Ẹkún Jeremiah 2

2 ¹Báwo ni Baba Olódùmarè nínú ìbínú rẹ̀ ṣe bo ọmọbìnrin Sioni pẹ̀lú ìkùukùu! Ó ti gbé ògo Israẹli sọ̀kalẹ̀ láti ọ̀run wá sí ayé; kò sì rántí àpótí ìtìsẹ̀ ẹsẹ̀ rẹ̀ ní ọjọ́ ìbínú rẹ̀. ^a a v1 Àpótí ìtìsẹ̀ ẹsẹ̀ rẹ̀: tẹmpili Jerusalemu, ibi orí ilẹ̀ ayé níbi tí wíwàníhìn-ín Ọlọ́run ti ń gbé. ²Baba Olódùmarè ti gbé gbogbo ibùgbé Jakọbu mì láìsí àánú; nínú ìhónú rẹ̀ ni ó wó àwọn odi ọmọbìnrin Juda palẹ̀. Ó ti rẹ ìjọba rẹ̀ àti àwọn alákòóso rẹ̀ sílẹ̀ nínú àbùkù. ³Nínú ìbínú gbígbóná ni ó ti gba Israẹli ní gbogbo agbára rẹ̀; ó ti fa ọwọ́ ọ̀tún rẹ̀ padà, ó sì fi wọ́n sílẹ̀ níwájú ọ̀tá. Ó ti jóná ní Jakọbu bí iná tí ń jò tí ń jó ohun gbogbo run ní gbogbo ẹ̀gbẹ́. ⁴Ó ti fa ọrun rẹ̀ bí ọ̀tá, ọwọ́ ọ̀tún rẹ̀ dúró ṣe tán bí ọ̀tá; ó sì ti pa gbogbo àwọn tí ó dára lójú. Nínú àgọ́ ọmọbìnrin Sioni ni ó ti tú ìhónú rẹ̀ jáde bí iná. ⁵Baba Olódùmarè ti dàbí ọ̀tá; ó ti gbé Israẹli mì. Ó ti gbé gbogbo ààfin rẹ̀ mì, ó sì ti sọ àwọn odi rẹ̀ di ahoro, ó sì ti kó ọ̀fọ̀ àti ìpohùnréré ẹkún jọ fún ọmọbìnrin Juda. ⁶Ó ti fa ibùgbé rẹ̀ ya bí ọgbà, ó ti ba ibi tí ó yàn sọtọ̀ jẹ́. Baba wa ti mú kí Sioni gbàgbé àjọ̀dún tí a yàn àti ọjọ́ ìsinmi, nínú ìbínú gbígbóná rẹ̀ sì ni ó ti kọ ọba àti àlùfáà sílẹ̀. ⁷Baba Olódùmarè ti kọ pẹpẹ rẹ̀ sílẹ̀, ó ti kọ ibi mímọ́ rẹ̀ sílẹ̀; ó ti fi ògiri àwọn ààfin rẹ̀ lé ọ̀tá lọ́wọ́. Wọ́n ta ariwo ní ilé Baba wa bí ẹni pé ní ọjọ́ àjọ̀dún. ⁸Baba wa pinnu láti wó ògiri ọmọbìnrin Sioni palẹ̀. Ó ta okùn ìwọ̀n náà; kò sì fa ọwọ́ rẹ̀ padà kúrò nínú ìparun. Ó mú kí odi àti ògiri máa pohùnréré ẹkún; pa pọ̀ ni wọ́n wó palẹ̀. ⁹Àwọn ẹnu ọ̀nà rẹ̀ ti rì sínú ilẹ̀; ó ti ba àwọn ìdábùú rẹ̀ jẹ́, ó sì ti fọ́ wọn. Ọba rẹ̀ àti àwọn ọmọ aládé rẹ̀ wà láàrin àwọn orílẹ̀-èdè; òfin kò sí mọ́, àwọn wòlíì rẹ̀ sì kò rí ìran kankan láti ọ̀dọ̀ Baba wa. ¹⁰Àwọn àgbà ọmọbìnrin Sioni jókòó lórí ilẹ̀ ní ìdákẹ́rọ́rọ́; wọ́n ti ku eruku sí orí ara wọn, wọ́n sì ti wọ aṣọ ọ̀fọ̀. Àwọn ọ̀dọ́bìnrin Jerusalemu ti tẹ orí wọn ba sílẹ̀. ¹¹Ojú mi ti rẹ̀wẹ̀sì nítorí ẹkún; inú mi ń rú; a ti tú ọkàn mi jáde sórí ilẹ̀ nítorí