ቕትለት ኢያቡስቴ

ክልተ ኻብ ሓለቕቲ ሽፍታ ኢያቡስቴ፥ ኣብ ቀትሪ ዕረፍቱ ኣብ ዓራቱ እንተሎ ወግእዎ፥ ርእሱ ኸዓ ናብ ኬብሮን ኣምፂኦም ‘ሕነ ኣቦና’ ኢሎም ፀውዕዎ። ዳዊት ግና፥ እቲ ቅድም ነቲ ‘ንሳኦል ቀቲለዮ’ ዝበለ ሰብኣይ ዝቐተለ፥ ቐተሎም። እታ ርእሲ ኸዓ ኣብ መቓብር ኣበኔር ተቐበረት።

ምዕራፍ 4።

ወዲ ሳኦል ኢያቡስቴ ድማ ኣበኔር ኣብ ኬብሮን ሞይቱ ኸም ዘሎ ምስ ሰምዐ፥ ኢዱ ላሕለሐ፤ ኵሉ እስራኤልውን ሰምበደ። ወዲ ሳኦል ድማ ክልተ ሓለቕቲ ሽፍታ ነበርዎ፤ ስም እቲ ሓደ በዓና፥ ስም እቲ ኻልእ ከዓ ሬካብ፥ ደቂ ሪሞን በዓል ብኤሮት ካብ ደቂ ብንያም እዮም፤ ብኤሮት ድማ ናይ ብንያም ኮይና ትቑፀር ነበረት፤ እቶም ሰብ ብኤሮት ናብ ጊታይም ሃዲሞም፥ ክሳዕ ሎሚ ኣብኡ ስደተኛታት ኮይኖም ይነብሩ ኣለዉ።

ዮናታን ወዲ ሳኦል ድማ ክልቲአን ኣእጋሩ ልሙሳት ዝኾነ ወዲ ነበሮ። ወረ ሳኦልን ዮናታንን ካብ ኢይዝራኤል ምስ መፀ፥ ወዲ ሓሙሽተ ዓመት ነበረ፤ መጕዚቱ ድማ ወሲዳ ክተህድሞ እናተቐላጠፈት ክትከይድ እንተላ፥ ወደቐ እሞ ተጐድአ። ስሙ ድማ ሜምፊቦስቴ ተብሃለ።

ሬካብን በዓናን፥ ደቂ ሪሞን በዓል ብኤሮት ድማ፥ ብሃሩር መዓልቲ ናብ ቤት ኢያቡስቴ መፁ፤ ንሱ ኸዓ ቀትሪ ይድቅስ ነበረ። ስርናይ ዝወስዱ ኣምሲሎም ድማ ናብ ማእኸል እታ ቤት ኣተዉ፤ ከብዱ ወግእዎ፤ ሬካብን ሓዉ በዓናን ከዓ ኣምለጡ። ኢያቡስቴ ኣብቲ ሕልፍኚ ኣብ ዓራቱ ደቂሱ እንተሎ ድማ፥ ናብታ ቤት ኣትዮም ነበሩ። ወቒዖም ከዓ ቐተልዎ፤ ርእሱ ድማ ቘሪፆም ወሰድዎ፤ ምሉእ ለይቲ ኸዓ ብመንገዲ ዓረባ ግስግስ ሓደሩ። ርእሲ ኢያቡስቴ ድማ ናብ ዳዊት ናብ ኬብሮን ኣምፂኦም ነቲ ንጉስ ከምዙይ በልዎ፦ “እንሆ ርእሲ ኢያቡስቴ ወዲ ሳኦል፥ እቲ ንህይወትካ ዝደለየ ፀላኢኻ። ሎሚ ኣቦና ንጐይታይ ንጉስ ካብ ሳኦልን ካብ ዘርኡን ሕነ ፈዲዩሉ ኣሎ።” ^a

ዳዊት ግና ንሬካብን ሓዉ በዓናን፥ ደቂ ሪሞን በዓል ብኤሮት ከምዙይ ኢሉ መለሰሎም፦ “ነቲ ንህይወተይ ካብ ኵሉ ፀበባ ዝተቤዘወኒ ህያው ኣቦና እምሕል ኣለኹ፥ ሓደ ሰብ ‘እንሆ፥ ሳኦል ሞይቱ’ ምስ በለኒ፥ ብስራት ዘምፅእ ዘሎ መሲልዎ ነበረ፤ ኣነ ግና ኣብ ፂቅላግ ሒዘ ቐተልክዎ። ነቲ ብስራት ዝሃብክዎ ዓስቢ እዙይ እዩ! ክፉኣት ሰባት ንፃድቕ ሰብ ኣብ ገዛኡ ኣብ ዓራቱ ምስ ዝቐትሉ ደኣ፥ ክንደይ ኣብ ዝበለፀ ኾን! ሕዚ ደሙ ካባኻትኩም ክደሊ፥ ንስኻትኩም ድማ ካብ ምድሪ ከጥፍአኩምዶ ኣይግብአንን?” ዳዊት ድማ ንመንእሰያቱ ኣዘዞም፤ ንሳቶም ከዓ ቐተልዎም፤ ኣእዳዎምን ኣእጋሮምን ቘሪፆም ኣብ ጥቓ ቃላይ ኬብሮን ሰቐልዎም። ርእሲ ኢያቡስቴ ግና ወሲዶም ኣብ መቓብር ኣበኔር ኣብ ኬብሮን ቐበርዎ።