ሰቆቃወ 2 FHB Father's Heart Bible™

2 ¹ከመይ ጌሩ እቲ ልዑል ኣቦ ብቍጥዓኡ ንጓል ፅዮን ብደመና ደፈና! ክብሪ እስራኤል ካብ ሰማይ ናብ ምድሪ ደርበዮ፤ በታ መዓልቲ ቍጥዓኡ ኸዓ መርገፂ እግሩ ኣይዘከረን። ^a a v1 መርገፂ እግሩ፦ እቲ ቤተ መቕደስ ኢየሩሳሌም፥ እቲ ህላወ እግዚኣብሄር ዝሓደረሉ ምድራዊ ቦታ እዩ። ²እቲ ልዑል ኣቦ ንዅሉ ማሕደራት ያእቆብ ብዘይ ምሕረት ወሓጦ፤ ብቍጥዓኡ ንፅኑዓት ቦታታት ጓል ይሁዳ ኣፍረሶም። ንመንግስታን ንመራሕታን ኣሕሲሩ ናብ ምድሪ ኣውደቖም። ³ብብርቱዕ ቍጥዓ ንእስራኤል ካብ ኵሉ ሓይሊ ገፈፋ፤ የማነይቲ ኢዱ ሰሓበ፥ ኣብ ቅድሚ ፀላኢ ኸዓ ኣቃልዖም። ኣብ ያእቆብ ከም ሃልሃልታ ሓዊ ነደደ፥ ብዅሉ ወገን ከዓ ይበልዕ። ⁴ከም ፀላኢ ቐስቲ ገተረ፥ የማነይቲ ኢዱ ኸም መፃርሪ ኣቕንዐ፤ ንዅሎም እቶም ዝፅብቑ ዝነበሩ ቀተሎም። ኣብ ድንኳን ጓል ፅዮን ከዓ ቍጥዓኡ ኸም ሓዊ ኣፍሰሰ። ⁵እቲ ልዑል ኣቦ ኸም ፀላኢ ኮነ፤ ንእስራኤል ወሓጣ። ንዅሉ ኣዳራሽ ወሓጦ፥ ንፅኑዓት ቦታታት ከዓ ኣዕነዎ፥ ሓዘንን መልቀስን ከዓ ኣብ ጓል ይሁዳ ኣብዝሐ። ⁶ንፅላሉ ኸም ገነት ገፈፎ፥ ንቦታ ኣኼባኡ ኣዕነዎ። ኣቦና ንፅዮን በዓልን ሰንበትን ኣረስዓ፥ ብብርቱዕ ቍጥዓኡ ኸዓ ንንጉስን ንኻህንን ደርበዮም። ⁷እቲ ልዑል ኣቦ ንመሰውኢ ነፀገ፥ ንመቕደስ ኣፀየፈ፤ ንመናድቕ ኣዳራሽ ኣብ ኢድ ፀላኢ ኣሕሊፉ ሃቦ። ኣብ ቤት ኣቦና ኸም ናይ በዓል መዓልቲ ድምፂ ኣስምዑ። ⁸ኣቦና ንመንደቕ ጓል ፅዮን ከዕንዎ ወሰነ። መዐቀኒ ገመድ ዘርግሐ፤ ኢዱ ኻብ ምጥፋእ ኣይከልከለን። ንመከበብያን ንመንደቕን ኣልቀሶም፤ ብሓንሳእ ድማ ዓነዉ። ⁹ደገታታ ናብ ምድሪ ጠሓላ፤ ንመሸጎራ ኣዕንዩ ሰበሮ። ንጉሳን መሳፍንታን ኣብ ማእኸል ኣህዛብ ኣለዉ፤ ሕጊ የለን፤ ነቢያት ከዓ ካብ ኣቦና ራእይ ኣይረኽቡን። ¹⁰ሽማግለታት ጓል ፅዮን ስቕ ኢሎም ኣብ ምድሪ ተቐሚጦም፤ ኣብ ርእሶም ሓመድ ነስነሱ፥ ክዳን ሓዘን ለበሱ። ኣጓላት ኢየሩሳሌም ርእሰን ናብ ምድሪ ኣድነና። ¹¹ኣዒንተይ ብብኽያት ደኸማ፤ ከብደይ ይናወፅ፤ ብሰሪ ጥፍኣት ጓል ህዝበይ ልበይ ናብ ምድሪ ፈሰሰ፥ ቈልዑን ህፃናትን ኣብ ኣደባባያት ከተማ ይደኽሙ ኣለዉ። ¹²ነኣዴታቶም “እንጀራን ወይንን ኣበይ ኣሎ?” ይብሉ፥ ኣብ ኣደባባያት ከተማ ከም ቍሱላት እናደኸሙ፥ ህይወቶም ኣብ ሕቕፊ ኣዴታቶም እናፈሰሰ። ¹³ኦ ጓል ኢየሩሳሌም፥ እንታይ ክብለኪ እኽእል? ምስ እንታይከ ከመዓራርየኪ? ኣቲ ድንግል ጓል ፅዮን፥ ከፅናንዓኪ ምስ እንታይ ከመሳስለኪ? ዕንወትኪ ኸም ባሕሪ ሰፊሕ እዩ እሞ፥ መን ከሕውየኪ ይኽእል? ¹⁴ነቢያትኪ ሓሰትን መታለልን ራእይ ረአዩልኪ፤ ምርኮኺ ምእንቲ ኽመልሱ ንኣበሳኺ ኣይገለፁልክን፥ ሓሰትን መስሓትን ትንቢት ደኣ ረአዩልኪ እምበር። ¹⁵ኵሎም ሓለፍቲ መንገዲ ኣእዳዎም የጣቕዑልኪ፤ ኣብ ልዕሊ ጓል ኢየሩሳሌም ይፍሕሱ፥ ርእሶምውን ይነቕንቑ፦ “እዚኣዶ እታ ፍፁም ፅባቐ፥ ሓጐስ ኵላ ምድሪ ዝብሃል ዝነበረት ከተማ እያ?” ¹⁶ኵሎም ፀላእትኺ ኣፎም ኣብ ልዕሌኺ ይኸፍቱ፤ ይፍሕሱ፥ ኣስናኖም ይሐርቑ፥ ከምዙይ ኢሎም ይጭድሩ፦ “ወሓጥናያ! እታ ዝናፈቕናያ መዓልቲ እዚኣ እያ፤ ረኺብናያ፥ ረአናያ!” ¹⁷ኣቦና ነቲ ዝመደቦ ገበሮ፤ ነቲ ኻብ ጥንቲ ዝኣዘዞ ቃሉ ፈፀሞ። ብዘይ ርህራሀ ኣፍረሶ፤ ንፀላኢ ኣብ ልዕሌኺ ኸም ዝሕጐስ ገበረ፥ ሓይሊ ፀላእትኺ ድማ ኣልዓለ። ¹⁸ልቢ እቶም ህዝቢ ናብ ጐይታ ኣቦ ፀርሐ። ኣቲ መንደቕ ጓል ፅዮን፥ ንብዓትኪ ለይትን መዓልትን ከም ወሓዚ ይውረድ! ንነፍስኺ ዕረፍቲ ኣይትሃቢ፥ ኣዒንትኺ ዕረፍቲ ኣይረኽባ። ¹⁹ተስኢ! ኣብ መጀመርታ ነፍሲ ወከፍ ሓለዋ ለይቲ ብለይቲ ጨድሪ! ልብኺ ኣብ ቅድሚ ጐይታ ኣቦ ኸም ማይ ኣፍስሲ! ምእንቲ ህይወት ደቅኺ፥ እቶም ኣብ ኵሉ ቀራናታት መንገዲ ብጥሜት ዝደኽሙ፥ ኣእዳውኪ ናብኡ ኣልዕሊ። ²⁰ኦ ኣቦና፥ ረአ እሞ ሕሰብ፦ ንመን ኢኻ ኸምዙይ ገይርካዮ ትፈልጥ? ኣንስቲዶ ፍረ ከርሰን፥ እቶም ዝሓቘፈኦም ህፃናት ይበልዓ? ካህንን ነቢይንዶ ኣብ መቕደስ ጐይታ ኣቦ ይቀተሉ? ²¹ንእሽቶን ዓብዪን ኣብ ኣደባባያት ኣብ መሬት ተገምሲሶም ኣለዉ፤ ኣዋልደይን ኣጕባዘይን ብሰይፊ ወደቑ። በታ መዓልቲ ቍጥዓኻ ቐተልካዮም፥ ብዘይ ርህራሀ ሓረድካዮም። ²²ከም ናብ መዓልቲ በዓል፥ ፍርሓት ካብ ኵሉ ወገን ፀዋዕካ፤ በታ መዓልቲ ቍጥዓ ኣቦና ኸዓ ዘምለጠ ወይ ዝተረፈ ሓደ እኳ ኣይነበረን። ነቶም ዝሓቘፍክዎምን ዘዕበኽዎምን ፀላእየይ ኣጥፍኦም።