2 ሳሙኤል 4

4 ¹የሳኦል ልጅ ኢያቦስቴ አበኔር በኬብሮን መሞቱን በሰማ ጊዜ ልቡ ፈራ፤ እስራኤልም ሁሉ ተደናገጠ። ²የሳኦል ልጅ ሁለት የወራሪ ጭፍራ አለቆች ነበሩት፤ እነርሱም ከብንያም ነገድ የሆኑት የቤሮታዊው የሬሞን ልጆች ባናና ሬካብ ነበሩ፤ ቤሮትም ደግሞ የብንያም ክፍል ሆና ትቈጠራለችና፤ ³ቤሮታውያን ወደ ጊታይም ሸሽተው እስከ ዛሬ ድረስ በዚያ እንደ መጻተኛ ኖረዋልና።

⁴የሳኦል ልጅ ዮናታን ሁለቱም እግሮቹ የሰለሉ ልጅ ነበረው። ስለ ሳኦልና ስለ ዮናታን ወሬ ከይዝራኤል በመጣ ጊዜ ዕድሜው አምስት ዓመት ነበር፤ ሞግዚቱም ልትሸሽ ይዛው ስትቸኩል ወደቀና ሰለለ። ስሙም ሜምፊቦስቴ ነበር።

⁵የቤሮታዊው የሬሞን ልጆች ሬካብና ባና በቀትር ትኵሳት ኢያቦስቴ የቀትር ዕረፍቱን ሲያርፍ ወደ ቤቱ መጡ። ⁶ስንዴ ሊወስዱ ያህል ወደ ቤቱ መካከል ገብተው ሆዱን ወጉት፤ ሬካብና ወንድሙ ባናም አመለጡ። ⁷ኢያቦስቴ በመኝታ ክፍሉ በአልጋው ላይ ተኝቶ ሳለ ወደ ቤቱ ገብተው ነበር። መትተው ገደሉት፤ ራሱንም ቈርጠው ወስደው ሌሊቱን ሁሉ በአራባ መንገድ ተጓዙ። ⁸የኢያቦስቴንም ራስ ወደ ኬብሮን ወደ ዳዊት አምጥተው ንጉሡን እንዲህ አሉት፤ “እነሆ፣ ነፍስህን ይፈልግ የነበረው የጠላትህ የሳኦል ልጅ የኢያቦስቴ ራስ ይህ ነው። ዛሬ አባታችን ለጌታዬ ለንጉሡ ከሳኦልና ከዘሩ በቀል ተበቀለ።” ^a a v8 ገዳዮቹ ወንጀላቸውን ለአባታችን ይሰጣሉ፤ ነገር ግን መልሱ ንጹሕ ሰውን እንደ ገደሉ ነፍሰ ገዳዮች አድርጎ በሚፈርድባቸው በዳዊት በኩል ይመጣል።

⁹ዳዊት ግን የቤሮታዊው የሬሞን ልጆች ሬካብንና ወንድሙን ባናን እንዲህ ሲል መለሰላቸው፤ “ነፍሴን ከመከራ ሁሉ የዋጀ አባታችን በሕይወት እንዳለ፣ ¹⁰አንድ ሰው ‘እነሆ ሳኦል ሞቷል’ ብሎ የምሥራች ያመጣ መስሎት በነገረኝ ጊዜ፣ በጺቅላግ ይዤ ገደልሁት፤ ለዜናው የከፈልሁት ዋጋ ይህ ነበር! ¹¹ክፉ ሰዎች ጻድቅን ሰው በገዛ ቤቱ በራሱ አልጋ ላይ ሲገድሉ፣ ይልቁንስ አሁን ደሙን ከእጃችሁ ፈልጌ ከምድር ላይ አላስወግዳችሁምን? ¹²ዳዊትም ጕልማሶቹን አዘዘ፤ እነርሱም ገደሏቸው፤ እጆቻቸውንና እግሮቻቸውንም ቈርጠው ሬሳቸውን በኬብሮን ባለው ኵሬ አጠገብ ሰቀሉ። የኢያቦስቴን ራስ ግን በኬብሮን በአበኔር መቃብር ቀበሩት።”