Nkele ya Tata Ke Bebisa Siyone
Muyimbi ke zabisa nani salaka mambu yayi. Tata, Mfumu bendaka munani, tezaka kibaka na ntwala ya kubwisa yawu, kumaka mutindu mbeni na Siyone. Bana ke fwaka na maboko ya bamama ya bawu. Ata kima ve ke baka nsuka; mukunga ke lomba kaka ti Tata ya beto kutala mpe kuyindula.
2 1Mutindu Tata, Mfumu na nkele ya yandi me fuka mwana-nkento Siyone na dituti! Yandi me losa katuka na zulu tii na ntoto nkembo ya Isayeli; yandi me yibuka ve kisika ya kutula makulu ya yandi na kilumbu ya nkele ya yandi. a a v1 Kisika ya kutula makulu ya yandi: Yinzo ya Nzambi ya Yelusalemi, kisika ya ntoto yina Nzambi vwandaka. 2Tata, Mfumu me mina na kukonda kyadi bayinzo nyonso ya Yakobi; na nkele ya yandi yandi me bwisa biswamunu ya mwana-nkento Yuda. Yandi me bwisa na ntoto na nsoni kimfumu ya yandi mpe bamfumu ya yawu. 3Na nkele ya ngolo yandi me katula Isayeli ngolo ya yandi nyonso; yandi me vutula diboko ya yandi ya lubakala mpe me bika bawu na ntwala ya mbeni. Yandi me pela na kati ya Yakobi mutindu tiya ya mulaka yina ke nyenga na balweka nyonso. 4Yandi me benda munani ya yandi mutindu mbeni, diboko ya yandi ya lubakala me telama mutindu mutantu; mpe yandi me fwa bantu nyonso yina vwandaka kitoko na kutala. Na yinzo ya lele ya mwana-nkento Siyone yandi me tiamuna nkele ya yandi mutindu tiya. 5Tata, Mfumu me kuma mutindu mbeni; yandi me mina Isayeli. Yandi me mina banzo ya yandi ya nene nyonso mpe me bebisa biswamunu ya yandi, mpe yandi me fulusa matanga mpe mukunga ya kyadi na mwana-nkento Yuda. 6Yandi me bebisa kibumbilu ya yandi mutindu bilanga, yandi me bebisa kisika ya yandi ya lukutakanu. Tata me sala ti Siyone kuvila bankinsi ya lukutakanu mpe sabata, mpe na nkele ya yandi ya ngolo yandi me vweza ntinu mpe nganga-Nzambi. 7Tata, Mfumu me buya kiyokolo ya minkayulu ya yandi, me buya kisika ya yandi ya longo; yandi me yekula na maboko ya mbeni bibaka ya banzo ya yandi ya nene. Bawu tulaka makelele na Yinzo ya Tata ya beto mutindu na kilumbu ya nkinsi. 8Tata ya beto bakaka lukanu ya kubebisa bibaka ya mwana-nkento Siyone. Yandi lambulaka singa ya kutezila; yandi vutulaka ve diboko ya yandi na kubebisa. Yandi salaka ti kibaka mpe lufulu kudila; kintwadi yawu bwaka na kubeba. 9Myelo ya yandi me zinda na ntoto; yandi me bebisa mpe me buka bikangulu ya yandi. Ntinu ya yandi mpe bana-bantinu ya yandi kele na kati ya makanda; nsiku kele dyaka ve, mpe mimbikudi ya yandi ke mona dyaka ve balumoni yina ke katukaka na Tata ya beto. 10Bakuluntu ya mwana-nkento Siyone ke vwanda pi na ntoto; bawu me losa fundu-fundu na mintu ya bawu mpe me lwata bilele ya matanga. Bana-bakento ya Yelusalemi me yinama mintu ya bawu tii na ntoto. 11Meso ya munu me lemba na kudila; kivumu ya munu ke tekita na kati; ntima ya munu me tiamuka na ntoto samu na mbebisa ya mwana-nkento ya bantu ya munu, ntangu bana mpe bana ya mabele ke lemba na banzila ya mbanza. 12Bawu ke bokila bamama ya bawu: «Wapi mampa mpe vinu?» ntangu bawu ke lemba mutindu bantu ya me lwala na banzila ya mbanza, ntangu luzingu ya bawu ke tiamuka na maboko ya bamama ya bawu. 13Inki mu lenda tuba samu na nge, na inki mu lenda fwanikisa nge, Yelusalemi mwana ya kento? Inki mu lenda fwanikisa na nge, samu ti mu lembisa nge, Siyone mwana-ndumba? Samu ti kubeba ya nge kele nene mutindu mubu; nani lenda belusa nge? 14Mimbikudi ya nge me mona samu na nge balumoni ya luvunu mpe ya kukusa; bawu monisaka ve disumu ya nge samu na kuyidika dyaka mambu ya nge, kasi bawu me mona samu na nge bansangu ya luvunu mpe ya kukusa. 15Bantu nyonso yina ke luta ke bula maboko samu na nge; bawu ke siwula mpe ke ningisa bayintu ya bawu samu na Yelusalemi, mwana ya kento: «Keti yayi ni mbanza yina ba vwandaka bokila kitoko ya kukuka, kyese ya ntoto ya mvimba?» 16Bambeni ya nge nyonso ke fungula bayinwa ya bawu samu na nge; bawu ke siwula mpe ke kuata meno mpe ke boka: «Beto me mina yandi! Yayi ni kilumbu yina beto vwandaka vingila; beto me mona yawu, beto me tala yawu!» 17Tata ya beto me sala yina yandi kanaka; yandi me manisa mpova ya yandi yina yandi tumisaka katuka ntama. Yandi me bwisa na kukonda kyadi; yandi me bika nde mbeni kuyangalala samu na nge mpe me tombula ngolo ya mitantu ya nge. 18Ntima ya bantu bokilaka na sika ya Tata, Mfumu. Kibaka ya Siyone, mwana ya kento, bika nde mansangasa kutyama mutindu muzumba, mwini na mpimpa! Kupesa nge mosi kupema ve, meso ya nge kupema ve. 19Telama, boka na mpimpa na luyantiku ya konso lukengolo ya mpimpa! Dukula ntima ya nge mutindu maza na ntwala ya Tata, Mfumu! Nanguna maboko ya nge na yandi samu na luzingu ya bana ya nge, bayina ke lemba na nsatu na konso gambu ya babala-bala. 20Tala, Tata ya beto, mpe yindula: nani nge me sadila mutindu yayi? Keti bakento fwana kudya bana ya bawu, bana yina bawu yundulaka? Keti nganga-Nzambi na mumbikudi fwana kufwa na kisika ya longo ya Tata, Mfumu? 21Bantwenya na binunu me lala na ntoto na banzila; bandumba ya munu na bantwenya ya munu me fwa na mbele ya mvita. Nge me fwa bawu na kilumbu ya nkele ya nge, nge me zenga bawu na kukonda kyadi. 22Nge bokilaka, bonso na kilumbu ya nkembo, mambu ya nsisi na balweka nyonso; mpe na kilumbu ya nkele ya Tata ya beto, ata muntu mosi tinaka ve to bikanaka moyo ve. Mbeni ya munu me fwa bayina mu yundulaka mpe mu sansaka.