Nganzi ya Tata yisi zanga Siyoni
Mutu wa nkunga watela nati wahanga dyadi. Tata wa Kipfumu waleka uta wandi, watesa kibaka ku thwala ya kudyanga kyawu, wakituka hanga mbeni kwena Siyoni. Bana bafwa mu moku ma bangudi ba bawu. Ka dyambu ku dyalembika; nkunga kaka wulomba ni Tata wetu katala amana kayindula.
2 1Abweti Tata wa Kipfumu, muna nganzi yandi, wáfukidila mwana wa ndumba wa Siyoni mu dituti! Wátimbula ku tsi, mu kukatula ku zilu, khembu ya Kiseledi; kayindulaku kidyatilu kyandi muna kilumbu kya nganzi yandi. a a v1 Kidyatilu kyandi: nzu ya Nzambi ya Yelusalemi, fulu dya hana tsi kwakuna Nzambi kákala zingila. 2Tata wa Kipfumu wámina, konda kyadi, nzu zoosu za Yakobi; muna khabu yandi wámwanga bibaka bya ngolu bya mwana wa ndumba wa Yuta. Wábwisa ha tsi, mu mafu, kipfumu kyandi yi bapfumu ba kyawu. 3Muna nganzi ya ngolu wáwomuna Kiseledi ngolu zandi zoosu; wávutula koku kwandi kwa lubakala, amana wábasisa ku mesu ma mbeni. Wálema muna Yakobi hanga mbawu ya phunza, yisi dya bioosu ha mbandu zoosu. 4Wáleka uta wandi hanga mbeni, koku kwandi kwa lubakala kutelimini hanga mbeni; amana wáhonda boosu bana bákala kitoku kwena mesu. Muna sombolu dya mwana wa ndumba wa Siyoni wámwanga nganzi yandi hanga mbawu. 5Tata wa Kipfumu wákituka hanga mbeni; wámina Kiseledi. Wámina nganda zandi zoosu amana wázanga bibaka bya ngolu byandi, amana wávusa khondu yi bidilu kwena mwana wa ndumba wa Yuta. 6Wáfufula luhulu lwandi hanga kilanga, wázanga fulu dyandi dya lukutakanu. Tata wetu wázimbakanisa Siyoni mukinzi yi sabata, amana muna nganzi yandi ya ngolu wáloza kyamvu yi nganga Nzambi. 7Tata wa Kipfumu wáloza mesa dyandi dya kimenga, wámenga fulu dyandi dyatoma; wáheka kwena mbeni bibaka bya nganda zandi. Bákalunga muna nzu ya Tata wetu hanga muna kilumbu kya mukinzi. 8Tata wetu wábonga dibanza dya kuzanga kibaka kya mwana wa ndumba wa Siyoni. Wátandula musinga wa kuteza; kakakidilaku koku kwandi mu kuzanga. Wákhitula luphangu yi kibaka bidila; bikyosu byáwulumuka. 9Myelu myandi myázwama hana tsi; wázanga amana wábukuna bikolo byandi. Kyamvu kyandi yi bapfumu bandi benina hana kati dya makanda; mitsiku mifini, amana bambikudi bandi bamónaku mbona mesu kwena Tata wetu. 10Bambuta ba mwana wa ndumba wa Siyoni basikuka hana tsi mu talala; bálosa mputulu ha mitwa mya bawu amana bávwata miledi mya khondu. Bandumba ba Yelusalemi bázenzika mitwa mya bawu hana tsi. 11Mesu mama mávonda mu kudila; kundu dyama disi nikana; mbundu yama yidukuka hana tsi kikuma kya kuzanga kwa mwana wa ndumba wa batu bama, bwosu bana yi bana ba lubutu bisi vonda mu mabala-bala ma mbanza. 12Bisi dila kwena bamama ba bawu: «Kwe kwenina dipha yi vinu?» bwosu bisi vonda hanga bana bálwekwa mu mabala-bala ma mbanza, bwosu moyu wa bawu wusi lubuka muna moku ma bamama ba bawu. 13Khi yina yilenda kuzimbwala kikuma kyaku, yi kwena khi yilenda kufwanikisa ngeyi, mwana wa ndumba wa Yelusalemi? Khi yina yilenda fwanikisa kwena ngeyi, hanga yikuhomba, ngeyi ndumba mwana wa Siyoni? Mukuma kuzangana kwaku kuneni hanga yanga dya mbuta; yi nani walenda kukubelusa? 14Bambikudi baku bámona kikuma kyaku mbona mesu za bukamvi yi za luvunu; kábatungululaku masumu maku hanga bavutulula kimvwama kyaku, kaasi bámona kikuma kyaku mambu ma bukamvi yi ma kuhukumuna. 15Batu boosu bana bisi luta bisi beta moku kwena ngeyi; bakala sika misyolu yi kunikisa mitwa mya bawu kwena mwana wa ndumba wa Yelusalemi: «Keti mbanza yayi yina bákala tela ni phisi yafwana, kyesi kya tsi yosu?» 16Bambeni baku boosu bakangudi minwa mya bawu kwena ngeyi; bakala sika misyolu yi kweta menu amana bakalungini: «Tumumini! Tangwa dyadi dina twázola; tuyiwani, tuyimweni!» 17Tata wetu wáhanga mana káyilama; wálungisa ndinga yandi yina kátuma tuka thama. Wátibula konda kyadi; wáyambula mbeni kakudimonisa kyesi hana thandu yaku amana wátombula ngolu za bambeni baku. 18Mbundu ya batu yákalunga kwena Tata Pfumu. A kibaka kya mwana wa ndumba wa Siyoni, matsanga maku masuluka hanga mamba ma nzadi mwini yi phipha! Kudihekaku talala, mesu maku malekaku. 19Vumbuka, kalunga mu phipha ha theti dya kosu kikengila kya phipha! Lubula mbundu yaku hanga mamba ku thwala ya Tata Pfumu! Thuta moku maku kwena yandi kikuma kya mizingu mya bana baku, bana bisi lemba mu nzala ku pfumba za mabala-bala moosu. 20Tala, A Tata wetu, amana simbulula: yi nani wáhangila mambu ma phila yayi keti mbala mosi? Keti bakhetu bisi dya bana ba bawu, bana bana bázangula muna moku mawu? Keti nganga Nzambi yi mbikudi bahondibwa muna kizika kyahedila kya Tata Pfumu? 21Bana bakhunda yi binunu bisi leka hana tsi muna mabala-bala; bandumba zama yi bangunza bama bábwa mu mbedi ya phoku. Wábahondisa mu tangwa dya khabu yaku, mu kubahonda konda kyadi. 22Wátela, hanga mu tangwa dya mukinzi, mambu ma bweya mu zindambu zoosu; amana mu tangwa dya khabu ya Tata wetu, ka mutu ku wátina holo wákala moya. Mbeni wama wázanga bana bana yázangula muna moku mama amana yákudisa.
