Leviticus 26 FHB Father's Heart Bible™

26 ¹“Tumikhan nijor karne eku daam nathaka murti khan nabonabi, khudi kene bona murti nahole pobitro khamba naban'dhabi, aru etu ke matha tek'ibole tumikhan laga desh te khudi kene bona pathor narakhibi; kilemane Moi tumikhan laga Pitri ase.

²“Tumikhan Moi laga Bisram din khan rakhibi aru Moi laga pobitro ghor ke sonman koribi; Moi tumikhan laga Pitri ase.

³“Jodi tumikhan Moi laga niyom khan te berai aru Moi laga hukum khan mani kene etu khan puro koribi, ⁴Moi tar homoi te borkhon dibo; mati pora tar phol ulabo, aru kheti laga gash khan pora tarkhan laga phol dibo. ⁵Dhaan mara kaam tu angur sabhar homoi tak punchibo, aru angur sabhar homoi tu bijon phela homoi tak punchibo; tumikhan pet bhorta tak tumikhan laga roti khabo aru tumikhan laga desh te surakshit pora thakibo.

⁶“Moi desh te shanti dibo; tumikhan ke bhoi khilabole eku nathaki kene tumikhan ghumabo. Moi khotor jongli janwar khan desh pora hatai dibo, aru tumikhan laga desh te eku tolwar na-ahhibo. ⁷Tumikhan tumikhan laga dushman khan ke khedabo, aru tarkhan tolwar pora tumikhan laga age te girbo. ⁸Tumikhan laga pansjon pora eksoh ke khedabo, tumikhan laga eksoh pora dohazar ke khedabo; tumikhan laga dushman khan tolwar pora tumikhan laga age te girbo.

⁹“Moi tumikhan phale ghuri kene sabo, tumikhan ke phol-phulila bonabo, tumikhan ke bisi bonabo, aru tumikhan logot te Moi laga vachan ke thik koribo. ¹⁰Tumikhan etiya bhi bisi din jama kori rakha purana dhaan khai thakibo, aru notun karne jaga bona bole purana tu ulai dibo. ¹¹Moi tumikhan majot te Moi laga ghor rakhibo, aru Moi laga mon pora tumikhan ke ghin nakoribo. ¹²Moi tumikhan majot te berabo aru tumikhan laga Pitri hobo, aru tumikhan Moi laga bacha khan hobo. ¹³Moi tumikhan laga Pitri ase, jun pora tumikhan ke Mishor desh pora ulai anise titia tumikhan aru Mishor manuh khan laga noukar nathakibo. Moi tumikhan laga joal laga lathi khan bhangai dise aru tumikhan ke sidha pora berabole dise.

Pitri laga Sikhai Diya

¹⁴“Kintu jodi tumikhan Moi laga kotha nahunibo aru etu sob hukum khan puro nakoribo, ¹⁵jodi tumikhan Moi laga niyom khan ke ghin koribo aru tumikhan laga atma pora Moi laga niti khan ke bhal napabo, Moi laga sob hukum khan nakori kene Moi laga vachan bhangabo, ¹⁶titia Moi bhi tumikhan logot te eneka koribo: Moi tumikhan uporte achanak bhoi, suki jua bemar aru suku khotom kora aru jivon kami diya jor ani dibo. Tumikhan tumikhan laga bijon eku kaam nathaki kene phelabo, kilemane tumikhan laga dushman khan pora etu khabo. ¹⁷Moi tumikhan bhirodh te Moi laga mukh rakhibo: tumikhan tumikhan laga dushman khan age te mari phela hobo, tumikhan ke ghin kora khan pora tumikhan uporte raj koribo, aru kun pora tumikhan ke nakhedai le bhi tumikhan polabo.

¹⁸“Etu pichete bhi, jodi tumikhan etiya bhi nahunibo, Moi tumikhan laga paap khan karne tumikhan ke sat guna beshi sajai dibo, ¹⁹Moi tumikhan laga ghamondi laga takot bhangabo, aru tumikhan laga akash ke loha nisina aru tumikhan laga mati ke pitol nisina bonabo. ²⁰Tumikhan laga takot eku kaam nathaki kene kharch hobo: tumikhan laga mati pora tar phol nadibo, aru mati laga gash khan pora tarkhan laga phol nadibo.

²¹“Jodi tumikhan Moi bhirodh te berabo aru Moi laga kotha hunibole mana koribo, Moi tumikhan laga paap khan karne sat guna beshi mar dibo. ²²Moi tumikhan bhirodh te jongli janwar khan pathabo. Tarkhan pora tumikhan laga bacha khan ke chingi lobo, tumikhan laga goru-mer khan ke khotom koribo, tumikhan ke komti bonabo, aru tumikhan laga rasta khan khali koribo.

²³“Jodi etu pora bhi tumikhan ke Moi phale wapas ghurai nani le, aru tumikhan Moi bhirodh te berai thakibo, ²⁴titia Moi bhi tumikhan bhirodh te berabo aru tumikhan ke marbo, Moi bhi, tumikhan laga paap khan karne sat guna. ²⁵Moi tumikhan bhirodh te tolwar ani dibo, vachan laga badla lobole. Jitia tumikhan tumikhan laga sheher khan te joma hobo, Moi tumikhan majot te mora-bemar pathabo, aru tumikhan ke dushman laga hath te di dibo. ²⁶Jitia Moi tumikhan laga roti laga jogar bhangabo, tira maiki khan ekta chulah te roti bonabo aru etu ke joka pora bati dibo—tumikhan khabo kintu pet nabhorabo.

