2 Samyèl 3 FHB Father's Heart Bible™

3 ¹Lagè ki te genyen ant fanmi Sayil la ak fanmi David la te dire lontan. David t'ap vin pi fò chak jou pi plis, men fanmi Sayil la t'ap vin pi fèb chak jou pi plis. ²David te fè pitit gason lavil Ebwon. Premye pitit li a te rele Amnon. Manman l te rele Akinoam, moun lavil Jizreyèl. ³Dezyèm pitit li a te rele Kileyab. Manman l te rele Abigayèl, vèv Nabal, moun lavil Kamèl. Twazyèm lan te rele Absalon. Manman l te rele Maaka, pitit fi Talmayi, wa peyi Gechou. ⁴Katriyèm lan te rele Adonija, pitit Agit. Senkyèm lan te rele Chefatya, pitit Abital. ⁵Sizyèm lan te rele Itreyam. Manman l te rele Egla, madanm David. Se pitit gason sa yo David te fè lavil Ebwon.

Abner vin jwenn David

⁶Pandan lagè ki te genyen ant fanmi Sayil la ak fanmi David la, Abner t'ap vin gen plis pouvwa toujou nan fanmi Sayil la. ⁷Sayil te gen yon fanm kay yo te rele Rispa, pitit fi Aja. Ichbochèt di Abner: “Poukisa ou kouche ak fanm kay papa m lan?”

⁸Abner te fè yon sèl kòlè lè l tande sa Ichbochèt di a, li reponn: “Eske se yon tèt chen k'ap defann kòz Jida mwen ye? Jòdi a m'ap kontinye moutre jan m kanpe ak fanmi Sayil, papa ou, ak frè l yo ak zanmi l yo, mwen pa lage ou nan men David. Men koulye a w'ap akize mwen pou yon fanm! ^a a v8 “Tèt chen” se te yon jouman nan tan lontan pou yon trèt osinon yon lènmi ki pa vo anyen. ⁹Se pou Papa nou fè Abner tout kalite malè, e menm pi rèd toujou, si m pa fè pou David sa Papa nou te sèmante ba li a, ¹⁰pou m wete gouvènman an nan men fanmi Sayil la, pou m mete David wa pou gouvènen ni peyi Izrayèl ni peyi Jida, depi lavil Dann rive lavil Bècheba.”

¹¹Ichbochèt pa t ka reponn Abner anyen ankò, paske li te pè l.

¹²Abner voye kèk mesaje bò kote David pou di l pou li: “Ki moun ki mèt peyi a? Pase yon kontra avè m, m'ap ba ou konkou mwen pou m fè tout pèp Izrayèl la vin jwenn ou.”

¹³David reponn: “Dakò. M'ap pase yon kontra avè ou. Men, gen yon sèl bagay m'ap mande ou: ou p'ap wè figi m si ou pa mennen Mikal, pitit fi Sayil la, ban mwen anvan, lè w'ap vin jwenn mwen.” ¹⁴David voye mesaje bò kote Ichbochèt, pitit Sayil la, pou di l: “Renmèt mwen Mikal, madanm mwen, mwen te peye san po moun Filisti pou m te ka fiyanse avè l la.”

¹⁵Se konsa Ichbochèt voye chèche Mikal kay mari l, Paltyèl, pitit Layis la. ¹⁶Mari a pati dèyè l, li t'ap kriye sou tout wout la jouk yo rive lavil Bakourim. Men Abner di l: “Tounen lakay ou.” Epi li tounen.

¹⁷Abner al pale ak chèf fanmi pèp Izrayèl yo, li di yo: “Depi lontan n'ap chèche fè David wa pou gouvènen nou. ¹⁸Koulye a, se lè pou nou aji, paske Papa nou te pwomèt David: ‘Avèk men David, sèvitè mwen an, m'ap delivre pèp Izrayèl mwen an anba men moun Filisti yo ak tout lòt lènmi yo.’”

