Isaiah 37

37 ¹Awunga Hezekiahna chi kashā tharan, kachon serkhaklaga sifa kachon ngavaida ithumwui Avāwui shimli kai. ²Ana Eliakim mantri, Shebna kapime, kala bora ngavailaga pāngmon khararbing chi Amozwui naomayara marān Isaiahli chihovā. ³Athumna ali hānga, "Hezekiahna hānga: Aja zimiksho hi ningkachot, kakharar, kala mana̱kashiwui zimikshona. Naoshinao naosak khavai atam ungshunghaira, kha athumli naosak khavai yāng maleimana. ⁴Nawui Avāna, awui akhavā Assyriawui awungana kharinga Avāli mana̱shi khavai chihovā kahai Rabshakehwui tui saikora shālaga, kala ana shākahai tui chi kaharra. Chiwui vang eina ringda khalei shākkahaibingwui vang seihā reingasaklu." ^a a v4 Rabshakeh hi mi akhawui aming maningla; hi Assyria awungawui raimibingwui akhoka otva̱wui aming china.

⁵Awunga Hezekiahwui raobingna Isaiahli khavā tharan,

⁶Isaiahna athumli hānga, "Nathumwui akhavāli hithāda hānglu: ithumwui Avāna hithāda hānga: Nathumna shākahai tui, Assyriawui awungawui raobingna ili hāngmachina tui chili mangacheelu. ⁷Yanglu, ina awui lungli manglā akha haira; chieina ana chānpao akha shālaga awui ngaleili latungra, kala chili ina ali raighai eina pitā ngasakra."

⁸Awunga Lachishwui eina thuihaira da kashā tharan, Rabshakehna latunglaga Assyriawui awunga chi Libnahli ngarar sāda leilakha theihaowa. ⁹Awungana Cushwui awunga Tirhakahwui pongli, "Nali ngarar khavai ana shokhaira," da kashā tharan, ana Hezekiahli paomebing chihovāda hānga: ¹⁰"Judahwui awunga Hezekiahli hithāda hānglu: Nana ningnganung Varena, 'Jerusalem Assyriawui awungawui pāngli mapitāmara' da hāngda nali machipat ngasakalu." ¹¹Assyriawui awungabingna ngalei kachiva̱ sākazammiserhaira kaji nana shāhaira. Kala nali kanmirala? ¹²Ishāvāna sākazami kahai Gozan, Haran, Rezeph, kala Telassarli khalei Eden yurbingli yurbingwui varebingna ngatangshokhami leihairala? ¹³Hamath, Arpad kala Sepharvaim keinungwui awungabing, kala Henawui kala Ivvahwui awungabing kachili leilikhala?"

Avāwui Mangāli Hamiza

¹⁴Hezekiahna paomebingwui pāng eina chithi chi khuilaga pālaga, ithumwui Avāwui shimli kailaga, ithumwui Avāwui mangāli chi hamiza. ¹⁵Kala Hezekiahna ithumwui Avāli seihā sāda hānga: ¹⁶"Saikorawui Avā, Israelwui Avā, cherubimwuitungli wungpamkhongli kapama, na māngna okathuiwui wungram saikorawuitungli ithumwui Avāna; nana kazing eina ngalei sāhaira. ¹⁷O ithumwui Avā, nāshungda khanganāmilu; O ithumwui Avā, namik eina khayangmilu; Sennacheribna kharinga Avāli mana̱shi khavai khangasak rāhāng tui saikora chi shāmilu. ¹⁸Mashungla, O ithumwui Avā, Assyriawui awungabingna yur saikora kala athumwui ngalei sākazammiserhaira, ¹⁹kala athumwui varebing meili horkhuihaira; kaja athum vare maningla, miwui pāng eina kasā thing kala lungna; chiwui vang athumna sāshimānhaira. ²⁰Ara, O ithumwui Avā, okathuiwui wungrambingna na mangmāng ithumwui Avāna da theikhavai, awui pāng eina ithumli huimilu."

