2 ሳሙኤል 3

3 ¹በሳኦል ቤትና በዳዊት ቤት መካከል የተደረገው ጦርነት ረጅም ጊዜ ዘለቀ። ዳዊት ከጊዜ ወደ ጊዜ እየበረታ ሄደ፤ የሳኦል ቤት ግን ከጊዜ ወደ ጊዜ እየደከመ ሄደ። ²በኬብሮንም ለዳዊት ወንዶች ልጆች ተወለዱ። የበኵር ልጁ አምኖን ነበር፤ እናቱም የይዝራኤል ሴት አኪኖዓም ነበረች፤ ³ሁለተኛው ኪልዓብ ነበር፤ እናቱም የቀርሜሎሱ የናባል መበለት አቢግያ ነበረች፤ ሦስተኛው የጌሶር ንጉሥ የተልማይ ልጅ የመዓካ ልጅ አቤሴሎም ነበር፤ ⁴አራተኛው የሐጊት ልጅ አዶንያስ ነበር፤ አምስተኛው የአቢጣል ልጅ ሰፋጥያ ነበር፤ ⁵ስድስተኛው የዳዊት ሚስት ከዔግላ የተወለደ ይትሬዓም ነበር። እነዚህ በኬብሮን ለዳዊት የተወለዱ ልጆች ናቸው።

አበኔር ከዳዊት ጋራ ተባበረ

⁶በሳኦል ቤትና በዳዊት ቤት መካከል ጦርነቱ በቀጠለበት ጊዜ፣ አበኔር በሳኦል ቤት ውስጥ ራሱን እያጠናከረ ሄደ። ⁷ሳኦልም ራጽጳ የተባለች የአያ ልጅ ቁባት ነበረችው። ኢሳቦስቴም አበኔርን፣ “ከአባቴ ቁባት ጋራ ለምን ተኛህ?” አለው።

⁸አበኔርም በኢሳቦስቴ ቃል እጅግ ተቈጥቶ እንዲህ አለ፤ “እኔ ለይሁዳ ያደረ የውሻ ራስ ነኝን? ዛሬ ለአባትህ ለሳኦል ቤት፣ ለወንድሞቹና ለወዳጆቹ ታማኝነትን እያሳየሁ፣ ለዳዊት እጅ አላሳልፍሁህም። አንተ ግን ዛሬ ስለዚህች ሴት ትከስሰኛለህ! ^a a v8 ‘የውሻ ራስ’ የሚለው ጥንታዊ ስድብ ሆኖ፣ ዋጋ ለሌለው ከዳተኛ ወይም ጠላት ይነገር ነበር። ⁹ለዳዊት አባታችን የማለለትን ካላደረግሁለት፣ አባታችን በአበኔር እንዲህ ያድርግ፣ ከዚህም የባሰ ያድርግ፤ ¹⁰ይኸውም መንግሥትን ከሳኦል ቤት አዛውሮ፣ የዳዊትን ዙፋን ከዳን እስከ ቤርሳቤህ በእስራኤልና በይሁዳ ላይ ለማጽናት ነው።”

¹¹ኢሳቦስቴም ስለ ፈራው፣ ለአበኔር ሌላ ቃል መመለስ አልቻለም።

¹²አበኔርም ስለ ራሱ ወደ ዳዊት መልእክተኞችን ልኮ፣ “ምድሪቱ የማን ናት? ከእኔ ጋራ ኪዳንህን አድርግ፤ እጄም ከአንተ ጋራ ሆኖ እስራኤልን ሁሉ ወደ አንተ ያዞራል” አለ።

