Ụlọ Devid na-esiwanye ike

Ka ụlọ Sọl na-ada mbà, e boro Abna ebubo banyere iko nwanyị, o chigharịkwuru Devid inyefe ya alaeze ahụ Nna anyị ṅụrụ iyi, wee duru Izrel soro ya. Joab, na-abọ ọbọ Asahel, gburu Abna nʼọnụ ụzọ ama. Devid sooro ozu ahụ nʼazụ, buo ọnụ, ma ruo ụjụ ka onye ọ bụla mara na o soghị na ya.

Isi 3.

Agha dị nʼetiti ụlọ Sọl na ụlọ Devid were ogologo oge. Devid nọgidere na-esiwanye ike, ma ike ụlọ Sọl na-agbadakwa agbada. A mụụrụ Devid ụmụ ndị ikom na Hebrọn. Ọkpara mbụ ya bụ Amnọn, onye nne ya bụ Ahinoam onye Jezril; nke abụọ ya bụ Kileab, onye Abigel mụụrụ ya, bụ nwaanyị di ya nwụrụ bụ Nabal onye Kamel; nke atọ bụ Absalọm, nwa Maaka, ada Talmaị eze Geshọ; nke anọ bụ Adonaịja nwa Hagịt; nke ise bụ Shefataịa nwa Abital; na nke isii bụ Itrim, onye Egla nwunye Devid mụụrụ ya. Ndị a bụ ụmụ ndị ikom Devid a mụrụ na Hebrọn.

Abna sonyere Devid

Nʼoge agha ahụ dị nʼetiti ụlọ Sọl na ụlọ Devid, Abna nọgidere na-eme ka ọnọdụ ya sikwuo ike nʼụlọ Sọl. Sọl nwere iko nwaanyị aha ya bụ Rizpa, ada Aịa. Ishbọshet gwara Abna sị, “Gịnị mere i ji dinaa iko nwaanyị nna m?”

Abna, iwe were ya nke ukwuu nʼihi okwu Ishbọshet, sị, “Ọ bụ isi nkịta nke na-eguzosi ike nʼebe Juda nọ ka m bụ? Taa, ana m egosigide iguzosi ike nʼebe ụlọ nna gị Sọl nọ, na ụmụnne ya na ndị enyi ya, ewerekwaghị m gị nyefee Devid. Ma ugbu a, ị na-ebo m ebubo nʼihi nwaanyị a! ^a Ka Nna anyị mesoo Abna otu ahụ, meekwa karịa, ọ bụrụ na m emeghị Devid ihe ahụ Nna anyị ṅụụrụ ya iyi, ya bụ ịnapụ ụlọ Sọl alaeze ahụ ma guzobe ocheeze Devid nʼIzrel na Juda, site na Dan ruo Bịasheba.”

Ishbọshet enwekwaghị ike ịsa Abna okwu ọzọ, nʼihi na ọ na-atụ ya egwu.

Abna zipụrụ ndị ozi ka ha jekwuru Devid nʼọnọdụ ya sị, “Ala a bụ nke onye? Gị na m gbaa ndụ, aka m ga-esokwa gị iduru Izrel niile bịakwute gị.”

Devid sịrị, “Ọ dị mma; mụ na gị ga-agba ndụ. Ma otu ihe ka m chọrọ nʼaka gị: ị gaghị ahụ ihu m ma ọ bụrụ na i bughị Maịkal, ada Sọl, ụzọ mgbe ị na-abịa.” Devid zigaara Ishbọshet, nwa Sọl, ndị ozi sị, “Nyeghachi m nwunye m Maịkal, onye m ji otu narị akpụkpọ amụ ndị Filistia rụọ ọnụ.”

Ya mere, Ishbọshet ziri ozi kpọrọ ya site nʼaka di ya, bụ Paltiel nwa Laish. Di ya soro ya na-aga, na-ebe akwa dịka ọ na-eso ya ruo Bahurim. Mgbe ahụ, Abna gwara ya sị, “Laghachi azụ.” Ya mere, ọ laghachiri.

Abna na ndị okenye Izrel kwuru okwu sị, “Ruo ogologo oge, unu achọwo ka Devid bụrụ eze unu. Ugbu a, meenụ ya, nʼihi na Nna anyị kwere Devid nkwa sị, ‘Site nʼaka ohu m Devid ka m ga-azọpụta ndị m bụ Izrel nʼaka ndị Filistia na ndị iro ha niile.’”