ìparun ọmọbìnrin àwọn ènìyàn mi, bí àwọn ọmọdé àti àwọn ìkókó ṣe ń dákú ní àwọn ìgboro ìlú náà. ¹²Wọ́n ké pe àwọn ìyá wọn pé, “Níbo ni oúnjẹ àti wáìnì wà?” bí wọ́n ṣe ń dákú bí àwọn tí ó gbọgbẹ́ ní àwọn ìgboro ìlú náà, bí a ṣe ń tú ẹ̀mí wọn jáde ní apá àwọn ìyá wọn. ¹³Kí ni mo lè sọ fún ọ, kín ni mo lè fi wé ọ, ìwọ ọmọbìnrin Jerusalemu? Kí ni mo lè fi jọ ọ, kí n lè tù ọ́ nínú, ìwọ wúńdíá ọmọbìnrin Sioni? Nítorí ìparun rẹ tóbi bí òkun; ta ni ó lè mú ọ láradá? ¹⁴Àwọn wòlíì rẹ ti rí ìran èké àti ẹ̀tàn fún ọ; wọn kò ṣí ẹ̀ṣẹ̀ rẹ payá láti dá ọrọ̀ rẹ padà, ṣùgbọ́n wọ́n ti rí àsọtẹ́lẹ̀ èké àti ìtannijẹ fún ọ. ¹⁵Gbogbo àwọn tí ń kọjá ń pàtẹ́wọ́ sí ọ; wọ́n ń súfèé, wọ́n ń mi orí wọn sí ọmọbìnrin Jerusalemu pé: “Ṣé ìlú yìí ni a ń pè ní àṣepé ẹwà, ayọ̀ gbogbo ayé?” ¹⁶Gbogbo àwọn ọ̀tá rẹ ya ẹnu wọn sílẹ̀ sí ọ; wọ́n ń súfèé, wọ́n sì ń payín keke, wọ́n sì ké pé, “A ti gbé e mì! Èyí ni ọjọ́ tí àwa ti ń retí; a ti rí i, a ti fojú rí i!” ¹⁷Baba wa ti ṣe ohun tí ó pinnu; ó ti mú ọ̀rọ̀ rẹ̀ ṣẹ, èyí tí ó pàṣẹ láti ìgbà pípẹ́. Ó ti wó palẹ̀ láìsí àánú; ó ti jẹ́ kí ọ̀tá máa yọ̀ lé ọ orí, ó sì ti gbé agbára àwọn ọ̀tá rẹ ga. ¹⁸Ọkàn àwọn ènìyàn ké pe Baba Olódùmarè. Ìwọ ògiri ọmọbìnrin Sioni, jẹ́ kí omijé máa sàn bí odò lọ́sàn-án àti lóru! Má fún ara rẹ ní ìsinmi, má sì fún ojú rẹ ní ìtura. ¹⁹Dìde, kígbe ní òru ní ìbẹ̀rẹ̀ ìṣọ́ òru kọ̀ọ̀kan! Tú ọkàn rẹ jáde bí omi níwájú Baba Olódùmarè! Gbé ọwọ́ rẹ sókè sí i nítorí ẹ̀mí àwọn ọmọ rẹ, tí ebi ń pa tí wọ́n ń dákú ní orígun gbogbo ìgboro. ²⁰Wò ó, Baba wa, kí o sì rò ó: ta ni ìwọ ti ṣe sí báyìí rí? Ǹjẹ́ kí àwọn obìnrin jẹ ọmọ inú wọn, àwọn ọmọ tí wọ́n ti pọ̀n? Ǹjẹ́ kí a pa àlùfáà àti wòlíì nínú ibi mímọ́ Baba Olódùmarè? ²¹Èwe àti àgbà dùbúlẹ̀ lórí ilẹ̀ ní àwọn ìgboro; àwọn ọ̀dọ́bìnrin mi àti àwọn ọ̀dọ́kùnrin mi ti ṣubú nípa idà. Ìwọ ti pa wọ́n ní ọjọ́ ìbínú rẹ, o dúńbú wọn láìsí àánú. ²²Ìwọ pe àwọn ìpayà jọ láti gbogbo ẹ̀gbẹ́, bí ẹni pé sí ọjọ́ àjọ̀dún; ní ọjọ́ ìbínú Baba wa sì ni kò sí ẹni tí ó sá àsálà tàbí tí ó yè. Ọ̀tá mi ti pa àwọn tí mo pọ̀n tí mo sì tọ́ run.