Chapchāt 2

2 ¹Proho Avāna awui malungkhavāt eina Zion naongalāva̱li muiyāna kayākha khaluiphinkhala! Ana Israelwui tekhamatei kazingram eina ngaleili hortāmihaowa; awui malungkhavāt zimiksholi ana apheizingli maphaningungmana. ^a a v1 Apheizing: Jerusalemwui khorumshim, Vare pamkhavai okathuili leikahai apam chi. ²Proho Avāna lukhamashan maleila Jacobwui pamkhavai saikora mayuitāhaira; awui malungkhavāt eina Judah naongalāva̱wui raipan sākhaihaira. Ana awui wungram kala achi khamungabingli maikashi eina ngaleitungli hortāmihaira. ³Malungkhavāt kasā eina ana Israelwui yāng saikora raimihaira; awui yāpāng ngalanthui yangkashe mangāli athumli chihohaowa. Ana Jacobli meirā mei thāda meina chuihaira, chi eina ngalem saikorali chuitāhaira. ⁴Yangkashe thāda ana awui malā hunhaira, yangkashe thāda awui yāpāng ngarān kahaina; kala yang leishi saikora ana shaothatserhaowa. Zion naongalāva̱wui kachonshimli awui malungkhavāt mei thāda heirormihaira. ⁵Proho Avā yangkashe thāda ngasāhaira; ana Israelli mayuitāhaira. Ana awui konung saikora mayuitāhaira, kala awui raipan ja̱ta ngasakhaira, kala Judah naongalāva̱wuitungli wukhanang kala chapkhangachā mataisangmihaira. ⁶Yāmgui thāda ana awui kachonshim sākathānmihaira, awui langchin sākahai apam ramcho ngasakhaira. Ithumwui Avāna Zionli langchin sākahai phanit kala sabbath malai ngasakhaira, kala awui malungkhavāt kasā eina awunga kala pāngmonli mamayāmihaira. ⁷Proho Avāna awui hanphut khalanhaira, awui katharapam ningkachaihaira; awui konungwui phākho yangkashewui pāngli horsangmihaira. Phanit zimiksho thāda athumna ithumwui Avāwui shimli khavao sāhaira. ⁸Zion naongalāva̱wui phākho ja̱ta ngasak khavai ithumwui Avāna ngarān kahaina. Ana tamkhavai khara̱ katingshokhaira; sāshimān khavai eina awui pāng mangalanthuimana. Tārong kala phākho sifa ngasakhaira; athum ngasoda ja̱ta ngasāhaira. ⁹Awui ngavei ngaleili tāzanghaira; ana awui phākashut ngayāng sākhaihaira. Awui awunga kala awui wungnaobing yurbingwui ngachaili lei; ain maleiluimana, kala awui marānbingna ithumwui Avāwui eina khamahā masamphangmana. ¹⁰Zion naongalāva̱wui sarkasābing ngaleili kasaikha ja̱pama; athumna akuitungli chifa horsanghaira, kala sifa kachon ngavaihaira. Jerusalemwui nganuikhamei sha̱naobingna akui ngaleitungli mashunzanghaira. ¹¹Kachapna imik matheithura; iwuklungli shireikazamhaira; naoshinao kala angangnaobing keinungwui chānreili vānkahai tharan, iwui miyurwui naongalāva̱wui kashimānwui vang iwui ning ngaleitungli yurhaira. ¹²Athumna ashāva̱bingli ngakaoda hānga, "Zāt kala drakhāra̱ khili leikhala?" keinungwui chānreili khamā za̱kahaibing thāda vānkahai tharan, ashāva̱bingwui vamsi athumwui manglā yurkahai tharan. ¹³Nawui vang ina khi hāngpaira, Jerusalem naongalāva̱, ina nali khili pāntampaira? Nali ninglum ngasak khavai, kachingva̱ Zion naongalāva̱, ina khili ngaheopaira? Kaja nawui kashimān shamadru thāda khamashāhaira; khipāna nali raimishaprakhala? ¹⁴Nawui marānbingna nawui vang kakapik kala phākakhaning khamahā theihaira; nawui lan hanmiluishit khavai nawui khayonkhamāng maphongmimana, kha nawui vang kakapik kala mikhanama hāngkahaibing theihaira. ¹⁵Kānung kānkhavā saikorana nawuitungli pāng kaphehaira; Jerusalem naongalāva̱wuitungli kasirora akui khayithaira: "Khamathā kākashung, okathui saikorawui khamathān, da hāng kahai keinung chi hila?" ¹⁶Nawui yangkashe saikorana nawuitungli mana̱shida zeihaira; kasirora ahā tarihaira, kala vaoda hānga, "Ithumna ali mayuitāhaira! Hi ithumna theingailak zimiksho china; ithumna samphanghaira, ithumna theihaira!" ¹⁷Ithumwui Avāna ngarān kahai chi sāhaira; achālakhawui eina ana kasoi kahai awui tui sākuphaowa. Lukhamashan maleila ana shaokhaimihaira; yangkasheli nawuitungli mathān ngasakhaira, kala nawui yangkashewui shānneira̱ khāngshokmihaira. ¹⁸Mibingwui ningna Avāli khangakaona. O Zionwui naongalāva̱wui phākho, chāra̱ kongra̱ thāda ngashun ngayā longtāranu! Na khalattali ngasāmkakhui makhuimilu, nawui mikli taphik makhuimilu. ¹⁹Thuilu, ngayā ava̱va̱wui haokaphokli rimpam tharan, ngayāli vaolu! Nawui ning tara̱ thāda Avāwui mangāli heitha̱haolu! Chānrei achikun kachida kathaiwui vang vānkahai nawui naomayarabingwui mirinwui vang awuili napāng khāngkālu! ²⁰Yanglu, O ithumwui Avā, kala machukkhuilu: khipāli nana hithāda sākahaikhala? Sha̱naona athumwui naomayarabingli, athumna khuikahai naoshinaobingli shaipaimalā? Pāngmon kala marānli Avāwui katharapamli sāthatpaimalā? ²¹Naoshinao kala kasarnaobing chānreili ngaleili pisanga; iwui ngalānaobing kala iwui yaronnaobing raighai eina thihaira. Nana nawui malungkhavāt zimiksholi athumli shaothathaira, lukhamashan maleila shaothata. ²²Nana phanit zimiksholi hokhui kahai thāda, apam kachida khangachee hokhui; kala ithumwui Avāwui malungkhavāt zimiksholi khipānakha mayāmshok, akha eina tangda mataimimana. Iwui yangkashena ina khuikahai kala phauikahai naoshinaobingli shimān ngasaka.