Abna gwakwara ndị Benjamin okwu, mesịa jee Hebrọn ịgwa Devid ihe niile Izrel na ụlọ Benjamin niile kwekọrịtara ime. Mgbe Abna na iri ndị ikom abụọ bịakwutere Devid na Hebrọn, Devid kwaara Abna na ndị ya oriri. Abna gwara Devid sị, “Ka m gaa chịkọta Izrel niile nʼebe onyenwe m bụ eze nọ, ka ha na gị gbaa ndụ, ka ị chịakwa ihe niile obi gị na-achọ.” Ya mere, Devid zilagara Abna, ọ lawara nʼudo.

Joab gburu Abna

Nʼoge ahụ kpọmkwem, ndị ohu Devid na Joab si nʼagha lọta were ọtụtụ ihe ha kwatara nʼagha. Ma Abna esoghị Devid nọrọ na Hebrọn, nʼihi na Devid ezilagala ya, ọ lawokwala nʼudo. Mgbe Joab na ndị agha ya niile rutere, a gwara ya sị, “Abna nwa Nea bịakwutere eze, onye zilagara ya, ọ lawara nʼudo.”

Ya mere, Joab jekwuru eze sị, “Gịnị ka i mere? Lee, Abna bịakwutere gị—gịnị mere i ji zilaga ya, ugbu a ọ lawokwala? Ị maara na Abna nwa Nea bịara ịghọgbu gị, ịmata njem gị na ihe niile ị na-eme.”

Mgbe Joab si nʼebe Devid nọ pụọ, o zipụrụ ndị ozi ka ha chụso Abna, ndị kpọghachitere ya site nʼolulu mmiri Saịra. Ma Devid amaghị ihe ọ bụla banyere ya. Mgbe Abna lọghachiri na Hebrọn, Joab kpọpụrụ ya nʼakụkụ nʼime ọnụ ụzọ ama dịka a ga-asị na ọ ga-agwa ya okwu na nzuzo, maa ya mma nʼafọ nʼebe ahụ. Ọ nwụrụ—nʼihi ọbara nwanne Joab bụ Asahel. Mgbe e mesịrị, mgbe Devid nụrụ ya, ọ sịrị, “Mụ na alaeze m abụghị ndị ikpe mara ruo mgbe ebighị ebi nʼihu Nna anyị banyere ọbara Abna nwa Nea. Ka ọ dakwasị nʼisi Joab na nʼụlọ nna ya niile! Ka ụlọ Joab ghara ịkọ onye mgbọọrọ ọbara maọbụ onye nwere ọrịa akpụkpọ ahụ, onye na-adabere nʼosisi ndabere, onye na-ada site na mma agha, maọbụ onye na-enweghị nri.” Ya mere, Joab na nwanne ya bụ Abishaị gburu Abna nʼihi na o gburu nwanne ha bụ Asahel nʼagha ahụ dị na Gibeọn.

Devid ruru ụjụ nʼihi Abna

Devid gwara Joab na ndị niile ya na ha nọ sị, “Dọwaanụ uwe unu, yikwasịnụ akwa mkpe, ruokwanụ ụjụ nʼihu Abna.” Eze Devid jere ije nʼazụ ihe ndabere ozu ahụ. Ha liri Abna na Hebrọn, eze welikwara olu ya bee akwa nʼili ya, ndị niile bekwara akwa. Eze bụrụ abụ akwa a nʼihi Abna sị, “Abna ọ ga-anwụ dịka onye nzuzu si anwụ? E kegideghị aka gị abụọ, e tinyeghịkwa ụkwụ gị abụọ nʼagbụ. I dara dịka mmadụ si ada nʼihu ndị ajọ omume.” Ndị niile bekwara akwa nʼihi ya ọzọ.

Mgbe ahụ, ndị niile bịara ịrịọsi Devid ike ka o rie ihe mgbe chi ka dị, ma Devid ṅụrụ iyi sị, “Ka Nna anyị mesoo m otu ahụ, meekwa karịa, ọ bụrụ na m detụ achịcha maọbụ ihe ọ bụla ọzọ ọnụ tupu anyanwụ adaa!”

Ndị niile hụrụ ya, ọ tọkwara ha ụtọ; ihe niile eze mere tọrọ ndị niile ụtọ. Ya mere, nʼụbọchị ahụ, ndị niile na Izrel niile matara na ọ bụghị eze chọrọ ka e gbuo Abna nwa Nea. Eze gwara ndị ohu ya sị, “Ọ bụ na unu amaghị na onyeisi na nnukwu mmadụ adaala taa nʼIzrel? Taa, ọ bụ ezie na m bụ eze e tere mmanụ, adịghị m ike, ụmụ ndị ikom ndị a, bụ ụmụ Zeruaịa, siri m ike karịa. Ka Nna anyị kwụghachi onye na-eme ihe ọjọọ dịka ajọ omume ya si dị.”