Avāna Ngahānkāmi

²¹Chieina Amozwui naomayara Isaiahna Hezekiahli hithāda chihovā: Israelwui Avāna hānga: Assyriawui awunga Sennacheribwui pongli nana ili seihā sākahaiwui vang,

²²hi ithumwui Avāna awui pongli hānghaikasā tui china: "Zionwui kachingva̱ naongalāva̱na nali ningkachai, nali mana̱shi; Jerusalemwui naongalāva̱na na khanukli akui shaksāmi. ²³Khipāli nana mana̱shida zeihaira? Khipāli nana akhon khāngkakā kala khayāning eina mik khāngkakāhaira? Israelwui Kathara Alina! ²⁴Nawui raobing eina Reikhamatai Avāli mana̱shihaira, kala nana hānghaira, 'iwui siguigari kachungkhana kaphungbingwui kajuili, Lebanonwui akatanga eina tangda vākāhaira. Chiwui cedarthing talla̱khon kala cypressthing mathāmeikap ina ta̱teka; chiwui juipam tāmeikap kala ngahong shāmataimeikap chili ina vāshunga. ²⁵Ina ra̱khong khonda tara̱ chi manga; ipheiwui mayā eina Egyptwui kongrā saikora hupta theng ngasaka.' ²⁶Nana mashāhairaola? Achālakhawui eina ina chi sāhaira; achālakhawui atam eina ina chi phaningkasā thāhaira. Ara ina chi shokngasakhaira, chieina nana raipan sākahai keinungbing chi ruinganai akhumli onngasakra. ²⁷Athumwui kapambingna, athumwui yāng raimihaida, malung ringhaira maishi ngasakhaira; athum lui alung thāda, khawo phor thāda, mahaksangranglakha ngahuitheng kahai shimtungli kaphor khawo thāda ngasāhaira. ²⁸Kha nana pam tharan, nana shimen vā tharan, kala nana alungli rā tharan, kala nana ili malungvāt tharan, ina theihaira. ²⁹Nana ili malungvāt kahaiwui vang, kala nawui khayāning iwui khanāli rāshunghaira, ina iwui khaisui nawui nātāngli sangra kala iwui nārenra̱ nawui khamorli sangra, kala nawui rākahai shongfa eina ina nali latung ngasakra.

³⁰"Hi nawui vang machut china: zingkum hili nana akhalatta kharshok kahai chi shaira, zingkum kakhaneli chiwui eina phor kahai chi, zingkum kakathumali nana yaolaga hātkhuira, drakhā yāmgui sāsanglaga chiwui athei shaira. ³¹Kala Judahwui shimkhurwui shākkahaibingna luishitlaga latluida angayung sa̱khuida kajui athei matheira. ³²Kaja Jerusalemwui eina shākkahai taishokra, kala ringkasā khumkha china Zion kaphungwui eina shokra. Kazingram raimibingwui Avāwui lungchan china hi ungshungmira.

³³Chiwui vang eina ithumwui Avāna Assyriawui awungawui pongli hithāda hānga: Ana keinung hili mazangrarmara, lah hili malā mathairāmara, chāngvei eina chi mangasungmara, lah chili kuimareida rampho masāmara. ³⁴Ana rākahai shongfa eina latungra; ana keinung hili marāmara, da ithumwui Avāna hānga. ³⁵Kaja I khalatta eina iwui rao Davidwui vang, keinung hi kankhui khavai ina ngākmira."

³⁶Chieina ithumwui Avāwui kazingrao china vāda Assyria mibingwui rāmrahli mi lakh akha thing hangchishatta phangā sāthathaowa; mibingna ngathorthak kathui tharan, apam kachida kathingun ngasāserhairasai. ³⁷Chieina Assyriawui awunga Sennacheribna latunglaga aramli hanunghaowa, kala Ninevehli pamsanghaowa. ³⁸Nisroch awui varewui shimli khorumda ana leilakha, awui naomayara khani Adrammelech kala Sharezerna raighai eina sāthathailaga yāmda Ararat ngaleili vāhaowa. Kala awui nao Esarhaddonna awui mahut thuishinhaowa.