எரேமியா 44

44 ¹மிக்தோலிலும், தக்பானேசிலும், நோப்பிலும், பத்ரோஸ் தேசத்திலும் எகிப்தில் குடியிருந்த எல்லா யூதரையும் குறித்து எரேமியாவுக்கு உண்டான வார்த்தை:

²பரலோக சேனைகளின் பிதா, இஸ்ரவேலின் எங்கள் பிதா, சொல்லுகிறது என்னவென்றால்: எருசலேமின்மேலும் யூதாவின் எல்லாப் பட்டணங்களின்மேலும் நான் வரப்பண்ணின சகல தீங்கையும் நீங்கள் கண்டீர்கள். இதோ, இந்நாளில் அவைகள் பாழாய்க் கிடக்கின்றன, அவைகளில் குடியிருப்பார் ஒருவரும் இல்லை, ³அவர்கள் அறியாமலும், நீங்களும் உங்கள் பிதாக்களும் அறியாமலும் இருந்த அந்நிய தேவர்களுக்குத் தூபங்காட்டி, அவைகளைச் சேவித்து, எனக்குக் கோபமூட்டும்படி செய்த தீமையினிமித்தமே இப்படியாயிற்று. ⁴ஆயினும் நான் தீர்க்கதரிசிகளாகிய என் ஊழியக்காரர் எல்லாரையும் மீண்டும் மீண்டும் உங்களிடத்தில் அனுப்பி, ‘நான் வெறுக்கிற இந்த அருவருப்பான காரியத்தை நீங்கள் செய்யவேண்டாம்’ என்று சொல்லச்சொன்னேன். ⁵ஆனாலும் அவர்கள் அந்நிய தேவர்களுக்குத் தூபங்காட்டுகிற தங்கள் தீமையை விட்டுத் திரும்பாமலும், செவிகொடாமலும் போனார்கள். ⁶ஆகையால் என் உக்கிரமும் என் கோபமும் மூண்டு, யூதாவின் பட்டணங்களிலும் எருசலேமின் வீதிகளிலும் பற்றியெரிந்தது; அவைகள் இந்நாளில் இருக்கிறபடி பாழும் வனாந்தரமுமாய்ப் போயின.

⁷இப்போதும் பரலோக சேனைகளின் பிதா, இஸ்ரவேலின் எங்கள் பிதா, சொல்லுகிறது என்னவென்றால்: உங்களுக்கு ஒருவரும் மீதியாயிராதபடிக்கு, யூதாவிலிருந்து புருஷனையும் ஸ்திரீயையும் பிள்ளையையும் பாலகனையும் சங்கரிக்கத்தக்கதாக, உங்கள் ஆத்துமாக்களுக்கு விரோதமாய் இத்தனை பெரிய தீங்கை நீங்கள் ஏன் செய்கிறீர்கள்?

⁸“நீங்கள் குடியிருக்கும்படி வந்த எகிப்துதேசத்தில் அந்நிய தேவர்களுக்குத் தூபங்காட்டி, உங்கள் கைகளின் கிரியைகளால் எனக்குக் கோபமூட்டி, உங்களை நீங்களே சங்கரித்துக்கொண்டு, பூமியிலுள்ள சகல ஜாதிகளுக்குள்ளும் சாபமும் நிந்தையுமாகிறீர்கள். ⁹யூதாவின் தேசத்திலும் எருசலேமின் வீதிகளிலும் செய்யப்பட்ட உங்கள் பிதாக்களின் பொல்லாப்புகளையும், யூதாவுடைய ராஜாக்களின் பொல்லாப்புகளையும், அவர்களுடைய மனைவிகளின் பொல்லாப்புகளையும், உங்கள் சொந்தப் பொல்லாப்புகளையும், உங்கள் மனைவிகளின் பொல்லாப்புகளையும் நீங்கள் மறந்துவிட்டீர்களா? ¹⁰இந்நாள்வரைக்கும் அவர்கள் மனம்நொறுங்கவும் இல்லை, பயப்படவும் இல்லை, நான் உங்களுக்கும் உங்கள் பிதாக்களுக்கும் முன் வைத்த என் நியாயப்பிரமாணத்தின்படியும் என் கட்டளைகளின்படியும் நடக்கவும் இல்லை.”