²⁷“Aru jodi etu sob pichete bhi tumikhan Moi laga kotha nahunibo kintu Moi bhirodh te berai thakibo, ²⁸titia Moi khong pora tumikhan bhirodh te berabo, aru Moi nije tumikhan laga paap khan karne tumikhan ke sat guna beshi sajai dibo. ²⁹Tumikhan tumikhan laga chokra khan laga mangso khabo, aru tumikhan tumikhan laga chukri khan laga mangso khabo. ³⁰Moi tumikhan laga uncha jaga khan khotom koribo, tumikhan laga dhup jola bedi khan katibo, tumikhan laga mora gaw khan ke tumikhan laga murti khan laga mora uporte joma koribo, aru Moi laga atma pora tumikhan ke ghin koribo. ³¹Moi tumikhan laga sheher khan ke khandahar bonabo, tumikhan laga pobitro ghor khan khotom koribo, aru tumikhan laga mitha khushbu khan nasunghibo. ³²Moi nije desh ke khali-shuna bonabo; ta te thaka tumikhan laga dushman khan etu dekhi kene asurit hobo. ³³Moi tumikhan ke desh-desh majot te chatrabhatra koribo aru tumikhan laga pichete tolwar ulai dibo; tumikhan laga desh khali-shuna hobo aru tumikhan laga sheher khan khandahar hobo. ³⁴Titia desh tu tar khali-shuna thaka sob din te tar Bisram din khan laga anondo lobo, jitia tumikhan tumikhan laga dushman khan laga desh te thakibo; titia etu arram koribo aru tar Bisram din khan laga anondo lobo. ³⁵Etu khali-shuna thaka sob din te, etu arram koribo—juntu arram tumikhan ta te thaka homoi te tumikhan laga Bisram din khan te etu napaise.

³⁶“Tumikhan majot te bachi thaka khan—Moi tarkhan laga dushman khan laga desh te tarkhan laga mon te komjori rakhibo. Hawa pora uthai niya pata laga awaj pora tarkhan ke khedabo; tarkhan tolwar pora polai juwa nisina polabo aru kun pora nakhedai le bhi girbo. ³⁷Kun pora nakhedai le bhi, tarkhan tolwar pora polai juwa nisina ekjon-ekjon uporte thokor khai kene girbo, aru tumikhan laga dushman khan age te khara hobole takot nathakibo. ³⁸Tumikhan desh-desh majot te khotom hobo, aru tumikhan laga dushman khan laga desh pora tumikhan ke gili dibo. ³⁹Tumikhan majot te bachi thaka khan tarkhan laga dushman khan laga desh te tarkhan laga dosh pora khotom hoi jabo; aru, tarkhan laga baba khan laga dosh karne bhi, tarkhan tarkhan logot te khotom hoi jabo.

⁴⁰“Kintu jodi tarkhan tarkhan laga dosh aru tarkhan laga baba khan laga dosh shikar koribo, Moi bhirodh te kora tarkhan laga dhoka laga kaam te, aru tarkhan Moi phale dushmani pora bera etu bhi, ⁴¹etu karne Moi bhi tarkhan bhirodh te berai kene, tarkhan ke tarkhan laga dushman khan laga desh te ani dise—jodi titia tarkhan laga sunnot nakora mon tu nijor ke niche koribo aru tarkhan tarkhan laga dosh laga daam dibo, ^a a v41 Sunnot nakora mon: bondh aru tan hoi juwa mon, etiya tak Isor ke nije nadiya — sunnot tu Tar logot te thaka laga vachan laga chihna ase, etu pora loa kotha. ⁴²Moi Jakob logot te Moi laga vachan ke yaad koribo, aru Ishak logot te Moi laga vachan, aru Abraham logot te Moi laga vachan, aru Moi desh ke yaad koribo. ⁴³Desh tu tarkhan pora chari dibo, aru tarkhan nathaki kene khali-shuna thaka homoi te tar Bisram din khan laga anondo lobo; tarkhan tarkhan laga dosh laga daam dibo, kilemane tarkhan Moi laga niti khan ke ghin korise aru tarkhan laga mon pora Moi laga niyom khan ke pelai dise. ⁴⁴Eneka hoile bhi, jitia tarkhan tarkhan laga dushman khan laga desh te thakibo, Moi tarkhan ke khotom koribole aru tarkhan logot te Moi laga vachan bhangabole tak tarkhan ke ghin nakoribo aru pelai nadibo, kilemane Moi tarkhan laga Pitri ase. ⁴⁵Tarkhan karne Moi tarkhan laga purbo-manuh khan logot te kora vachan ke yaad koribo, jun khan ke Moi desh-desh laga suku age te Mishor desh pora ulai anise, tarkhan laga Pitri hobole: Moi tumikhan laga Pitri ase.”

⁴⁶Eitu khan niyom, niti, aru ain khan ase juntu amar Pitri pora Sinai Pahar te Musa dwara Tar nije aru Israel laga manuh khan majot te dise.