Pāngmonshi 26

26 ¹"Nathumna khalattawui vang meoma̱ arema masākhuipaimana, ruksang ama̱ lah lungshom mashompaimana, lah chili khorum khavai nathumwui ngaleili ruksang lung mashompaimana; kaja I nathumwui Avāna.

²"Iwui sabbathbing chi mayonlu, kala iwui kathara shim chili khayāshilu; I nathumwui Avāna.

³"Nathumna iwui shiyan-chikan alungli zatta, iwui ningkhami mayonda chi sāchingakha, ⁴Ina chiwui atamli zingrot mira; ngaleina chiwui heiun matheira, kala luili thingrongna athei matheira. ⁵Nathumwui mā naikashi atamna drakhāthei hātki atam samphangra, kala drakhāthei hātki atamna athā yaoki atam samphangra; nathumwui kashakazā zākashap zākhuira kala nathumwui ngaleili ningtāphup eina somra.

⁶"Ina ngaleili chingri kahai mira; samachit khipākha maleila nathum ngasāmra. Ina makaphā sāyurbing ngalei chiwui eina khuithuira, kala raighai nathumwui ngaleili makāmara. ⁷Nathumna nathumwui yangkashebingli kharomra, kala athum nathumwui mangāli raighai eina pitāra. ⁸Nathumwui ngachaili phangāna shākha kharomra, kala shākhana thing tharā kharomra; nathumwui yangkashebing nathumwui mangāli raighai eina pitāra.

⁹"Ina nathumshong ngayangra, nathumli athei matheida mataisangmira, kala nathumli iwui tuingashit singpapamra. ¹⁰Nathumna aruila kasāngkha kazipsang kahai kashakazā phazāchingra, kadharwui vang apong sākhavai chi khuishokra. ¹¹Ina nathumwui alungli iwui pamkhavai sāra, kala iwui wuklungna nathumli makhalanmara. ¹²Ina nathumwui alungli zatra kala nathumwui Avā ngasāra, kala nathum iwui naongarā ngasāra. ¹³I nathumwui Avāna, nathumli Egypt ngalei chiwui eina thānkashoka, chithāda sāda nathum Egyptnaobingwui rao masāluimara. Ina nathumwui langkonthing sātekmida nathumli nganingtitta zatngasaka.

Avāwui Kharāk

¹⁴"Kha nathumna ili manganāmada, ningkhami saikora hi masaakha, ¹⁵iwui shiyan-chikan khalanda, nathumwui wuklungna iwui sharphahor ningkachaida, iwui ningkhami saikora masāla iwui tuingashit kaihaiakha, ¹⁶chithākha inala nathumli hi sāra: nathumli kashuirak khangachee, kala mik sāshimānmi mirin kānmi kaji shimānkapai kazāt kala kakharur chihovāra. Nathumna nathumwui athā arema eina yaora, kaja nathumwui yangkashebingna chi phazāra. ¹⁷Ina nathumli ngakaida imai ngayangra: nathum nathumwui yangkashebingwui mangāli hortāhaira, nathumli yangkakharingbingna nathumwuitungli mungra, kala khipākha nathumli mashurla nathum yāmra.

¹⁸"Hi sāhailala arui eina tangda nathumna ili nganā maningakha, ina nathumwui moreiwui vang eina nathumli shini shida hāngmachinra, ¹⁹Ina nathumwui lāngkaso yāng chi sātekmihaora, kala nathumwui khamasai chi mari thāda, nathumwui ngalei chi pithrai thāda sāra. ²⁰Nathumwui yāng chi arema kanhaora: nathumwui lui chiwui theishirai mavaimara, kala ngaleiwui thingrongbingna athumwui athei mavaimara.

²¹"Nathumna ili makhamayā zatta, ili nganā mamayāmada, ina nathumwui moreiwui vang eina shini shida kashao taisangra. ²²Ina nathumli makhamayā sāyur chihovāra. Athumna nathumwui naongarāli khuithuira, nathumwui sha̱keili shimit sāra, nathumli mateo ngasakra, kala nathumwui shongfabing ngachakyang ngasakra.

²³"Hi chinala nathumli iwuili ning mangatei ngasakakha, kala nathumna ili makhamayā zatchingakha, ²⁴chithākha inala nathumli makhamayā zatta, inala nathumwui moreiwui vang eina shini shida shaora. ²⁵Tuingashitwui athut hāngsang khavai ina nathumwuili raighai akha khuirāra. Nathumna nathumwui keinungbingli rākazip tharan, ina nathumwui ngachaili kazātkashi chihovāra, kala nathumli yangkashewui pāngli horsangmira. ²⁶Ina nathumwui kashakazā ngarum chi sātek tharan, sha̱nao tharāna meiphung akhali chi shokngasakra kala kharit eina ngatakta nathumli mira; nathumna zālaga mahanungmara.

