Ishbosheth Haitibü
Ishbosheth lolo sepai tan leiyeibü müt nyiei hao chajiha yepan kijinei haoeibü shimunga lotan haitikei, hoba haoeibü khu Hebron to leikei, kho seneibü Boueibü phoklambü ki dogo lauko. Dawidei, shangied Saul haitikei dogo laubü müt haitibou, haoen haitikei. Khu kho Hebrona Abnereibü heedanga khünkei.
4 1Ladang Sauleibü shou Ishboshethei Abner Hebrona haia dogo ditkei, haoeibü maangpon tühnyinkei, hoba Israel pendou shaknyinkei. 2Tou Sauleibü shoueibü sepai tan leiyeibou müt nyi kikei, haoneibü nyen Baona hoba Rekab, Benjaminbü Beerotbü Rimmoneibü shousi; aishanga Beerot tokei Benjaminbü jamde shanga weanchühbü ki, 3aishanga Beerotbü shuong Gittaim to satenkei, hoba tat sühko khünei yen la lean kikei.
4Sauleibü shou Jonathan yoa you penyiham sian sokebü nashou che kikei. Saul si Jonathan shanga haüthükbü Jezreel ka loukei chaloua hao po ngao kikei; haoeibü thuinyuei hao hatan satla lambei, lausikei saoei panteiko meimeian jiha nashou tuongkei hoba sokebü yeikei. Haoeibü nyen Mefiboshet kikei.
5Beerotbü Rimmoneibü shousi Rekab hoba Baonaei chalou aubua, hao chajiha yepan kijinei, Ishbosheth chem to loukei. 6Haoen youshou leila tegütham chem jenyua atkei, hoba haoeibü shimunga lotkei, hoba Rekab si hao na Baona satenkei. 7Ishbosheth jembü yepshangpob to haoeibü yepshanga yepan kijinei haoen chem maang to atkei, hoba haoenei hao khonkutikei hoba haitikei, hoba haoeibü khu wapan sungletkei, hoba kho leian langyang sünga Araba lam danko meimeikei. 8Hobaje haoenei Ishbosheth khu Hebrona Dawid jungto leian loukei, hoba Choba to laukei, “Chühashi, kaibü soushou lambü kaibü dangbou, Sauleibü shou Ishboshetheibü khu hibü kia. Tat seneibü Bouei ngeibü bunyu Choba shanga Saul si haoeibü lilabü to phok lambua.” a a v8 Haitibou shuongei haoneibü shabü shonbü kho seneibü Bou to kuda, lausikei haoeibü jongai kho Dawid danko louda, hoba Dawidei haoen la maikeimainyu müt che haitibou shuong dogo matjemda.
9Lausikei Dawidei Beerotbü Rimmoneibü shousi Rekab si hao na Baona to jongaikei, “Thushed pendou ka ngeibü soushou khümenbou seneibü Bou ki shongko, 10ladang müt cheei kü to, ‘Chühashi, Saul haikei,’ dogo lenkei, hao jembüei olinbü ngühlang leibada dogo thineikei, ngei hao lapan Ziklaga haitikei. Kho haoeibü ngühlang shanga ngei hao la kubü jongsak kikei! 11Amaibü müt shuongei saopobü müt che jembü chema, jembü yepshanga haitikei kho, khübü toje yaangbou akilao! Kheijinei tat ngei haoeibü sii kan ik ka ahila lo, hoba kan kaodak ka asunglangla lo?” 12Hobaje Dawidei haoeibü younak shuong la ngühkhüm kukei, hoba haoenei haoen haitikei, hoba haoneibü ik si you wapan apbei, hoba haoneibü mang Hebrona thimdei junga saükei. Lausikei Ishbosheth khu kho haoenei Hebrona Abnereibü tomba khünkei.
