Phaningunglu, Ithumwui Avā
Ngayung kahai mibingna ngasoda tuihāngi kala leikashok ot mashingi: athumwui tara̱ lupā eina lokhui, raobingna athumli kharomkai, sha̱naobingli ngasopihaira, khararnaobingli tāmngasāk, pheichak chapkhangachāli ongkahaira. Athumna morei hāngphatta, ithumwui Avāna tangda kaso wungkharāna da hāngphatta, chieina kadhikha ithumli maphaningkhala da ngahāna. Ngahān khikha marāmana.
5 1Ithumwui Avā, ithumli khisa shokkahai chi phaningunglu; yanglu, kala ithumwui maikashi theilu. 2Ithumwui shimlui kha̱mibingli, ithumwui shim yur kateibingli horsangmihaira. 3Ithum marānao, avāva̱ makhalei ngasāhaira; ithumwui ava̱ ngarā ra̱meiva̱ thāhaira. 4Ithumna tara̱ mangkhavai lupā mihaira; meira̱hun eina tangda lupā eina lokhuira. 5Ithumwui kakharombingna ithumli thākta kharomkai; ithum chotchānghaira, ithumli ngasāmkakhui makhamimana. 6Kashakazā chirchomri kahai samphangkhavaiwui vangmāng ithumna Egypt eina Assyriali hamsanghaira. 7Ithumwui avā ngarāna morei sāhaira, kha ara maleithuwa; kala athumwui tandi khami ithumna phungkahaina. 8Raobingna ithumwuitungli munga; athumwui pāng eina ithumli ningkhān ngasak khavai khipākha maleimana. 9Lamhāngli khalei raighaiwui vang, ithumna ithumwui mirin hamlaga ithumwui kashakazā phākhui. 10Ithumwui ahui meiphung thāda kāngkhaira, chāmreiwui kasā kachuina phuithathaira. 11Zionli sha̱naobingli, Judahwui keinungbingli kachingva̱bingli ngasopihaira. 12Wungnaobingli athumwui pāng eina hokthānghaira; khararnaobingli khayā makashiya. 13Yaronnaobingna mā rungra; naoshinaobing thing otphun phunglaga jakchāngchāng zata. 14Khararnaobing keinung ngavei eina, yaronnaobing athumwui laa eina thuihaira. 15Ithumwui ningwui khamathān chingrihaira; ithumwui pheichak chapkhangachāli ongkahaira. 16Ithumwui kuiwui eina kuihon pitāhaira. Ithum kakhanang ngasāranu, kaja ithumna morei sāhaira! 17Hiwui vang eina ithumwui ning vānhaira; hi saikorawui vang eina ithumwui mik mamachāhaira. 18Kaja Zion Kaphung ngachakyānghaira; chiwuitungli ramfana zata.
19Nava, ithumwui Avā, mashimānda wungpamkhongli pamchinga; nawui wungpamkhong thot kachida leichinga. 20Khisāda ithumli katang makhavai malaichaohaokhala, atam kasāngkha ithumli horhaokhala? 21Ithumwui Avā, ithumli nawuili khuisangmiluilu, chieina ithum latungra; kharewui tākam eina ithumwui atam semkaluishitlu, a a v21 Ngayāngwui kachap khamataiwui thili, Lamentations chi khanaoli ali raimikhui khavai ot akhamāng chili phai — chi Avāli mai ngareiung kaji china. Hi saikorana hili shangda ngareida lei: shimli latunglu. 22Nana ithumli khalanchaohaida, kala ithumwui eina ngashānla machaomana malungvāthaira maningakha.
