Pāngmonshi 27

27 ¹Ithumwui Avāna Mosesli hānga,

²Israelwui mibingli hānglu: Kachikathāna ili khamataiya khangashit akha kasā tharan, mi akhali chiwui aman khangachā athishurda tharchigatakha, ³Zingkum maga̱ eina thuilaga zingkum hangtharuk eina tangda mayarnaowui khangachā chi, kathara shimwui shekel aman athishurda, lupāsā shekel hangphangā mira. ⁴Kha sha̱nao tharan, chiwui khangachā lupāsā shekel thumrā mira. ⁵Zingkum phangā eina thuilaga zingkum maga̱ eina tangda tharan, mayarnaowui khangachā lupāsā shekel maga̱, kala sha̱naowui vang shekel tharā mira. ⁶Kachāngkha eina thuilaga zingkum phangā eina tangda tharan, mayarnaowui khangachā lupāsā shekel phangā, kala sha̱naowui vang lupāsā shekel kathum mira. ⁷Zingkum hangtharuk eina thuilaga chiwui atung tharan, mayarnaowui khangachā lupāsā shekel tharāda phangā, kala sha̱naowui vang shekel tharā mira. ⁸Kha ana khangachāwui vang kachāma tharan, ali pāngmonwui mangāli khuivāra, kala pāngmonna chiwui khangachā ngachākra; khangashit kasā mi chiwui mikashap athishurda pāngmonna ali ngachākkhuira.

⁹Khangashit chi ili chigat kashap sā akha tharan, ili chigatkahai chikathā saikora kathara ngasāra. ¹⁰Ana chi mangatha̱paimana, khamathā chi makhamathāwui vang, lah makhamathā chi khamathāwui vang mangatha̱paimana; kha ana sā akha khangatei sāwui vang ngatha̱akha, chi kala chiwui ngatha̱ sā, khanini kathara ngasāra. ¹¹Kha ili chigat makhuirā makathara sā akha tharan, chi pāngmonwui mangāli khuivāra, ¹²khamathā nilala, makhamathā nilala, pāngmonna chiwui khangachā ngachākra; pāngmonna ngachā tākam eina chi leira. ¹³Kha ana chi ngatangkhui ningchāngakha, chiwui khangachāli akhum phangāwui akha mataisangmira.

¹⁴Kachikathāna awui shim ili kathara ngasāda tharchigat tharan, khamathā nilala, makhamathā nilala, pāngmonna chiwui khangachā ngachākra; pāngmonna ngachā tākam eina chi nganingra. ¹⁵Kha shim tharchigat mi china chi ngatangkhui tharan, chiwui aman lupāsāwui akhum phangāwui akha mataisangmira, chieina chi awui ngasāra.

¹⁶Kha kachikathāna awui khalei luiwui ngachai akha ili tharchigat tharan, chiwui khangachā athā athishurda leira; napai athā homer akhawui vang lupāsā shekel hangphangā mira. ¹⁷Kha ana awui lui jubileewui kum eina thuilaga tharchigat tharan, chiwui khangachā peida nganingra. ¹⁸Kha ana jubileewui thili awui lui chi tharchigatakha, pāngmonna sākida jubilee eina tangda vātsa kahai zingkum athishurda aman shānkhuilaga, aman chi teosang ngasakra. ¹⁹Kala lui tharchigata china chi ngatangkhuingaiakha, chiwui lupāsā aman akhum phangāwui akha mataida sangra, kala chi awui ngasāra. ²⁰Kha ana lui chi mangatangkhuiakha, lah mi khangateili yorshokhaiakha, chi mangatangkhuiluimara. ²¹Jubileewui thāda lui chi chiho tharan, tharchigat kahai lui thāda ili kathara ngasāra; chi pāngmonwui shimlui ngasāra.

²²"Kachikathā akhana awui avāva̱ ngarāwui shimlui maningla, lokakhui kahai lui ili tharchigatakha, ²³pāngmonna jubilee kum eina tangda aman chi ngachākkhuira, kala chithang ili kathara ot thāda aman chi mira. ²⁴Jubilee kumli lui chi awui ngalei kahai khayorapali hanmira. ²⁵Aman saikora kathara shimwui shekel athishurda sāra.

²⁶"Kachikathā akhana sha̱keiwui pharākhare chi matharchigatpaimara; kaja chi iwuisera; seilala, yaolala, chi iwuina. ²⁷Kha makathara sha̱kei niakha, aman kala chiwui akhum phangāwui akha mataida ngatangkhuira; mangatangkhuiakha, aman athishurda yorra.

²⁸"Kha mi nilala, sha̱kei nilala, awui khalei lui nilala, kachikathā akhana ili tharchigat kahai khikha mayorpaimara, kala mangatangkhuirarmara. Tharchigat kahai saikora ili tharmathengmeikap kajena. ^a a v28 "Tharchigat kahai" ot akha chi latung makhavai thāda ithumwui Avāli mihaira—lokhuiluida yorda masākhavai thāda tharchigat kahaina.

²⁹"Tharchigat kahai mi khipākha mangatangkhuirarmara; ali shaothatra.

³⁰"Ngaleiwui tithe saikora, ngaleiwui athā nilala, thingrongwui athei nilala, iwuina; ili katharana. ³¹Kachikathā akhana awui tithe ngachai ngatangkhuiakha, chili akhum phangāwui akha mataida sangra. ³²Yaokahomawui lijei azingli kāda khalei seishang eina yaoshangwui tithe saikora ili katharana. ³³Ana chi shiya kajila phāya kajila mayangpaimara, lah chiwui vang khangatei masangpaimara; sāakha, chi kala chiwui vang khangatei sang kahai, khanini kathara ngasāhaora, kala mangatangkhuirarmara."

³⁴Ithumwui Avāna Sinai Kaphungli Israelnaobingwui vang Mosesli hāngkahai ningkhamibing chi hina.