2 Samuel 3

3 ¹Saulwui shimkhur eina Davidwui shimkhur ngachaili rai ngayur eina ngararhaowa. Davidna ngarar pangmeisang vai, kha Saulwui shimkhur ngarar ngazanmei vai. ²Hebronli Davidwui naomayarabing pharai. Awui naochizai Amnonna; ali Jezreelwui Ahino-amna pharai; ³kakhane Chileabli Carmelnao Nabalwui rameiva̱ Abigailna pharai; awui kakathum naomayara Absalomli Maacahna pharai, Maacah hi Geshurwui awunga Talmaiwui naongalāva̱na; ⁴khamate Adonijahli Haggithna pharai; kaphangā Shephatiahli Abitalna pharai; ⁵kala katharuka Ithre-amli Davidwui preiva̱ Eglahna pharai. Hibing Hebronli pharākhui Davidwui naomayarabingna.

Abnerna Davidli Ngaruma

⁶Saulwui shimkhur eina Davidwui shimkhur ngachaili rai ngararlakha, Abnerna Saulwui shimkhurli akhalattawui otpam pangsang ngasakchinga. ⁷Aiahwui naongalāva̱ Rizpah kahova̱ chi Saulwui ashāmva̱ akhana. Ish-boshethna Abnerli hānga, "Khisāda iwui avāva̱wui ashāmva̱li na ngasopikhala?"

⁸Abnerna Ish-boshethwui tui chi kashā eina malungvātlakhaida hānga, "I Judahli khamashit khalei fawui kui akhala? Aja zimik ina nawui avāva̱ Saulwui shimkhur, achinā ngarā eina angasotnaobingli khamashit sāchinga, kala nali Davidwui pāngli makakāmana. Kha ara sha̱nao hiwui vang na ili khanguili phen ngasakkhala! ^a a v8 'Fawui kui' kaji hi achālakhawui atam eina otmaphā mi, kalāngtha̱ lah yangkashe akhali khonshiwui tui akhana. ⁹Ithumwui Avāna Davidli ngashit kahai chi ina awui vang masaakha, ithumwui Avāna Abnerli chithāda kala chiwui tungli sāranu, ¹⁰wungram chi Saulwui shimkhurwui eina khuiphungda, Dan eina Beer-sheba eina tangda Davidwui wungpamkhong Israel eina Judahwui tungli shukhavaina."

¹¹Kala Ish-boshethna Abnerli tui akhala mahāngpaimana, kaja ana ali ngacheehaowa.

¹²Abnerna akhalattawui vang Davidli paomebing chihovāda hānga, "Ngalei hi khipāwuikhala? Ili tuingashit akha sālu, kala Israel saikora nawuili horsang khavai iwui pāng nali ngasora."

¹³Davidna hānga, "Phālakhaira; ina nali tuingashit akha sāra. Kha ina ot akha ningchanga: nana kharekachāng Saulwui naongalāva̱ Michalli makhuiraakha, na rā tharan iwui mai matheimara." ¹⁴Davidna Saulwui nao Ish-boshethli paomebing chihovāda hānga, "Philistine mi shākhawui atonhui eina ili fathui kahai ipreiva̱ Michal chi ili khamilu."

¹⁵Chieina Ish-boshethna mi chihovāda, ali agahara Laishwui naomayara Paltiwui eina khuiungmi. ¹⁶Agaharana ali ngasoda, Bahurim eina tangda chapngachāda ali shurvai. Chieina Abnerna ali "Ungulu" da hānga. Chieina ana latunga.

¹⁷Abnerna Israelwui khararnaobingli hānga, "Nathum ngayur eina Davidli nathumwui tungli awunga sākhavai ningchangngai kahaina. ¹⁸Ara sālu, kaja ithumwui Avāna Davidli tuingashit sai: 'Iwui rao Davidwui pāng eina ina iwui mi Israelli Philistinenaobingwui eina kala athumwui yangkashebing saikorawui eina huimira.'"

¹⁹Abnerna Benjaminnaobingli hānga; chiwui thili ana Hebronli vāda, Israel kala Benjaminwui shimkhur katongana sākhavai mayā kahai saikora chi Davidli hāngchiphuna. ²⁰Abner mi maga̱ ngasoda Hebronli Davidli khavā tharan, Davidna Abner eina awui mibingwui vang zātkhān sāmi. ²¹Abnerna Davidli hānga, "Ina vāda Israel saikorali iwui proho awungali kazipkhuira, chithākha athumna nali tuingashit sāra kala nawui ningkachāng saikorawuitungli na mungra." Chieina Davidna Abnerli chihovāhaowa, kala ana chingri kahai eina thuihaowa.