¹³ዳዊትም እንዲህ አለ፤ “መልካም፤ ከአንተ ጋራ ኪዳን አደርጋለሁ። ነገር ግን አንድ ነገር እሻለሁ፤ ስትመጣ አስቀድመህ የሳኦልን ልጅ ሜልኮልን ካላመጣህ በቀር ፊቴን አታይም።” ¹⁴ዳዊትም ወደ ሳኦል ልጅ ወደ ኢሳቦስቴ መልእክተኞችን ልኮ፣ “በመቶ የፍልስጥኤማውያን ሸለፈት ያጫሁትን ሚስቴን ሜልኮልን ስጠኝ” አለ።

¹⁵ኢሳቦስቴም ልኮ ከባልዋ ከላይስ ልጅ ከፈልጥኤል ወሰዳት። ¹⁶ባልዋም እስከ ባሁሪም ድረስ እያለቀሰ ተከትሎአት ሄደ። አበኔርም፣ “ተመለስ” አለው፤ እርሱም ተመለሰ።

¹⁷አበኔርም ከእስራኤል ሽማግሌዎች ጋራ ተነጋግሮ እንዲህ አለ፤ “ዳዊት በእናንተ ላይ ንጉሥ እንዲሆን ከብዙ ጊዜ ጀምሮ ትሹ ነበር። ¹⁸አሁንም አድርጉት፤ አባታችን ዳዊትን፣ ‘በባሪያዬ በዳዊት እጅ ሕዝቤን እስራኤልን ከፍልስጥኤማውያንና ከጠላቶቻቸው ሁሉ አድናለሁ’ ብሎ ቃል ገብቶለታልና።”

¹⁹አበኔርም ደግሞ ለብንያም ተናገረ፤ ከዚያም እስራኤልና የብንያም ቤት ሁሉ ሊያደርጉ የተስማሙበትን ሁሉ ለዳዊት ሊነግር ወደ ኬብሮን ሄደ። ²⁰አበኔርም ከሃያ ሰዎች ጋራ ወደ ኬብሮን ወደ ዳዊት በመጣ ጊዜ፣ ዳዊት ለአበኔርና ለሰዎቹ ግብዣ አደረገ። ²¹አበኔርም ዳዊትን፣ “ሄጄ እስራኤልን ሁሉ ወደ ጌታዬ ወደ ንጉሡ እሰበስባለሁ፤ ከአንተም ጋራ ኪዳን ያደርጋሉ፤ አንተም ልብህ በሚሻው ሁሉ ላይ ትነግሣለህ” አለው። ዳዊትም አበኔርን አሰናበተው፤ እርሱም በሰላም ሄደ።

ኢዮአብ አበኔርን ገደለ

²²በዚያም ጊዜ የዳዊት አገልጋዮችና ኢዮአብ ብዙ ምርኮ ይዘው ከወረራ ተመለሱ። አበኔር ግን በኬብሮን ከዳዊት ጋራ አልነበረም፤ ዳዊት አሰናብቶት ነበርና፣ እርሱም በሰላም ሄዶ ነበር። ²³ኢዮአብና ሰራዊቱ ሁሉ በደረሱ ጊዜ፣ “የኔር ልጅ አበኔር ወደ ንጉሡ መጥቶ ነበር፤ ንጉሡም አሰናበተው፤ እርሱም በሰላም ሄደ” ተብሎ ተነገረው።

²⁴ኢዮአብም ወደ ንጉሡ ሄዶ እንዲህ አለ፤ “ምን አደረግህ? አበኔር ወደ አንተ መጥቶ ነበር፤ ለምን አሰናበትኸው? አሁንም ሄደ! ²⁵የኔር ልጅ አበኔር ሊያታልልህ፣ መውጫ መግቢያህንና የምታደርገውን ሁሉ ሊያውቅ እንደ መጣ ታውቃለህ።”

