Chapchāt 4

4 ¹Sinā chi kathāda mamachāhaokhala, sinā kachanga chi kathāda onhaowa! Kathara ngalungbing chānrei achikun kachida ngapha̱ eina lei. ²Khareli sinā kachanga thāda aman kasaka Zionwui naomayarabing, ara athumli kathāda ham kasemawui pāng eina kasā ngalei ham thāda shānkhui! ³Ramfabinglala na̱ mida athumwui anaongarāli nganaomi, kha iwui mibingwui naongalāva̱ chi siwuk khamasaili ostrichbing thāda sāshilak ngasāthuihaira. ^a a v3 Khare atamli okathuili, ostrichbing chi athumwui atuibing kala anaongarāli horhailakwui vang minga ngasāsai — anaowuitungli sāshi kasāwui khangachā thāda kai. ⁴Na̱ mangkasā angangnaowui male chi ra̱kachangwui vang akhamor tungli shurchinga; naoshinaobingna zāt phā, kha khipākhana athumli zāt ngahomkha mamimana. ⁵Khareli zākaphā zākahaibing chi ara chānreili ngachakyāng eina pi; hungrisi khamanaka ngavaida rar kahaibing chi ara hotlāpamli shurchinga. ⁶Iwui mibingwui naongalāva̱wui khayonkhamāng chi miwui pāng akhanida masāza̱la hunkha akhali ngakhuntā kahai Sodomwui morei einala reikhameiya. ⁷Awui wungnaobing chi horam einala tharmei, seina̱ einala charra; athumwui phasā coral einala maiwon shokmei, athumwui zakmai sapphire kathāna. ⁸Ara athumwui zakmai hotla einala tangmangmei; chānreili athumli mina machutkhuimana. Athumwui kachui ara̱kuili nganukhaira; thing thāda thenghaira. ⁹Kathaina shaothat kahaibing einala raighai eina yortā kahaibing chi phāmei; athumna shimānhaida, luiwui kashakazā mavātwui vang kathaina rungthat ngasaka. ¹⁰Lukhamashan leikashi sha̱naobingwui pāngna athumwui khalattawui naoshinaoli hangshaihaira; iwui mibingwui naongalāva̱ shimānhai tharan, athumwui shaikaphā ngasāhaira. ¹¹Ithumwui Avāna awui malungkhavāt katonga heitāhaira; awui malung kasā heirormihaira, kala Zionli mei sākāhaira, chi awui shimphungabing chuitāhaira. ¹²Yangkashe lah yangkashe akhana Jerusalemwui ngaveibingli zangkapai chi okathuiwui awungabingna mashitsangmana, okathuili yaorā kahaibing khipākhanala mashitsangmana. ¹³Hi awui marānbingwui moreiwui vang kala awui pāngmonbingwui khayonkhamāngwui vangna; athumna awui alungli khangarongabingwui ashee tākhangasaka. ¹⁴Athumna mik khangapeo thāda chānreili yāmkazata, asheena makhao ngasakhaira, chithāda khipākhana athumwui kachonbingli masingpaimana. ¹⁵"Thuihaolu! Makathara!" da mibingna athumli vaomi. "Thuihaolu! Thuihaolu! Masingalu!" Chieina athum yāmhaida yāmkazata, kala yurbingwui ngachaili hānga, "Athum hili longa mapamluimara." ¹⁶Ithumwui Avāwui mangāna athumli kashamyāng ngasakhaira; ana athumli longa mayangluimara. Pāngmonbingli khayā masamphangmana, kasarnaobingli ngahānkhangai masamphangmana. ¹⁷Ithumwui mik ngachonmi khavai aremali yangda ngazanhaira; ithumwui dolanbingwui eina, huimikapai makhalei yur akhali ithumna yanga. ¹⁸Athumna ithumwui pheikār ra̱yangpama, chieina ithumna ithumwui chānreili mazatlakmana. Ithumwui athit nganaihaira, ithumwui atam shānhaida khaleihaira, kaja ithumwui athit unghaira. ¹⁹Ithumwui kakharomabing kazingwui khalāngli thākmei; athumna kaphungli ithumli kharoma, kala lamhāngli ithumli rimpama. ²⁰Ithumwui kharing khaksui, ithumwui Avāwui thao neomi kahai, athumwui chomli khuithuihaira; awui maramli ithumna hānga, "Awui khaya̱ azingli ithumna yurbingwui ngachaili ringra." ^b b v20 "Awui khaya̱ azingli" da hāngkahai hi Hebrewbingwui chingri pamwui aka̱lāna—awungawui khaya̱ azingli ringa jikahaina awui chāngvei azingli ringa da kapihaina. ²¹Ringphālu kala mathānlu, O Edomwui naongalāva̱, na Uz ngaleili kapamava̱; kha awui malungkhavātwui tengkot nalila rāza̱ra; na mariphaora kala nakhalatta raikorshitra. ²²Nawui tandi khami kāshunghaira, O Zionwui naongalāva̱; ana nawui raithā masāngsangmira. Kha nawui khayonkhamāng, O Edomwui naongalāva̱, ana chi tandi mira; ana nawui morei tāngngasakra.