¹¹ஆகையால் பரலோக சேனைகளின் பிதா, இஸ்ரவேலின் எங்கள் பிதா, சொல்லுகிறது என்னவென்றால்: இதோ, தீங்குசெய்யவும், யூதா அனைத்தையும் சங்கரிக்கவும் நான் என் முகத்தை உங்களுக்கு விரோதமாகத் திருப்புகிறேன். ¹²“எகிப்துதேசத்தில் போய்க் குடியிருக்கத் தங்கள் முகங்களைத் திருப்பின யூதாவின் மீதியானவர்களை நான் அகற்றிப்போடுவேன்; அவர்கள் எல்லாரும் அழிந்துபோவார்கள், எகிப்துதேசத்தில் விழுவார்கள்; சிறியோர்முதல் பெரியோர்மட்டும் பட்டயத்தாலும் பஞ்சத்தாலும் மடிந்து, சாபமும் பயங்கரமும் நிந்தையும் பழிச்சொல்லுமாவார்கள். ¹³நான் எருசலேமைத் தண்டித்ததுபோல, எகிப்துதேசத்தில் குடியிருக்கிறவர்களைப் பட்டயத்தாலும் பஞ்சத்தாலும் கொள்ளைநோயாலும் தண்டிப்பேன். ¹⁴எகிப்துதேசத்தில் குடியிருக்க வந்த யூதாவின் மீதியானவர்களில் ஒருவரும் தப்பிப்பிழைத்து, தாங்கள் திரும்பவும் குடியிருக்க வாஞ்சிக்கிற யூதாதேசத்துக்குத் திரும்பிப்போவதில்லை; தப்பிய சிலரைத்தவிர வேறொருவரும் திரும்பமாட்டார்கள்.”

¹⁵அப்பொழுது தங்கள் மனைவிகள் அந்நிய தேவர்களுக்குத் தூபங்காட்டினதை அறிந்திருந்த எல்லாப் புருஷரும், அங்கே நின்ற பெருங்கூட்டமான எல்லா ஸ்திரீகளும், எகிப்துதேசத்தின் பத்ரோஸிலே குடியிருந்த எல்லா ஜனங்களும் எரேமியாவுக்குப் பிரதியுத்தரமாக: ¹⁶“நீ எங்கள் பிதாவின் நாமத்தில் எங்களுக்குச் சொன்ன வார்த்தையின்படி நாங்கள் உனக்குச் செவிகொடோம். ¹⁷இல்லை; நாங்களும் எங்கள் பிதாக்களும் எங்கள் ராஜாக்களும் எங்கள் பிரபுக்களும் யூதாவின் பட்டணங்களிலும் எருசலேமின் வீதிகளிலும் செய்ததுபோல, வானராக்கினிக்குத் தூபங்காட்டி, அவளுக்குப் பானபலிகளை வார்த்து, நாங்கள் நேர்ந்துகொண்ட எல்லாப் பொருத்தனைகளின்படியும் நிச்சயமாய்ச் செய்வோம்; அப்பொழுது நாங்கள் அப்பத்தினால் திருப்தியாகி, செழிப்படைந்து, ஒரு தீங்கையும் காணாமல் இருந்தோம். ^a a v17 வானராக்கினி என்பவள் பூர்வ கீழ்த்திசைநாடுகளில் பிரபலமாயிருந்த வளத்தின் தேவதை; இவள் அஸ்தரோத் அல்லது இஷ்தார் எனப்படுபவளாயிருக்கக்கூடும்; யூதாவில் இவள் பரவலாக ஆராதிக்கப்பட்டாள். ¹⁸ஆனாலும் நாங்கள் வானராக்கினிக்குத் தூபங்காட்டுகிறதையும் அவளுக்குப் பானபலிகளை வார்க்கிறதையும் விட்டதுமுதல், எல்லாவற்றிலும் குறைவுபட்டு, பட்டயத்தாலும் பஞ்சத்தாலும் அழிந்துபோகிறோம்.”

¹⁹ஸ்திரீகள் மேலும்: “நாங்கள் வானராக்கினிக்குத் தூபங்காட்டி, அவளுக்குப் பானபலிகளை வார்த்தபோது, எங்கள் புருஷரின் சம்மதமில்லாமலா அவளுக்கு அடையாளமாக அப்பங்களைச் சுட்டு, அவளுக்குப் பானபலிகளை வார்த்தோம்?” என்றார்கள்.