²⁶ኢዮአብም ከዳዊት ዘንድ ወጥቶ፣ በአበኔር ኋላ መልእክተኞችን ላከ፤ እነርሱም ከሲራ ጕድጓድ መልሰው አመጡት። ዳዊት ግን ይህን አላወቀም። ²⁷አበኔርም ወደ ኬብሮን በተመለሰ ጊዜ፣ ኢዮአብ ለብቻው ሊያናግረው እንደ ፈለገ መስሎ በበሩ መካከል ወደ ጎን ወሰደው፤ በዚያም ሆድ ዕቃውን ወግቶ ገደለው፤ ሞተም፤ ይኸውም ስለ ኢዮአብ ወንድም ስለ አሳሄል ደም ነበር። ²⁸ከዚያም በኋላ ዳዊት በሰማ ጊዜ እንዲህ አለ፤ “እኔና መንግሥቴ ከኔር ልጅ ከአበኔር ደም የተነሣ በአባታችን ፊት ለዘላለም ንጹሓን ነን። ²⁹ደሙም በኢዮአብ ራስና በአባቱ ቤት ሁሉ ላይ ይውደቅ! በኢዮአብ ቤትም ፈሳሽ ያለበት ወይም ለምጻም፣ በበትር የሚመረኰዝ፣ በሰይፍ የሚወድቅ ወይም እንጀራ የሚያጣ ሰው አይታጣ።” ³⁰ስለዚህ ኢዮአብና ወንድሙ አቢሳ በገባዖን ጦርነት ወንድማቸውን አሳሄልን ስለ ገደለ አበኔርን ገደሉት።

ዳዊት ስለ አበኔር አለቀሰ

³¹ዳዊትም ኢዮአብንና ከእርሱ ጋራ ያሉትን ሕዝብ ሁሉ፣ “ልብሳችሁን ቅደዱ፤ ማቅ ልበሱ፤ በአበኔርም ፊት አልቅሱ” አላቸው። ንጉሡ ዳዊትም ከሬሳው ሳጥን ኋላ ሄደ። ³²አበኔርንም በኬብሮን ቀበሩት፤ ንጉሡም በመቃብሩ ዘንድ ድምፁን ከፍ አድርጎ አለቀሰ፤ ሕዝቡም ሁሉ አለቀሰ። ³³ንጉሡም ለአበኔር እንዲህ ብሎ ሙሾ አወጣ፤ “አበኔር ሞኝ እንደሚሞት በሞተ መሞት ነበረበትን? ³⁴እጆችህ አልታሰሩም፣ እግሮችህም በሰንሰለት አልተጠፈሩም። በክፉዎች ፊት እንደሚወድቅ ሰው ወደቅህ።” ሕዝቡም ሁሉ እንደ ገና አለቀሰለት።

³⁵ከዚያም ሕዝቡ ሁሉ ገና ቀን ሳለ ዳዊት ምግብ እንዲበላ ሊያስገድዱት መጡ፤ ዳዊት ግን፣ “ፀሓይ ሳትጠልቅ እንጀራ ወይም ሌላ ማናቸውንም ነገር ብቀምስ፣ አባታችን እንዲህ ያድርግብኝ፣ ከዚህም የባሰ ያምጣብኝ!” ብሎ ማለ።

³⁶ሕዝቡም ሁሉ ተመለከተ፤ ደስም አለው፤ ንጉሡ ያደረገው ሁሉ ሕዝቡን ሁሉ ደስ አሰኘው። ³⁷በዚያም ቀን ሕዝቡ ሁሉና እስራኤል ሁሉ የኔር ልጅ አበኔር እንዲገደል ንጉሡ እንዳልፈለገ አወቁ። ³⁸ንጉሡም አገልጋዮቹን፣ “ዛሬ በእስራኤል አንድ አለቃና ታላቅ ሰው እንደ ወደቀ አታውቁምን? ³⁹ዛሬ የተቀባሁ ንጉሥ ብሆንም ደካማ ነኝ፤ እነዚህም ሰዎች የጽሩያ ልጆች ከኔ ይልቅ ብርቱ ናቸው። አባታችን ክፉ ለሚያደርገው ሰው እንደ ክፋቱ ይከፍለው።”