Nyimbo ya Ciliro 2 FHB Father's Heart Bible™

2 ¹Ndi tani! Baba Wankulu, mu ukali wace, wakwiritira mwana wankazi Sioni na khole! Wagwisa pantsi kubuluka kudzulu mpaka pa dziko mbiri ya Izarayeli; nee wakumbuka mbuto yace yakuikha miyendo mu ntsiku ya ukali wace. ^a a v1 Mbuto yace yakuikha miyendo: templo ya Yerusalemi, mbuto ya pa dziko inakhala kuonekera kwa Mulungu. ²Baba Wankulu wameza mwakusowa ntsisi mbuto zonsene zakukhala za Yakobe; mu ukali wace wagwesa malinga a mwana wankazi Yuda. Wagwisa pantsi mu manyadzo umambo wace na atongi ace. ³Mu ukali wakugopswa wabulusa mphambvu zonsene za Izarayeli; wakhweza nkono wace wamadyo mbaasiya pakweca kuna nyamalwa. Wagaka mwa Yakobe ninga moto wakugaka unapisa mbali zonsene. ⁴Wagomola uta wace ninga nyamalwa, nkono wace wamadyo wakhala wakukonzeka ninga nyandumba; mbapha onsene akhali akubalika pakuoneka. M'tsasa mwa mwana wankazi Sioni wathukusira ukali wace ninga moto. ⁵Baba Wankulu wakhala ninga nyamalwa; wameza Izarayeli. Wameza nyumba zace zonsene zaumambo mbafudza malinga ace, mbathimizira maliro na kulira pa mwana wankazi Yuda. ⁶Wagwesa cisasa cace ninga munda, wafudza mbuto yace yakusankhulwa. Baba wathu acitisa Sioni kuluwa phwando yakusankhulwa na Sabatu, na mu ukali wace wakugopswa wapwaza mambo na nyantsembe. ⁷Baba Wankulu waramba guwa yace yantsembe, wanyeketa mbuto yace yakucena; wapereka kuna nyamalwa makhoma a nyumba zace zaumambo. Iwo akhuwa mu nyumba ya Baba wathu ninga mu ntsiku ya phwando. ⁸Baba wathu atonga kufudza khoma ya mwana wankazi Sioni. Atambalalisa ntambo wakuezera; nee abweza nkono wace pa kufudza. Acitisa linga na khoma kulira; pyagwa pabodzi mbipsfudzika. ⁹Misuwo yace yamira m'mataka; wafudza mbagwanya mipingo yace. Mambo wace na akulu ace ali pakati pa madzinza; Mwambo nkhabepo pontho, pontho aprofeta ace nkhabe kugumana masomphenya kubuluka kuna Baba wathu. ¹⁰Akulu a mwana wankazi Sioni asakhala pantsi mwakukhonda kulonga; amwaza pfumbi pa misolo yawo mbabvala nguwo za maliro. Atsikana a Yerusalemi akotamisa misolo yawo pantsi. ¹¹Maso anga aneta na kulira; matumbo anga asatekenyeka; ntima wanga wathukuswa pantsi thangwi ya kufudzwa kwa mwana wankazi wa mbumba yanga, mu ndzidzi unakomoka ana na ana akuyamwa m'miseu ya nzinda. ¹²Iwo asalira kuna amai awo, mbabvundza: “Mkate na vinyu piri kupi?” mu ndzidzi unakomoka iwo ninga anyakupswiphwa m'miseu ya nzinda, mu ndzidzi unathukuswa umaso wawo m'manja mwa amai awo. ¹³Ndinakulongera ciyani, ndinakuelezera na ciyani, iwe mwana wankazi Yerusalemi? Ndinakulandanisa na ciyani, toera ndikubalangaze, iwe mwana wankazi ntsikana Sioni? Thangwi kufudzwa kwako ndi kukulu ninga bara; mbani anakuwangisa? ¹⁴Aprofeta ako akuonera masomphenya authambi na akunyengeza; iwo nee apangiza madawo ako toera kubwezeretsa pinthu pyako, mbwenye akuonera mafala authambi na akusochisa. ¹⁵Onsene anapita panjira asakuwombera manja; asakuluzira mbagwedeza misolo yawo kuna mwana wankazi Yerusalemi: “Nzinda uwu ndi ule ukhacemerwa wakubalika kwakukwana, kutsandzaya kwa dziko yonsene?” ¹⁶Anyamalwa ako onsene asafungula milomo yawo kupokanya iwe; asaluzira mbakhukuta mano mbakhuwa: “Tameza iye! Ntsiku ineyi ndi yo ikhadikhira ife; tagumana, taona!” ¹⁷Baba wathu acita pidatonga Iye; akwanirisa fala yace idalamula Iye kale kale. Agwesa mwakusowa ntsisi; asiya nyamalwa kuti akuseke iwe, mbakweza mphambvu ya anyandumba ako. ¹⁸Ntima wa mbumba walira kuna Baba Wankulu. Iwe khoma ya mwana wankazi Sioni, siya misozi yako ikhuluke ninga nkulo masiku na masikati! Leka kupuma, maso ako aleke kupuma. ¹⁹Lamuka, khuwa namasiku pa kutoma kwa maulindiri onsene a masiku! Thukusa ntima wako ninga madzi pamaso pa Baba Wankulu! Kweza manja ako kuna Iye thangwi ya umaso wa ana ako, ale anakomoka na njala pa makhundu onsene a miseu. ²⁰Onani, Baba wathu, mbamudinga: Mbani mudancitira tenepa? Kodi akazi asafanira kudya ana awo, ana adabereka iwo? Kodi nyantsembe na mprofeta asafanira kuphiwa mu mbuto yakucena ya Baba Wankulu? ²¹Aphale na akalamba agona pantsi m'miseu; atsikana anga na aphale anga agwa na supada. Imwe mwaapha mu ntsiku ya ukali wanu, mukhapha mwakusowa ntsisi. ²²Imwe mwacemera, ninga ku ntsiku ya phwando, pinthu pyakugopswa mbali zonsene; pontho mu ntsiku ya ukali wa Baba wathu nkhabe munthu adathawa peno kupulumuka. Nyamalwa wanga wafudza ale adabereka na kukulisa ine.