Rangarirai, Baba vedu

Vakasara vanotaura pamwe chete uye vanoverenga zvasara: kutenga mvura yavo pachavo, varanda vachivatonga, vakadzi vachibatwa chibharo, vakuru vachinyadziswa, kutamba kwashanduka kuva kuchema. Vanoreurura chivi, vanoreurura kuti Baba vedu vanotonga nokusingaperi, ipapo vanobvunza kuti sei vachivakanganwa. Hapana mhinduro inouya.

Chitsauko 5.

Rangarirai, Baba vedu, zvakatiwira; tarisai muone kunyadziswa kwedu. Nhaka yedu yakapiwa vaeni, misha yedu kuvatorwa. Tava nherera, tisina baba; vanamai vedu vafanana nechirikadzi. Tinotenga mvura yedu kuti tinwe; kunyange huni dzinotidhura. Vatidzingiriri vedu vari pamitsipa yedu; taneta, hatipiwi zororo. Takazviisa pasi peIjipiti neAsiria kuti tiwane chingwa chakakwana. Madzibaba edu akatadza, havachipo; isu tinotakura kurangwa kwavo. Varanda vanotitonga; hapana angatisunungura paruoko rwavo. Tinoisa upenyu hwedu panjodzi kuti tiwane chingwa chedu, nokuda kwomunondo uri murenje. Ganda redu rinopisa sechoto, rakatsva nokupisa kwenzara. Vakadzi vanochinyiwa muZioni, mhandara mumaguta eJudha. Machinda akaturikwa namaoko awo; vakuru havakudzwi. Majaya anoshanda zvakaoma paguyo; vakomana vanodzedzereka vakatakura mitoro yehuni. Vakuru vabva pasuo reguta, majaya asiya mimhanzi yawo. Mufaro womwoyo yedu waguma; kutamba kwedu kwashanduka kukava kuchema. Korona yawa pamusoro wedu. Tine nhamo, nokuti tatadza! Nokuda kwaizvozvi mwoyo yedu yapera simba; nokuda kwezvinhu izvi meso edu asviba. Nokuti Gomo reZioni rava dongo; makava anofamba-famba pamusoro paro.

Imi, Baba vedu, munogara pachigaro choushe nokusingaperi; chigaro chenyu choushe chinogara kubva kuchizvarwa kusvika kuchizvarwa. Munotikanganwireiko nokusingaperi, muchitisiya mazuva mazhinji kudai? Tidzorerei kwamuri, Baba vedu, tigodzoka; vandudzai mazuva edu sezvaaiva kare, ^a kunze kwokunge matiramba zvachose, uye makatitsamwira zvikuru kupfuura mwero.