²⁰அப்பொழுது எரேமியா இப்படித் தனக்கு உத்தரவு சொன்ன புருஷர் ஸ்திரீகளாகிய சகல ஜனங்களையும் நோக்கிச் சொன்னது: ²¹“நீங்களும் உங்கள் பிதாக்களும் உங்கள் ராஜாக்களும் உங்கள் பிரபுக்களும் தேசத்தின் ஜனங்களும் யூதாவின் பட்டணங்களிலும் எருசலேமின் வீதிகளிலும் காட்டின தூபத்தை எங்கள் பிதா நினையாதிருந்தாரோ? அது அவருடைய மனதிற்கு வராதிருந்ததோ? ²²உங்கள் துர்க்கிரியைகளினிமித்தமும், நீங்கள் செய்த அருவருப்புகளினிமித்தமும் எங்கள் பிதா அதைப் பொறுத்திருக்கக்கூடாமற்போனார்; ஆகையால் இந்நாளில் இருக்கிறபடி உங்கள் தேசம் பாழும் பயங்கரமும் சாபமும் குடியில்லாத இடமுமாய்ப் போயிற்று. ²³நீங்கள் தூபங்காட்டி, எங்கள் பிதாவுக்கு விரோதமாகப் பாவஞ்செய்து, அவருடைய சத்தத்துக்குக் கீழ்ப்படியாமலும், அவருடைய நியாயப்பிரமாணத்தின்படியும் அவருடைய கட்டளைகளின்படியும் அவருடைய சாட்சிகளின்படியும் நடவாமலும் போனபடியினால், இந்நாளில் இருக்கிறபடி இந்தத் தீங்கு உங்களுக்கு நேரிட்டது.”

²⁴பின்னும் எரேமியா சகல ஜனங்களையும் சகல ஸ்திரீகளையும் நோக்கி: “எகிப்துதேசத்திலுள்ள யூதாவே, நீங்கள் எல்லாரும் எங்கள் பிதாவின் வார்த்தையைக் கேளுங்கள்.

²⁵பரலோக சேனைகளின் பிதா, இஸ்ரவேலின் தேவன், சொல்லுகிறது என்னவென்றால்: நீங்களும் உங்கள் மனைவிகளும் உங்கள் வாய்களினால், ‘நாங்கள் நேர்ந்துகொண்ட பொருத்தனைகளை நிச்சயமாய்ச் செலுத்தி, வானராக்கினிக்குத் தூபங்காட்டி, அவளுக்குப் பானபலிகளை வார்ப்போம்’ என்று சொல்லி, உங்கள் கைகளினால் அதை நிறைவேற்றினீர்கள்; ஆகையால் உங்கள் பொருத்தனைகளை நிலைநிறுத்துங்கள்; அவைகளைச் செலுத்தித் தீருங்கள்!”

²⁶“ஆதலால் எகிப்துதேசத்தில் குடியிருக்கிற சகல யூதாவே, எங்கள் பிதாவின் வார்த்தையைக் கேளுங்கள்: இதோ, ‘ஆண்டவராகிய பிதாவின் ஜீவனைக்கொண்டு’ என்று சொல்லி, எகிப்துதேசம் எங்குமுள்ள யூதா மனுஷரில் ஒருவரும் இனி என் நாமத்தைச் சொல்லாதபடிக்கு, என் மகத்துவமான நாமத்தைக்கொண்டு ஆணையிட்டேன் என்று அவர் சொல்லுகிறார். ²⁷இதோ, நன்மைக்கல்ல, தீமைக்கே நான் அவர்கள்மேல் ஜாக்கிரதையாயிருக்கிறேன்; எகிப்துதேசத்திலுள்ள யூதா மனுஷர் யாவரும் ஒருவரும் மீதியாயிராதபடிக்கு, பட்டயத்தாலும் பஞ்சத்தாலும் மடிந்துபோவார்கள். ²⁸பட்டயத்துக்குத் தப்பின சிலர்மாத்திரம் எகிப்துதேசத்திலிருந்து யூதாதேசத்துக்குத் திரும்புவார்கள்; அப்பொழுது எகிப்துதேசத்தில் குடியிருக்கும்படி போன யூதாவின் மீதியானவர்கள் யாவரும் என்னுடைய வார்த்தையோ தங்களுடைய வார்த்தையோ எது நிலைக்கும் என்று அறிந்துகொள்வார்கள்.”

²⁹இந்த இடத்தில் நான் உங்களைத் தண்டிப்பேன் என்பதற்கும், உங்களுக்கு விரோதமான என் வார்த்தைகள் தீங்குக்கென்று நிச்சயமாய் நிறைவேறும் என்பதை நீங்கள் அறியும்படிக்கும், இதுவே உங்களுக்கு அடையாளம் என்று எங்கள் பிதா சொல்லுகிறார். ³⁰எங்கள் பிதா சொல்லுகிறது என்னவென்றால்: இதோ, யூதாவின் ராஜாவாகிய சிதேக்கியாவை அவனுக்குச் சத்துருவும் அவனுடைய பிராணனை வாஞ்சித்தவனுமான பாபிலோன் ராஜாவாகிய நேபுகாத்நேச்சாரின் கையில் நான் ஒப்புக்கொடுத்ததுபோல, எகிப்தின் ராஜாவாகிய பார்வோன் ஓப்ரா என்பவனை, அவனுடைய பிராணனை வாஞ்சிக்கிற அவனுடைய சத்துருக்களின் கையில் ஒப்புக்கொடுப்பேன் என்கிறார்.”