²⁷"Kala hi sāhailala nathumna ili nganā maningla, ili makhamayā zatchingakha, ²⁸chithākha ina malungkhavāt eina nathumli makhamayā zatta, ikhalattana nathumwui moreiwui vang eina shini shida hāngmachinra. ²⁹Nathumna nathumwui naomayarabingwui asā zāra, kala nathumwui naongalāva̱bingwui asā zāra. ³⁰Ina nathumwui kajujuipam chi sāshimānra, nathumwui nganamkaphā hanphutbing sātekmira, nathumwui kathingunbing chi nathumwui meoma̱bingwui kathingun tungli phāsangra, kala iwui manglā china nathumli ningkachaira. ³¹Ina nathumwui keinungbing chi ramcho sāra, nathumwui kathara shimbing hupta sākazamra, kala nathumwui ningyāngkhaung nganamkaphā chi manganammara. ³²Ikhalattana ngalei chi ramcho sāra; chili sompam nathumwui yangkashebing chiwui vang matakhakhaira. ³³Ina nathumli yurbingwui ngachaili chaiyāngmi kala nathumwui thili raighai khalangshokra; nathumwui ngalei chi ngachakyang ngasāra kala nathumwui keinungbing chi ramcho ngasāra. ³⁴Chithākha nathum nathumwui yangkashebingwui ngaleili leilakha, ngalei china chiwui ramcho leiwui atam saikorali chiwui sabbathbing ringphākhui; chithākha chi ngasāmda chiwui sabbathbing ringphākhui. ³⁵Ngachakting eina khaleiwui atam saikorali ngalei chi ngasāmra; nathum chili pamda leilakha nathumwui sabbaththang masamphangakha ngasāmkakhui chi samphangra.

³⁶"Athumwui yangkashebingwui ngaleili, nathumwui alungli leiching kahaibingwui ningli ina ngazan sangmira. Phankazata thingnāwui akhonna athumli kharomra; athumna raighai eina yāma thāda yāmra, kala khipākhana makharomlala pitāra. ³⁷Khipākhana makharomlala, athumna raighai eina yāma thāda kha̱mishimāli ngaphokra; kala nathumwui yangkashebingwui mangāli nganing khavai yāng maleimara. ³⁸Nathumna yurbingwui alungli shimānhaora, kala nathumwui yangkashebingwui ngaleina nathumli mayuisanga. ³⁹Nathumwui alungli leiching kahaibingna, nathumwui yangkashebingwui ngaleili athumwui khayonkhamāngli ja̱tāhaora; kala athumwui avāva̱ ngarāwui khayonkhamāngwui vangla, athumla ngasoda ja̱tāhaora.

⁴⁰"Kha athumna athumwui khayonkhamāng kala athumwui avāva̱ ngarāwui khayonkhamāng, iwuitungli sākahai kakapiklungli, kala athumna ili ngakaikashi eina okthuida chi einala hāngphatakha, ⁴¹chiwui vang eina inala athumli ngakaikashi eina okthuida, athumli athumwui yangkashebingwui ngaleili khuivā; chitharan athumwui ahui marimkashok wuklung malungkhanima, kala athumwui khayonkhamāng phungakha, ^a a v41 Ahui marimkashok wuklung: kakhumhaoda marar kahai, Vareli ara ngavap makahai wuklung—ahui rimkashok, chiya Vareli kaisera da theingasakwui tuingashitwui khamachut, chiwui eina lakahai. ⁴²Ina Jacobli iwui tuingashit, Isaacli iwui tuingashit, kala Abrahamli iwui tuingashit chi phaningungra, kala ngalei chila ina phaningungra. ⁴³Ngalei chi athumna horhaida, athum maleila ngachaktingda leilakha chiwui sabbaththang samphangra; kala athumna athumwui khayonkhamāng phungra, khikhalajila athumna iwui sharphahor chinhaida athumwui wuklungna iwui shiyan-chikan khalanhaowa. ⁴⁴Chithālala, athum athumwui yangkashebingwui ngaleili leilakha eina tangda, athumli shimān khavai kala athumli sākahai iwui tuingashit kaihai khavai eina tangda ina athumli mayangkharingla makhalanmara; kaja I athumwui Avāna. ⁴⁵Athumwui vang eina ina athumwui avāva̱ ngarāli sākahai tuingashit chi phaningungra, athumli yurbingwui miktāli Egypt ngaleiwui eina thānshokkhame, athumwui Avā sākhavai: I nathumwui Avāna."

⁴⁶Ithumwui Avāna a khalatta eina Israelwui mibingwui ngachaili Sinai Kaphungli Moseswui pāng eina mihaikasā shiyan-chikan, sharphahor, kala ainbing chi hina.