داوودون نسلی گوجله‌نئر
شاعولون نسلی ضعئفلَدئکجه، آبنِر بئر جارئیه اوجباتیندان تقصئرلَندئرئلر، داوودا طرف دؤنر کی، آتامیزین آند ائچدئیی پادشاهلیغی اونا ورسئن، و ائسرایئلی اؤزو ائله گتئرر. یوآب، عَساهِلئن قئصاصینی آلاراق، دروازادا آبنِری اؤلدورر. داوود تابوتون دالینجا گدر، اوروج توتار و یاس ساخلار کی، هامی بئلسئن اونون هچ بئر دخلی اولماییب.
3 1شاعولون نسلی ائله داوودون نسلی آراسینداکی موحارئبه اوزون مودّت چکدی. داوود گتدئکجه داها دا گوجله‌نئردی، آمّا شاعولون نسلی گتدئکجه داها دا ضعئفله‌مئشدی. 2خِبروندا داوودون اوغوللاری دوغولدو. ائلک اوغلو اَمنون ائدی کی، آناسی یِزرِعِللی اَخئنوعَم ائدی؛ 3ائکئنجی اوغلو کَرمِل‌لی نابالین دول آروادی اَبئگائلدن اولان کئلاب ائدی؛ اوچونجوسو گِشور پادشاهی تَلمه‌یئن قیزی مَعَکه‌نین اوغلو اَبشالوم ائدی؛ 4دؤردونجوسو خَگّئتدن اولان اَدونئیا ائدی؛ بشئنجئسی اَبئطالدان اولان شِفَطیا ائدی؛ 5آلتینجیسی داوودون آروادی عِگلادان اولان یئترِعام ائدی. بونلار داوودون خِبروندا دوغولان اوغوللاری ائدی.
آبنِر داوودا قوشولور
6شاعولون نسلی ائله داوودون نسلی آراسینداکی موحارئبه زامانی، آبنِر شاعولون نسلئنده اؤز موقعئنی گوجلندئرئردی. 7شاعولون رئصپا آدلی بئر جارئیه‌سی وار ائدی کی، اَیّانین قیزی ائدی. ائشبوشِت آبنِردن سوروشدو: «نئیه آتامین جارئیه‌سی ائله یاتیبسان؟»
8آبنِر ائشبوشِتئن سؤزلرئندن چوخ حئرصلَنئب ددی: «مگر من یهودایا صادئق بئر ائت باشی‌یام؟ بو گون آتان شاعولون نسلئنه، اونون قارداشلارینا و دوستلارینا وفا گؤرسده‌رم و سنی داوودون اَلئنه ورمه‌دئم. آمّا ائندی بو آروادین اوجباتیندان منی تقصئرکار بئلئرسن! a a v8 «ائت باشی» قدئم زامانلاردا دَیَرسئز بئر خایئن و یا دوشمنه دیئلن بئر توهئن ائدی. 9اگر داوود اوچون، آتامیزین اونا آند ائچدئیئنی اتمه‌سم، قوی آتامیز آبنِره بله اتسئن و بوندان دا آرتیغینی اتسئن، 10یعنی پادشاهلیغی شاعولون نسلئندن کچئردئب، داوودون تختئنی داندان بئرشِبَعه قدر ائسرایئلئن و یهودانین اوستونده قورام.»
11ائشبوشِت آبنِره بئر سؤز ده دئیه بئلمه‌دی، چونکی اوندان قورخوردو.
12آبنِر اؤز طرفئندن داوودون یانینا قاصئدلر گؤندَ‌رئب ددی: «بو تورپاق کئمئندئر؟ منئمله عهد باغلا، بوتون ائسرایئلی سنئن طرفئنه گتئرمک اوچون منئم اَلئم سنئنله اولاجاق.»
13داوود ددی: «یاخشی، سنئنله عهد باغلایاجاغام. آمّا سندن بئر شی طلب ادئرم: گلنده اوّلجه شاعولون قیزی مئکَلی گتئرمه‌دن، اوزومو گؤرمه‌یه‌جکسن.» 14داوود، شاعولون اوغلو ائشبوشِته قاصئد گؤندَ‌رئب ددی: «مئکَلی، آروادیمی منه قایتار، چونکی من اونو یوز فئلئسطلی‌نئن ختنه دَرئسی عوضئنده اؤزومه نئشانلامیشدیم.»
15بله‌جه ائشبوشِت آدام گؤندَ‌رئب اونو اَری لایئش اوغلو پَلطئیِلدن آلدی. 16اَری آغلایا-آغلایا بَخورئمه قدر اونون دالینجا گتدی. سونرا آبنِر اونا امر اتدی: «گری دؤن!» بله‌جه او گری قاییتدی.
17آبنِر ائسرایئلئن آغساقّاللاری ائله دانیشیب ددی: «چوخدان بری داوودون اوستونوزده پادشاه اولماسینی ائسته‌یئردئنئز. 18ائندی بونو ادئن، چونکی آتامیز داوودا بله وعده ورئب: ”قولوم داوودون الی واسئطه‌سی‌ائله ائسرایئل خالقیمی هم فئلئسطلی‌لردن، هم ده اونلارین بوتون دوشمنلرئندن خئلاص اده‌جه‌یم.“»
19آبنِر بِنیامئنلی‌لره ده دانیشدی. سونرا ائسرایئلئن و بوتون بِنیامئن نسلئنئن اتمه‌یه راضی اولدوقلاری هر شیی داوودا نقل اتمک اوچون خِبرونا گتدی. 20آبنِر ائیئرمی نفر ائله خِبرونا، داوودون یانینا گلنده، داوود آبنِر و اونون آداملاری اوچون بئر ضیافت دوزَلتدی. 21آبنِر داوودا ددی: «ایجازه ور، گدئب بوتون ائسرایئلی آغام پادشاهین حوضورونا ییغیم کی، سنئنله عهد کسسئنلر و سن اوره‌یئن ائسته‌دئیی هر شیئن اوستونده حؤکمرانلیق اده‌سن.» بله‌جه داوود آبنِری یولا سالدی و او، صاغ-سالامات گتدی.
