Ish-boshethli Shaothatkahai
Ish-boshethwui kaphasā-ophisar kanina, rakhonli rakhom kahai tharan awui khamāngli sanda thatra, kala awui akuiva Hebronli kakhui, ‘Ithumwui Avāwui khasharashi’ da hai. David, Saulva thatra da kahai mi thatra ngasoda, athumva thatsangra. Akui Abnerwui tuiphungli phunra.
4 1Saulwui naomayara Ish-boshethna Abner Hebronli thihaira da kahāng eina, awui malung tātunghaowa, kala Israel saikora kashuihaowa. 2Saulwui naomayarawui rai katawui akhokabing khani leisai; anina Benjaminshi Be-erothpa Rimmonwui naomayara Baanah kala Rechabna. Kaja Be-eroth la Benjaminwui alungli shānkhuihaira, 3kaja Be-erothnaobing chi Gittaimli yāmvāhaowa, kala aja eina tangda chili ramkazat thāda pamda leichinghaowa.
4Saulwui naomayara Jonathanwui phei khanini katek nao akha leisai. Saul eina Jonathanwui pao Jezreelwui eina rā tharan a zingkum phangā kāhairasai; awui sheba kasava̱ akhana ali yonkhuida yāmkhavai salui, kha ana thakta zat tharan nao chi mashunhaida phei tekhaowa. Awui aming Mephiboshethna.
5Be-erothpa Rimmonwui naomayara Rechab kala Baanahna, Ish-bosheth ngashunung ngasāmda leilakha, ngashunwui kasā atamli awui shimli rāhaowa. 6Anina kehu khuikhavai thāda shimwui alungli zanglaga awui awukli singutta, kala Rechab kala agato Baanahna taishokhaowa. 7Ish-bosheth awui petkāli awui pettungli pida leilakha, anina shimli zangkahaina. Anina ali shaotāda shaothatlaga awui kui katatlaga, chi khuida ngayā katonga Arabahwui apong eina zata. 8Anina Ish-boshethwui kui Hebronli Davidli khuirā, kala awungali hānga, "Yanglu, namanglā khuikida phai nawui yangkashe, Saulwui naomayara Ish-boshethwui kui china. Aja zimiksho ithumwui Avāna ishāmei awungali Saul eina awui ara̱-azāli athut khuimihaira." a a v8 Shaothatpabingna athumwui morei chi ithumwui Avāwui katungli sangda hānga, kha awui ngahānkai chi Davidwui apong eina rā, ana athumli khalāng makhalei mi shaokathatbing da khayonmi.
9Kha Davidna Be-erothpa Rimmonwui naomayara Rechab kala agato Baanahli ngahānkai: "Iwui mirin sipkasā saikorawui eina ngatangkhui kahai ithumwui Avā ringda leili, 10mi akhana ili, 'Yanglu, Saul thihaira,' da kahāng tharan, ana khamathā pao khuirāhaira phaninglaga, ina ali Ziklagli tukkhuida shaothata. Chi ina ali awui paowui vang mihaira sāman china! 11Makhayā mibingna khamashung khangarong mi akhali awui shimlungli, awui pettungli shaothat tharan, chithākha ara kachungkha eina ina awui ashee naniwui pāngli mapokhuira, kala okathuiwui eina nanili masāshimānmara? 12Davidna awui yaronnaobingli kasoi, kala athumna anili shaothata, aniwui pāng kala phei katatlaga Hebronli ra̱khong ngalemli aniwui phasā hokthānga. Kha Ish-boshethwui kui chi athumna Hebronli Abnerwui chikhurli chifahaowa."