Joabna Abnerli shaothata

²²Chitharan Davidwui raobing kala Joabna ngapon eina ngaponkakhui ot kachungkha zangda latunga. Kha Abner Hebronli David eina maleimana, kaja Davidna ali chihovāhaira, kala ana chingri kahai eina vaihaira. ²³Joab kala awui raimibing saikora vākashung tharan, ali hānghaowa, "Nerwui naomayara Abner awungali khavā, kala awungana ali chihovāhaira, kala ana chingri kahai eina vaihaira."

²⁴Chieina Joabna awungali vāda hānga, "Nana khi sāhaira? Abner nali rāhaira; khisāda nana ali chihovāhaowa, kala ara ana vaihaira? ²⁵Nerwui naomayara Abner nali kaminam khavai, nawui apong kala nana kasā saikora chi theikhui khavai kharāna kaji nana thei."

²⁶Joabna Davidwui eina thuihailaga, ana Abnerwui thili paomebing chihovāhaowa, kala athumna ali Sirahwui ra̱khong eina hokhui rai. Kha Davidna khikha matheimana. ²⁷Abner Hebronli latunga tharan, Joabna ali ngathumsāda khamatui khavai thada ngaveiwui alungthungli hokhui, kala chili ali phasāli singutta. Joabwui achinā Asahelwui ashee wui vang ana thihaowa. ²⁸Chi khaleilaga, Davidna kashā tharan, ana hānga, "I kala iwui wungram Nerwui naomayara Abnerwui ashee wui vang eina ithumwui Avāwui mangāli katang makhavai khayon makhaleina. ²⁹Chi Joabwui kui kala awui avāwui shimkhur katongawuitungli tāranu! Joabwui shimkhurli zaizai khangaya̱ mi, phārrei kazāt kahai mi, kachiva̱li shaipa mi, raighai eina pitā mi, lah kashakazā mavāt mi katongali mavātpaimana." ³⁰Chieina Joab kala awui achinā Abishaina Abnerli sāthata, kaja ana Gibeonli raili athumwui achinā Asahelli shaothata.

Davidna Abnerwui vang chapngachai

³¹Davidna Joab kala awuili ngaso mibing saikorali hānga, "Nathumwui kachon serkhāklu, bora ngavailu, kala Abnerwui mangāli chapngachālu." Awunga Davidna kathi okowui thili zata. ³²Athumna Abnerli Hebronli chifahaowa, kala awungana awui chikhurli panglāk eina chapa, kala mi saikorana chapa. ³³Awungana Abnerwui vang chapchāt laa hi sai: "Abnerna mangkhama̱ thi thada thipaira̱khala? ³⁴Nawui pāng makhalapmana, nawui phei mari khanghuili makhalapmana. Makhayā mibingwui mangāli mi pitā thada na pitāhaira." Kala mi saikorana awui vang latluida chapa.

³⁵Chieina mibing saikorana zimik kathang leilakha David kashakazā shaikhavai kasatsangda rāhaowa, kha Davidna ngashit sāda hānga, "Kalikhada zimik matunranglakha ina khamui, lah ot khangatei khikhala zaakha, ithumwui Avāna ili chithāda kala chiwui lāngda zakshimeikharda sāranu!"

³⁶Mibing saikorana theihaida ningyāng unglakhaowa; kaja awungana sākahai saikora chi mibing saikorali ningyāng ungngasaka. ³⁷Chieina chithang mibing saikora kala Israel saikorana Nerwui naomayara Abnerwui kathi hi awungawui ning maningmana da theikhui. ³⁸Awungana awui raobingli hānga, "Aja Israelli wungnao kala kahakva̱ mi akha pitāhaira kaji nathumna matheithula? ³⁹Aja I thao neomi kahai awunga sāhailala, I nganukhaira; kala Zeruiahwui naomayarabing hibing iwui vang sakkhanā thaira. Ithumwui Avāna makaphā kasā chili awui makaphā otsak athishurda sāman mira."