¹⁹Abner pale ak moun branch fanmi Benjamen yo tou. Apre sa, li al lavil Ebwon pou l rakonte David tou sa pèp Izrayèl la ak tout branch fanmi Benjamen an te dakò pou yo fè. ²⁰Lè Abner rive lakay David lavil Ebwon ak ven moun, David fè yon gwo resepsyon pou Abner ak moun ki te avè l yo. ²¹Abner di David: “Kite m ale, m'ap sanble tout pèp Izrayèl la devan ou, monwa, mèt mwen, pou yo pase yon kontra avè ou, pou ou ka gouvènen tout kote kè ou vle a.” Se konsa David kite Abner ale, epi Abner pati ak kè poze.

Joab ansasinen Abner

²²Lè sa a menm, sòlda David yo ak Joab t'ap tounen soti nan yon atak, yo te pote anpil bagay yo te pran. Men Abner pa t avèk David lavil Ebwon ankò, paske David te gen tan kite l ale, epi li te pati ak kè poze. ²³Lè Joab ak tout sòlda ki te avè l yo rive, yo di Joab: “Abner, pitit Nè a, te vin jwenn wa a, epi wa a kite l ale, li pati ak kè poze.”

²⁴Joab al jwenn wa a, li di l: “Kisa ou fè la a? Abner te vin jwenn ou. Poukisa ou kite l ale, epi koulye a li gen tan pati? ²⁵Ou konnen Abner, pitit Nè a, te vin twonpe ou, pou l te ka konnen tout vire tounen ou ak tou sa w'ap fè.”

²⁶Lè Joab kite David, li voye kèk mesaje dèyè Abner. Yo jwenn li bò sitèn Sira a, yo fè l tounen. Men David pa t konn anyen sou sa. ²⁷Lè Abner tounen lavil Ebwon, Joab mennen l sou kote anndan pòtay la, tankou li te vle pale ak li an prive. La menm, li plante yon kout ponya nan vant Abner, epi Abner mouri. Se te pou san Asayèl, frè Joab la. ²⁸Apre sa, lè David vin konn sa, li di: “Devan Papa nou, ni mwen menm ni gouvènman mwen an inonsan pou tout tan nan san Abner, pitit Nè a. ²⁹Se pou san sa a tonbe sou tèt Joab ak sou tout fanmi papa l! Se pou nan fanmi Joab toujou gen yon moun k'ap koule, osinon ki gen move maladi po, osinon ki blije mache ak baton, osinon ki mouri anba kout nepe, osinon ki manke manje.” ³⁰Se konsa Joab ak Abichayi, frè l la, touye Abner paske Abner te touye Asayèl, frè yo a, nan batay lavil Gabawon an.

David fè dèy pou Abner

³¹David di Joab ak tout moun ki te avè l yo: “Chire rad sou nou, mete rad sak sou nou, epi fè dèy pou Abner.” Wa David menm t'ap mache dèyè sèkèy la. ³²Yo antere Abner lavil Ebwon. Wa a pran kriye byen fò bò kote kavo a, epi tout pèp la pran kriye tou. ³³Wa a chante yon chante plenn pou Abner, li di: “Eske se pou Abner te mouri tankou yon moun san konprann? ³⁴Men ou pa t mare, pye ou pa t nan chenn. Ou tonbe menm jan yon moun tonbe devan mechan.” Epi tout pèp la pran kriye pou li ankò.

³⁵Apre sa, tout pèp la vin ensiste pou David manje yon bagay pandan li te fè jou toujou. Men David fè sèman: “Se pou Papa nou fè m tout kalite malè, e menm pi rèd toujou, si m goute pen osinon nenpòt lòt bagay anvan solèy kouche!”

³⁶Tout pèp la wè sa, sa te fè yo plezi. Tou sa wa a te fè te fè tout pèp la plezi. ³⁷Se konsa, jou sa a, tout pèp la ak tout moun Izrayèl yo vin konnen se pa t wa a ki te bay lòd pou yo touye Abner, pitit Nè a. ³⁸Wa a di moun k'ap sèvi l yo: “Nou pa konnen jòdi a yon chèf, yon gran nèg, tonbe nan peyi Izrayèl? ³⁹Jòdi a, atout se mwen menm yo chwazi pou wa a, mwen fèb, epi mesye sa yo, pitit Sewouya yo, twò di pou mwen. Se pou Papa nou fè moun ki fè mal la peye pou mechanste li.”