖୁଅଛୁ; ମିସର ଦେଶସ୍ଥ ଯିହୂଦାର ସମସ୍ତ ଲୋକ ଖଡ୍ଗ ଓ ଦୁର୍ଭିକ୍ଷରେ ଉଚ୍ଛିନ୍ନ ହେବା ପର୍ଯ୍ୟନ୍ତ ମରିବେ। ଅଳ୍ପସଂଖ୍ୟକ ଖଡ୍ଗରୁ ବଞ୍ଚିଥିବା ଲୋକ ମିସର ଦେଶରୁ ଯିହୂଦା ଦେଶକୁ ଫେରିଯିବେ; ତେବେ ମିସର ଦେଶରେ ବାସ କରିବାକୁ ଯାଇଥିବା ଯିହୂଦାର ଅବଶିଷ୍ଟ ସମସ୍ତ ଲୋକ କାହାର ବାକ୍ୟ ସ୍ଥିର ରହେ, ଆମ୍ଭର କିମ୍ବା ସେମାନଙ୍କର, ତାହା ଜାଣିବେ।”

ଆଉ ଆମ୍ଭମାନଙ୍କ ପିତା କହନ୍ତି, ଆମ୍ଭେ ଯେ ଏହି ସ୍ଥାନରେ ତୁମ୍ଭମାନଙ୍କୁ ଦଣ୍ଡ ଦେବା, ଏହା ତୁମ୍ଭମାନଙ୍କ ପ୍ରତି ଚିହ୍ନସ୍ଵରୂପ ହେବ, ଯେପରି ତୁମ୍ଭମାନଙ୍କ ବିରୁଦ୍ଧରେ ଆମ୍ଭର ବାକ୍ୟ, ଅମଙ୍ଗଳ ନିମନ୍ତେ, ନିଶ୍ଚୟ ସଫଳ ହେବ ବୋଲି ତୁମ୍ଭେମାନେ ଜାଣିବ। ଆମ୍ଭମାନଙ୍କ ପିତା ଏହି କଥା କହନ୍ତି, ଦେଖ, ଆମ୍ଭେ ଯେପରି ଯିହୂଦାର ରାଜା ସିଦିକୀୟକୁ ତାହାର ପ୍ରାଣନାଶକ ଶତ୍ରୁ, ବାବିଲର ରାଜା ନବୂଖଦ୍‍ନିତ୍ସରର ହସ୍ତରେ ସମର୍ପଣ କଲୁ, ସେପରି ମିସରର ରାଜା ଫାରୋ-ହଫ୍ରାକୁ ତାହାର ପ୍ରାଣନାଶ କରିବାକୁ ଚାହୁଁଥିବା ଶତ୍ରୁମାନଙ୍କ ହସ୍ତରେ ସମର୍ପଣ କରିବା।