یوآب آبنِری اؤلدورور
22همئن واخت داوودون آداملاری و یوآب بئر هوجومدان چوخلو تالان ائله قاییتدیلار. آمّا او واخت آبنِر داوودون یانیندا، خِبروندا یوخ ائدی، چونکی داوود آبنِری یولا سالمیشدی و او، صاغ-سالامات گتمئشدی. 23یوآب و اونون بوتون قوشونو چاتاندا، اونا ددئلر: «نِر اوغلو آبنِر پادشاهین یانینا گلمئشدی. او دا آبنِری یولا سالدی و او، صاغ-سالامات گتدی.»
24بله‌جه یوآب پادشاهین یانینا گدئب ددی: «نه ائش گؤردون؟ باخ، آبنِر سنئن یانینا گلمئشدی. نئیه اونو یولا سالدین کی، ائندی گدئب؟ 25بئلئرسن کی، نِر اوغلو آبنِر سنی آلداتماق اوچون، سنئن نه اده‌جه‌یئنی و اتدئیئن هر شیی اؤیرنمک اوچون گلمئشدی.»
26یوآب داوودون یانیندان چیخاندا، آبنِرئن دالینجا قاصئدلر گؤندَ‌ردی. اونلار اونو سئرا قویوسوندان گری قایتاردیلار. آمّا داوودون بوندان خبری یوخ ائدی. 27آبنِر خِبرونا قاییداندا، یوآب گویا گئزلئجه دانیشماق ائسته‌یئرمئش کئمی اونو دروازانین ائچئنده کنارا چکدی و اورادا قارنیندان اونا ووردو. آبنِر یوآبین قارداشی عَساهِلئن قانی اوجباتیندان اؤلدو. 28سونرا، داوود بونو اشئدنده ددی: «منئم و پادشاهلیغیمین آتامیزین حوضوروندا نِر اوغلو آبنِرئن قانیندان ابده قدر هچ گوناهی یوخدور. 29قوی بو قان یوآبین باشینا و اونون آتاسینین بوتون نسلئنه دوشسون! قوی یوآبین نسلئندن جریانی اولان، جوذاملی، اَل آغاجینا سؤیکَنَن، قیلینجدان دوشَن و یا چؤره‌یه مؤحتاج اولان کس هچ واخت اَسکئک اولماسین.» 30بله‌جه یوآب و اونون قارداشی اَبشه‌ی، آبنِری اؤلدوردولر، چونکی او، گئبعوندا اولان دؤیوشده اونلارین قارداشی عَساهِلی اؤلدورموشدو.
داوود آبنِر اوچون یاس توتور
31داوود یوآبا و اونونلا اولان بوتون خالقا ددی: «پالتارلارینیزی جیرین، چول گِیئن و آبنِرئن قاباغیندا یاس توتون.» داوود پادشاه جنازه‌نئن دالینجا گتدی. 32آبنِری خِبروندا باسدیردیلار. پادشاه اونون قبئرئنئن یانیندا برکدن آغلادی و بوتون خالق دا آغلادی. 33پادشاه آبنِرئن یاسیندا بو مرثئیه‌نی اوخودو: «آیا آبنِر، بئر آخماقین اؤلدویو کئمی، اؤلمه‌لی ائدی؟ 34اَللرئن باغلی دیئلدی، آیاقلارینا زنجئر ووورولمامیشدی. پئس آداملارین قاباغیندا دوشَن کئمی دوشدون.» بوتون خالق گئنه اونون اوچون آغلادی.
35سونرا بوتون خالق گلئب داوودا یالواردی کی، حله گوندوز اولارکن بئر شی یِسئن. آمّا داوود آند ائچئب ددی: «اگر گونش باتمامیشدان قاباق چؤره‌یی و یا باشقا بئر شیی دادسام، قوی آتامیز منه بله اتسئن و بوندان دا آرتیغینی اتسئن!»
36بوتون خالق بونو گؤروب سِوئندی. پادشاهین اتدئیی هر ائش بوتون خالقین خوشونا گلدی. 37بله‌جه او گون بوتون خالق و بوتون ائسرایئل بئلدی کی، نِر اوغلو آبنِرئن اؤلدورولمه‌سی پادشاهین ائسته‌یی ائله اولماییب. 38پادشاه اؤز اعیانلارینا ددی: «آیا بئلمئرسئنئز کی، بو گون ائسرایئلده بؤیوک بئر سَروَر، عظمتلی بئر آدام یره دوشوب؟ 39بو گون، مسح اولونموش پادشاه اولسام دا، من ضعئفم. و بو آداملار، یعنی صِرویانین اوغوللاری، منئم اوچون چوخ سرتدئرلر. قوی آتامیز پئسلئک ادنه، اؤز پئسلئیئنه گؤره عوض ورسئن.»
