Kagowal toroornatetap Zion koek oreek
Kagobiriritu thahabu, pounik che ki leelach kosiir teluji nguno ma kiing'en eng' ortinwek, kamet che yamei che saaei lagokwak magatyat. Komwa chii ne riirei kole ki po tengektap maotik ak tisiik che ki ish korotiik che ma tinyei tengek, ak kole maat ne ki beel itoondogap Zion ko ki po angeetap Kwandanyo ne ki iluul.
4 1Oo, kagobiriritu thahabu, kagowalak thahabu ne tiliileen miising'! Kagiaiyeste koik che torooreen eng' pesiap oor tugul. 2Lagogap Zion che po kamanuutyet ne oo, che ki kergei ak weigeiwekwak che po thahabu ne myee, kagegeer nguno ko uu tereenik che po ng'ung'unyek, poisyetap eunegap yaindetap tereenik! 3Agot segemik koonu tagateet ak koget moekwak, ago kagowal tiibiigap piikyuk koek ne koroom, ko uu wok che mi surkwen. a a v3 Ki kiing'en woik eng' emet ne po keny amu laktei inoikwak ak moekwak; nooto ko ng'olyoot ne boorun koroomnatet eng' lagok. 4Ng'elyeptap lakweet ne chuchuni konam parak eng' kutit eng' melelda; saaei lagok magatyat, ago ma koonchini chiito age tugul kebeberta. 5Icheeget che ki amei tuguuk che iboiboi nguno ko kagobek nyalilda eng' ortinwek; icheeget che ki eetu ko ilaachi ngoroik che karaaran nguno ko namgei keburusyegap oreek. 6Oo ng'oogistap tiibiigap piikyuk kosiir tengektap Sodom, ne ki kiwirakta eng' sait kityo, ago ma kiinde eutap chii koluul. 7Ki tiliileen pounikyik kosiir teluji, ki leelach kosiir cheego; ki rosyina borterikwak kosiir koik che bireen, ko uu itoondokwak sapphire. 8Nguno ko biriribirik itoondokwak kosiir oreegap maat; ma kiing'en icheek eng' ortinwek. Kagong'olol indakwak eng' koikwak; kagotyen ko uu keetit. 9Ki karaaran icheeget che kibar rotweet kosiir icheeget che kibar rubeet, che kisagitos, kitoor eng' rubeet amu mararwo amitwogik che punu mbareenik. 10Eunegap kwonyiik che tinyei rireenet ki iyoe lagokwak; kagoek amitwogikwak ye king'em tiibiigap piikyuk. 11Kaiberuur Kwandanyo nereegennyi tugul; kaibukta angeennyi ne lalei ak kinde maat eng' Zion ne kaam lumeiywekyik. 12Ma kiyan laitorinigap ng'wony, anan chiito age tugul ne menye eng' ng'wony, kole puunyoot anan koroonyoot kochut kurgotigap Jerusalem. 13Ki agobo tengektap maotikyik ak ng'oogistap tisiikyik, che ki isururunee eng' kwenunnyi korotiigap che imanat. 14Ki koombenot kooturik eng' ortinwek, ki kong'em eng' korotiik, si ma kotwa chii age tugul ngoroikwak. 15“Omande! O che ma tiliil!” ki kuurchi icheek piik. “Omande! Omande! Matotwae!” Ki mwei icheek anyun ak koombenot, ak ki kimwa among emotinwek, “Ma kimuuchi kotebi yu kogeny.” 16Kaiyesta taitap Kwandanyo icheek; ma kogeer icheek kogeny. Ma kigoochi tisiik koet, ak ma kigoochi boisiek myeeindo. 17Kaimenitu konyekyok kigeer toreteet eng' tangoi; eng' tuloogap riibeennyo kigeer emet ne ki ma kimuuch koyetu. 18Ki kisup tyegutikyok si ma kibendi eng' ortinwekyok. Ki koneegit letennyo, ki kaginai peetuusyekyok, amu kagonyo letennyo. 19Ki chepcheben piik che cheeng'oech kosiir kipsichinik che mi kipsengwet; ki cheeng'ech eng' tuloonook ak ki kounygei si konamech eng' surkwen. 20Kabuusetap saboondanyo, ineendet ne ki kiilaat ne po Kwandanyo, ki kinam eng' keriingonigwak—ineendet ne ki kemwa agobo, “Eng' urwennyi ko kesabeeni kwenutap piik tugul.” b b v20 “Eng' urwennyi” ko ng'aleekap Heburiik che boorunei ruuret — kesaben eng' urwetap laitoryat ko kole kesaben eng' riibetennyi. 21Poiboi ak iloskei, tiibiigap Edom, inyee ne menye emet ne po Us; ago kobwonjin kora kibirketap angeennyi— iyewe ak ireegunegei ngoroiguk. 22Kagobata kergong'yeng'ung', tiibiigap Zion; ma tuun kotesyi kamutetang'ung'. Ago tengektong'ung', tiibiigap Edom, tuun kokergong'in; tuun kong'ang'agis tengekwogik.